(បរទេស)៖ ក្រុមហ៊ុនផលិតបន្ទះឈីបដ៏មានឥទ្ធិពលបំផុតលើពិភពលោកគឺ Nvidia កំពុងពិចារណាលើការបង្កើនសមត្ថភាពផលិតបន្ទះឈីបបញ្ញាសិប្បនិម្មិត (AI) ប្រភេទ H200 របស់ខ្លួនយ៉ាងគំហុក បន្ទាប់ពីទទួលបានការបញ្ជាទិញច្រើនលើសលប់ពីសំណាក់អតិថិជនជនជាតិចិន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៥ ខែធ្នូ ឆ្នាំ២០២៥។

ការសម្រេចចិត្តនេះបានកើតឡើងភ្លាមៗ បន្ទាប់ពីប្រធានាធិបតីអាមេរិកលោក ដូណាល់ ត្រាំ បានប្រកាសអនុញ្ញាតឱ្យក្រុមហ៊ុន Nvidia នាំចេញបន្ទះឈីបល្បឿនលឿនលំដាប់ទីពីរនេះទៅកាន់ទីផ្សារចិនជាផ្លូវការ។ អ្វីដែលគួរឱ្យចាប់អារម្មណ៍នោះគឺ ការអនុញ្ញាតនេះតម្រូវឱ្យក្រុមហ៊ុនបង់ថ្លៃសេវាដល់ទៅ ២៥% លើការលក់ ប៉ុន្តែទោះបីជាមានការជាប់កម្រៃដ៏ច្រើននេះក៏ដោយ តម្រូវការពីក្រុមហ៊ុនយក្សចិនដូចជា Alibaba និង ByteDance នៅតែខ្លាំងក្លា រហូតដល់ Nvidia ទំនងជានឹងបន្ថែមខ្សែសង្វាក់ផលិតកម្មថ្មី។

ទោះបីជាមានការអនុញ្ញាតភ្លើងខៀវពីសហរដ្ឋអាមេរិកក៏ដោយ ក៏ភាពមិនប្រាកដប្រជានៅតែមាននៅលើទីផ្សារគោលដៅ។ បច្ចុប្បន្ន រដ្ឋាភិបាលចិនមិនទាន់បានអនុញ្ញាតជាផ្លូវការឱ្យមានការទិញបន្ទះឈីប H200 នៅឡើយទេ ហើយមន្ត្រីចិនបានបើកកិច្ចប្រជុំបន្ទាន់ដើម្បីពិភាក្សា និងសម្រេចចិត្តលើបញ្ហានេះ ដែលបង្កឱ្យមានការរង់ចាំយ៉ាងអន្ទះសារពីសំណាក់ក្រុមហ៊ុនចិន។

ឆ្លើយតបនឹងក្តីបារម្ភអំពីការផ្គត់ផ្គង់សកល អ្នកនាំពាក្យរបស់ Nvidia បានធានាទៅកាន់ Reuters ថា៖ «យើងកំពុងគ្រប់គ្រងខ្សែសង្វាក់ផ្គត់ផ្គង់របស់យើង ដើម្បីធានាថាការលក់ដែលមានអាជ្ញាប័ណ្ណនៃបន្ទះឈីប H200 ទៅកាន់អតិថិជនដែលមានការអនុញ្ញាតនៅក្នុងប្រទេសចិននឹងមិនមានផលប៉ះពាល់ដល់សមត្ថភាពរបស់យើងក្នុងការផ្គត់ផ្គង់អតិថិជននៅក្នុងសហរដ្ឋអាមេរិកនោះទេ»។ បន្ថែមពីនេះ ក្រុមហ៊ុននៅតែបន្តផ្តោតសំខាន់លើការផលិតបន្ទះឈីបជំនាន់ថ្មីបំផុតរបស់ខ្លួន គឺ Blackwell និង Rubin ដែលនឹងចេញមកឆាប់ៗនេះ៕