https://image.freshnewsasia.com/2021/2025/12/fn-2025-12-02-03-50-46-556.jpg(បរទេស)៖ ក្រសួងទូរគមនាគមន៍ឥណ្ឌាបានចេញបទបញ្ជាជាសម្ងាត់ទៅកាន់ក្រុមហ៊ុនផលិតស្មាតហ្វូនធំៗលើពិភពលោក រួមមាន Apple, Samsung, Vivo, Oppo និង Xiaomi ឲ្យដំឡើងជាមុននូវកម្មវិធីសុវត្ថិភាពតាមអ៊ីនធឺណិតដែលគ្រប់គ្រងដោយរដ្ឋាភិបាលឥណ្ឌា។ ចំណុចសំខាន់នៃបទបញ្ជានេះគឺ អ្នកប្រើប្រាស់មិនអាចបិទ ឬលុបកម្មវិធីដែលមានឈ្មោះថា Sanchar Saathi នេះចេញពីទូរស័ព្ទបានឡើយ ពោលគឺត្រូវតែដំឡើង។ ខណៈក្រុមហ៊ុនទាំងអស់ត្រូវបានផ្តល់ពេលត្រឹមតែ ៩០ ថ្ងៃ ប៉ុណ្ណោះដើម្បីអនុវត្តតាម។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០១​ ខែធ្នូ​ ឆ្នំា២០២៥។

រដ្ឋាភិបាលឥណ្ឌាបានអះអាងថា ការធ្វើបែបនេះគឺមានសារៈសំខាន់បំផុតក្នុងការទប់ស្កាត់ «ការគំរាមកំហែងធ្ងន់ធ្ងរ» ចំពោះសន្តិសុខតាមរយៈការក្លែងបន្លំលេខសម្គាល់ទូរស័ព្ទ (IMEI) ដែលអាចនាំឱ្យមានការបោកប្រាស់តាមបណ្តាញ network។ ទោះបីជាយ៉ាងណាក៏ដោយ កម្មវិធីនេះក៏មានប្រយោជន៍ផងដែរ ដោយតួលេខបានបង្ហាញថា វាបានជួយរកទូរស័ព្ទដែលបាត់បង់បានជាង ៧០ ម៉ឺនគ្រឿង រួចមកហើយ តាំងពីដាក់ឱ្យប្រើប្រាស់ដំបូង។

យ៉ាងណាមិញ បទបញ្ជានេះទំនងជានឹងបង្កភាពតានតឹងយ៉ាងខ្លាំងជាមួយក្រុមហ៊ុន Apple និងក្រុមអ្នកតស៊ូមតិផ្នែកឯកជនភាព ដោយសារតែការដំឡើងកម្មវិធីរដ្ឋដែលមិនអាចលុបបានបែបនេះអាចបង្កជាកង្វល់ផ្នែកតាមដានអ្នកប្រើប្រាស់។ ទោះបីជាមានភាពចម្រូងចម្រាសក៏ដោយ ក្រុមហ៊ុនទាំងនេះត្រូវតែអនុវត្តតាម ដោយសារប្រទេសឥណ្ឌាជាទីផ្សារទូរស័ព្ទដ៏ធំមួយដែលមានអតិថិជនប្រមាណជាង ១,២ ពាន់លាននាក់ឯណោះ៕