(ភ្នំពេញ)៖ តារាចម្រៀងលោក​ ម៉ារ៉ា​ ប៊ុណ្ណា ដែលត្រូវបានមហាជនស្គាល់លោកថា ជាម្ចាស់ «ដីថ្លៃប្រល័យស្នេហ៍» ហើយបានចូលរួមសម្ដែងភាពយន្តមួយចំនួនទៀតនេះ នៅពេលនេះលោកបានទទួលមរណភាពហើយ ដោយសាជំងឺគាំងបេះដូង នៅព្រឹកថ្ងៃសុក្រ ទី២៨ ខែវិច្ឆិកា​ ឆ្នាំ២០២៥​ នេះ។

យោងតាមសមាគមសិល្បករខ្មែរ បានបញ្ជាក់ឲ្យដឹងថា ក្នុងបរិយាកាសប្រកបដោយក្ដីអាឡោះអាល័យនេះ សូមចូលរួមសម្ដែងនូវសមានទុក្ខប្រកបដោយភាពសោកស្ដាយជាពន់ពេក ចំពោះការបាត់បង់លោក​ ម៉ារ៉ា​ ប៊ណ្ណា​ ដែលជាតារាចម្រៀងដែលបានរួមដំណើរក្នុងវិស័យសិល្ប:ជាច្រើនឆ្នាំមកហើយ។ ជាពិសេសជាការបាត់បង់នូវសាច់ញាតិប្រកបដោយកតញ្ញូតាធម៌ និងសេចក្ដីស្រឡាញ់យ៉ាងជ្រាលជ្រៅចំពោះក្រុមគ្រួសារ។
សូមចូលរួមរំលែកទុក្ខដល់គ្រួសារតារាចម្រៀងលោក​ ម៉ារ៉ា​ ប៊ុណ្ណា​ និងសូមឧទ្ទិសដល់វិញ្ញាណក្ខន្ធរបស់លោក បានទៅកាន់សុគតិភពកុំបីឃ្លៀងឃ្លាតឡើយ។

ម្យ៉ាងទៀត​ ក៏សូមអំពាវនាវដល់បងប្អូនសិល្បករ សិល្បការិនី ទាំងអស់ដែលមាននូវការរាប់អាន ព្រមទាំងញាតិមិត្តជិតឆ្ងាយ មេត្តាអញ្ជើញចូលរួមបុណ្យឈាបនកិច្ចសពលោក​ ម៉ារ៉ា​ ប៊ុណ្ណា​ ឱ្យបានច្រើនកុះករ ដែលសពកំពុងតម្កល់ធ្វើបុណ្យ នៅវត្តពោធិចិនតុង ខណ្ឌពោធិសែនជ័យ ដើម្បីស័ក្ដិសមនឹងកិត្តិនាមល្បីល្បាញរបស់លោក ដែលបានបម្រើអារម្មណ៍មហាជនជាច្រើនឆ្នាំកន្លងមកនេះ។

តាងនាមថ្នាក់ដឹកនាំ​ ក្រុមការងារ​ សមាជិក​ សមាជិកាទាំងអស់​ នៃសមាគមសិល្បករខ្មែរ​ យើងខ្ញុំទាំងអស់គ្នា​ ពិតជាមានសេចក្ដីរន្ធត់​ តក់ស្លុត​ប្រកបដោយក្ដីក្រៀមក្រំជាទីបំផុត​ ដោយទទួលដំណឹងថា​ តារាចម្រៀងលោក​ ម៉ារ៉ា​ ប៊ុណ្ណា ស្លាប់ដោយសារជំងឺគាំងបេះដូង៕