(បរទេស)៖ ក្រុមហ៊ុន OpenAI បាន​ប្រកាស​ពី​ការ​តែងតាំង​ដ៏​សំខាន់​មួយ ដោយ​បាន​ជួល​លោក Albert Lee ដែល​ជា​អតីត​នាយក​ជាន់ខ្ពស់​ជើងចាស់​ផ្នែក​ពង្រីក​អាជីវកម្ម​សាជីវកម្ម​ពី​ក្រុមហ៊ុន Google។ លោក Lee នឹង​កាន់​តំណែង​ជា​អនុប្រធាន​ផ្នែក​អភិវឌ្ឍន៍​សាជីវកម្ម (VP of Corporate Development) ដែល​ជា​តួនាទី​ទទួល​ខុសត្រូវ​លើ​ការ​វិនិយោគ​ធំៗ និង​ការ​បង្កើត​ភាព​ជា​ដៃគូ​យុទ្ធសាស្ត្រ​សំខាន់ៗ។ លោក​នឹង​ត្រូវ​រាយការណ៍​ផ្ទាល់​ទៅកាន់​ប្រធាន​ផ្នែក​ហិរញ្ញវត្ថុ​របស់ OpenAI គឺ​លោកស្រី Sarah Friar។ នេះបើយោងតាមការចេញផ្សាយដោយ CNA នៅថ្ងៃទី១៦ ខែធ្នូ ឆ្នាំ២០២៥។

អ្នកនាំពាក្យ​របស់ OpenAI បាន​ពន្យល់​អំពី​មូលហេតុ​នៃ​ការ​ជួល​អ្នកជំនាញ​រូបនេះ​ទៅកាន់​ទីភ្នាក់ងារសារព័ត៌មាន Reuters ថា គឺ «ដើម្បី​ធានា​ថា យើង​មាន​មេដឹកនាំ​ជាន់ខ្ពស់​ម្នាក់​ដែល​មាន​ទស្សនវិស័យ​ទូលំទូលាយ​នៅ​ទូទាំង​ក្រុមហ៊ុន ហើយ​មាន​សិទ្ធិ​អំណាច​ក្នុង​ការ​ចាត់វិធានការ​យ៉ាង​ឆាប់រហ័ស»។ ក្នុងអំឡុងពេល​បម្រើ​ការងារ​ជាង​មួយ​ទសវត្សរ៍​នៅ Google លោក Lee ទទួល​បន្ទុក​ដឹកនាំ​ការងារ​អភិវឌ្ឍន៍​សម្រាប់​ផ្នែក​បច្ចេកវិទ្យា​ធំៗ​ដូចជា Google Cloud និង DeepMind (ក្រុមហ៊ុន AI របស់ Google)។ គួរ​កត់​សម្គាល់​ថា តាម​ប្រវត្តិរូប​ផ្ទាល់​របស់​លោក លោក Lee បាន​ចូលរួម​ក្នុង​ប្រតិបត្តិការ​ទិញ​យក និង​ការ​វិនិយោគ​យុទ្ធសាស្ត្រ​ជាង ៦០ ដែល​មាន​តម្លៃ​សរុប​លើស​ពី ៥០ ពាន់​លាន​ដុល្លារ។

គួរជម្រាបថា ការ​តែងតាំង​លោក Lee នេះ​បាន​​កើត​ឡើង​បន្ទាប់ពី​ការ​ពង្រឹង​ក្រុម​អ្នកដឹកនាំ​ជា​បន្តបន្ទាប់​របស់ OpenAI ដើម្បី​ត្រៀម​ពង្រីក​អាជីវកម្ម​របស់​ខ្លួន​នៅ​ទូទាំង​ពិភពលោក។ កាលពី​ខែ​មុន ក្រុមហ៊ុន​បាន​ជួល​លោក Torben Severson អតីត​នាយក​ប្រតិបត្តិ Amazon មក​ជា​ប្រធាន​ផ្នែក​អភិវឌ្ឍន៍​អាជីវកម្ម​សកល ហើយ​កាលពី​ខែ​កញ្ញា ក៏បាន​ជួល​លោក Mike Liberatore អតីត​ប្រធាន​ផ្នែក​ហិរញ្ញវត្ថុ​របស់​ក្រុមហ៊ុន xAI របស់ Elon Musk មក​កាន់​ក្រុម​ការងារ​ហិរញ្ញវត្ថុ​អាជីវកម្ម​ផងដែរ។ ការ​ផ្លាស់ប្តូរ​នេះ​បង្ហាញ​ពី​ការ​ប្តេជ្ញាចិត្ត​របស់ OpenAI ក្នុង​ការ​ពង្រឹង​សមត្ថភាព​ដឹកនាំ​របស់​ខ្លួន​ឲ្យ​កាន់តែ​ខ្លាំងក្លា​ក្នុង​ទីផ្សារ AI ដែល​កំពុង​រីកចម្រើន៕