(ភ្នំពេញ)៖ តារាជួរមុខ​របស់ផលិត​កម្ម Baramey រួមមាន VannDa, Vanthan, Norith, YuuHai និង Suzana នឹងរួមគ្នាបង្កើតព្រឹត្តិការណ៍ប្រគំតន្ត្រីជាប្រវត្តិសាស្ត្រនៅសាល Salle Pleyel នៅទីក្រុងប៉ារីស ប្រទេស​បារាំង នៅថ្ងៃទី១ ខែធ្នូ ឆ្នាំ២០២៥។
នេះគឺជាការប្រកាសឲ្យមហាជនខ្មែរ និងអន្តរជាតិបានដឹង តាមរយៈសមាគមសិល្បករខ្មែរ, ផលិតកម្ម Baramey Production និង Sabay Events Production (ប្រទេសបារាំង) នៅក្នុងសន្និសីទសារព័ត៌មាន នារសៀលថ្ងៃទី២៧ ខែវិច្ឆិកា ឆ្នាំ២០២៥នេះ ស្ដីពីព្រឹត្តិការណ៍ «Rise for Khmer»។ ព្រឹត្តិការណ៍ប្រគំតន្ត្រីដ៏សំខាន់នេះ នឹងប្រព្រឹត្តទៅនៅសាល Salle Pleyel នាទីក្រុងប៉ារីស ប្រទេស​បារាំង នៅថ្ងៃទី១ ខែ​ធ្នូ ឆ្នាំ២០២៥។

លោកជំទាវ​អ្នកឧកញ៉ា ម៉ៅ ចំណាន​ប្រធាន «សមាគមសិល្បកខ្មែរ» បានថ្លែងថា ក្រោមប្រធានបទ «BARAMEY IN PARIS» ព្រឹត្តិការណ៍វប្បធម៌ដ៏ធំនេះ នឹងនាំយក​តារាចម្រៀង​កម្ពុជា​ ​ដ៏​មានឥទ្ធិពលបំផុតចំនួនប្រាំរូបទៅ​កាន់​​កន្លែងមួយ​ដែល​ពួក​គេ​នឹង​បង្ហាញ​ឱ្យ​ឃើញ​ពីការ​ច្នៃប្រឌិតរបស់​ខ្មែរ ការ​ឯកភាព សាមគ្គីភាព និងក្តីករុណា នៅលើវេទិការវប្បធម៌លំដាប់អន្តរជាតិមួយនៅទ្វីប​អឺរ៉ុប។ «Rise for Khmer» គឺមានន័យ​លើស​ពី​ការប្រគំតន្ត្រី។ វាជាការប្រមូលផ្តុំ​សម្លេងរបស់​ខ្មែរ តាម​រយៈ​សិល្បករ អ្នករៀបចំកម្មវិធី និងសហគមន៍អន្តរជាតិ ដែលរួមគ្នាជាមួយគោលបំណងដូចគ្នា ដើម្បី​អបអរសាទរអត្តសញ្ញាណខ្មែរ, លើកកម្ពស់សិល្បៈ និងតន្ត្រីកម្ពុជាទៅកាន់សកលលោក, ពង្រឹងការ​សាមគ្គី​ភាព និង​លើក​ទឹក​ចិត្តដល់គ្រួសារដែល​រងផលប៉ះពាល់ពីបញ្ហា​ព្រំដែនកាលពី​ពេល​ថ្មីៗនេះ។

លោកជំទាវ​អ្នកឧកញ៉ា​បន្ថែមថា ការចាប់ផ្តើមជាលើក​ដំបូង​នេះនឹង​ឆ្លុះ​បញ្ចាំង​ពីកម្លាំងរបស់ប្រទេសកម្ពុជា ដែលពោរ​ពេញ​ដោយ​ភាព​ច្នៃប្រឌិត ហើយ​កំពុងបន្ត​រីក​លូតលាស់យ៉ាង​អស្ចារ្យ​។ វាក៏ជាកិត្តិយស​មួយ​របស់​សហគមន៍ខ្មែរនៅបរទេស ជាមួយ​នឹង​មោទនភាព និងចង្វាក់​បេះដូងវប្បធម៌របស់ពួកគេកំពុង​ខ្ទរខ្ទារ​នៅ​លើ​ពិភពលោក។ តាមរយៈតន្ត្រី ការដំណាល​រឿង និងសកម្មភាពរួមគ្នា «Rise for Khmer» នឹង​បង្ហាញពីការពិតដ៏អស្ចារ្យ​មួយ ពោលគឺនៅ​ពេល​សិល្បៈនាំមុខ ការរួបរួមនឹងមកតាមក្រោយ។

