(ភ្នំពេញ)៖ ប្រតិភូកីឡាកម្ពុជាចុងក្រោយ ៣រូប ដឹកនាំដោយលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) បានត្រឡប់មកមាតុភូមិវិញហើយ នៅរសៀលថ្ងៃទី១១ ខែធ្នូ ឆ្នាំ២០២៥ នេះ បន្ទាប់ពីកម្ពុជា បានប្រកាសដកខ្លួន និងត្រឡប់មកមាតុភូមិវិញភ្លាមៗ ពីព្រឹត្តិការណ៍ស៊ីហ្គេម លើកទី៣៣ នៅប្រទេសថៃ។

គួរដឹងថា ស្របពេលមានភាពតានតឹងខ្លាំង នៅតាមព្រំដែន បន្ទាប់ពីយោធាថៃ បើកការបាញ់ប្រហារទាំងកំរោលមកលើកងកម្លាំង និងជនស៊ីវិល របស់កម្ពុជា គិតពីល្ងាចថ្ងៃទី៧ រហូតដល់ពេលនេះ ។ ការណ៍នេះ ដោយសារការព្រួយបារម្ភពីសុវត្ថិភាព របស់ក្រុមគ្រួសារប្រតិភូកីឡាកម្ពុជា NOCC ក៏បានជូនដំណឹងទៅកាន់ក្រុមប្រឹក្សាកីឡាអាស៊ីអាគ្នេយ៍ និងគណៈកម្មការរៀបចំស៊ីហ្គេម ឆ្នាំ២០២៥ អំពីការសម្រេចចិត្តដកខ្លួន និងត្រឡប់មកមាតុភូមិវិញ ភ្លាមៗ កាលពីថ្ងៃពុធម្សិលមិញ។ ការដកខ្លួននេះ ក៏ត្រូវបានអាស៊ានគោរពតាមការសម្រេចចិត្តរបស់កម្ពុជាផងដែរ។

ក្រោយការប្រកាសដកខ្លួននេះដែរ នៅថ្ងៃដដែល ប្រតិភូ គ្រូបង្វឹក និងកីឡាករ-កីឡាការិនី ៧៨រូប បានធ្វើដំណើរមកដល់មាតុភូមិវិញ ដោយសុវត្ថិភាព គិតត្រឹមយប់ថ្ងៃទី១០ ខែធ្នូ គ្រាដែលប្រតិភូកីឡាកម្ពុជា ៣រូបចុងក្រោយ រួមមានលោក វ៉ាត់ ចំរើន និងមន្ដ្រី ២រូប បានធ្វើដំណើរមកដល់មាតុភូមិវិញក្រោយគេ នៅរសៀលថ្ងៃទី១១ ខែធ្នូ ឆ្នាំ២០២៥ នេះ៕