ជំពូកដ៏​សំខាន់នៃតន្ត្រីខ្មែរសម័យទំនើប
បន្ទាប់ពីការប្រគំតន្ត្រីមិនអាចបំភ្លេចបាននៅក្នុង​ពិធីបិទការប្រកួតអូឡាំពិក Paris 2024 ជាមួយកំពូលតារាចម្រៀង​លំដាប់ពិភព​លោកដូចជា Phoenix, Kavinsky និង Angèle តារាចម្រៀង​កម្ពុជា VannDa នឹង​ត្រៀមត្រឡប់ទៅកាន់ទីក្រុង​ប៉ារីសជាមួយគ្រួសារ Baramey របស់លោក ដែល​ក្នុង​នោះ​រួមមាន Vanthan, Norith, YuuHai និង Suzana។ សម្លេងរួមគ្នារបស់ពួកគេនឹង​តំណាងឱ្យយុគសម័យថ្មីនៃតន្ត្រីកម្ពុជា ដែល​នឹង​បង្ហាញពី​ភាព​ខ្លាំង ប្លែក និងបាន​ចាក់ឫស​យ៉ាង​ជ្រៅក្នុងអត្តសញ្ញាណខ្មែរ។ ការរួមគ្នា​លើ​ឆាក​តន្ត្រី​តែ​មួយ​នេះមិនត្រឹមតែសមិទ្ធផល​សិល្បៈ​តែ​ប៉ុណ្ណោះ​ទេ ប៉ុន្តែជាការរួម​បញ្ចូលគ្នា​​ក្នុង​នាមកម្ពុជា​​ជា​អ្នក​ផ្សព្វ​ផ្សាយ​វប្បធម៌​លើវេទិកា​ពិភព​លោក។

សូមបញ្ជាក់ថា ចាប់តាំងពីឆ្នាំ ១៩២៧ សាល Salle Pleyel បានទទួលស្វាគមន៍ការ​សម្តែង​ដ៏ល្បីល្បាញជាច្រើននៅ​លើ​ពិភព​លោក នៅថ្ងៃទី១ ខែធ្នូ ឆ្នាំ២០២៥, ជាលើកដំបូងក្នុងប្រវត្តិសាស្ត្រ តារាសិល្បៈខ្មែរចំនួនប្រាំ នឹងឈរជាមួយគ្នានៅលើវេទិកាទីនេះ។
អ្វីដែលអ្នកទស្សនានឹងបានឃើញនៅ​ពេល​នោះ មិនមែនត្រឹមតែការប្រគំតន្ត្រីទេ តែ​វាជាការមកដល់​នៃ​វប្បធម៌មួយ។ ជា​ពេលវេលាដែល​មនុស្ស​ជា​ច្រើន​ជំនាន់បានទន្ទឹងរង់ចាំ។ ជាការ​ប្រកាសយ៉ាង​ច្បាស់​ថា សម្លេង ដួង​ព្រលឹង​ និងស្មារតីរបស់ខ្មែរ កំពុង​ឈរ​នៅ​កន្លែងមួយ​ក្នុង​ចំណោមសិល្បៈ​ប្រពៃណី​ដ៏​អស្ចារ្យ​របស់​ពិភព​លោក។

គោលបំណងមនុស្សធម៌រួមគ្នា
«Rise for Khmer» គាំទ្រដោយការប្តេជ្ញាចិត្តរួមក្នុងការងារ​មនុស្សធម៌សម្រាប់សហគមន៍​។ នៅពេលកម្ពុជាកំពុងដោះស្រាយវិបត្តិព្រំដែននា​ពេល​នេះ ព្រឹត្តិការណ៍នេះជាឧបករណ៍មួយក្នុងការរួបរួមប្រជាជន​ខ្មែរនៅ​ជុំវិញពិភពលោក ដើម្បីគាំទ្រគ្នាដោយមានមោទនភាព និងឯកភាព។

លោកជំទាវ​អ្នកឧកញ៉ា ក៏សូមថ្លែង​អំណរគុណ​ដល់ការឧបត្ថម្ភគាំទ្រ ដោយ​សប្បុរស ដែលក្នុង​នោះ​រួម​មាន Platinum Sponsors: Royal Group of Companies និង Chip Mong Land, និង Gold Sponsor: Overseas Cambodian Investment Corporation (OCIC)។ ជាការ​គាំទ្រ​ប្រកបដោយ​អត្ថន័យ ដែល​ប្រាក់ចំណូល​មួយ​ចំណែក​បាន​ពីការប្រគំតន្ត្រី នឹងត្រូវប្រើប្រាស់​សម្រាប់គ្រួសារដែលរងផលប៉ះពាល់ពីវិបត្តិព្រំដែន។ ការរួមចំណែកនេះមិនមែនជាការទ្រទ្រង់ដល់មនុស្សក្រីក្រ ឬសប្បុរសធម៌ទេ វាជាការទទួលខុសត្រូវរួមគ្នា។ វាជាសហគមន៍សិល្បៈខ្មែរ ដែលរួមគ្នាផ្តល់ការជួយ សង្ឃឹម និងការព្យាបាលក្នុងពេលវេលាលំបាក។ តាមរយៈការចាប់ផ្តើម​លើក​ដំបូង​នេះ សិល្បករកម្ពុជា និងស្ថាប័នរបស់​យើង។​

សូមបញ្ជាក់ថា ការ​ច្នៃប្រឌិតនាំមក​នូវ​អំណាច។​ អំណាចក្នុងការលើកកម្ពស់ អំណាចក្នុងការរួបរួម និងអំណាចក្នុងការសាងស្ពានឆ្លងកាត់ទ្វីបដ៏​វែង​ឆ្ងាយ៕