(រដ្ឋកាលីហ្វ័រញ៉ា)៖ ក្រុមហ៊ុន ByteDance ដែលជាម្ចាស់កម្មវិធី TikTok បានប្រកាសជាផ្លូវការកាលពីថ្ងៃព្រហស្បតិ៍ ទី១៨ ខែធ្នូ ឆ្នាំ២០២៥ថា ខ្លួនបានចុះហត្ថលេខា​លើកិច្ចព្រមព្រៀង​ជាមួយវិនិយោគិនធំៗចំនួន ៣ ដើម្បីបង្កើតក្រុមហ៊ុនបណ្តាក់ទុនរួមគ្នា (Joint Venture) ថ្មីមួយសម្រាប់គ្រប់គ្រង TikTok នៅក្នុងសហរដ្ឋអាមេរិក។ ជំហានដ៏សំខាន់នេះ ធ្វើឡើងក្នុងគោលបំណងបញ្ចប់វិវាទ និងការគំរាមកំហែងបិទកម្មវិធីនេះ​ពីសំណាក់រដ្ឋាភិបាលអាមេរិកដែលបានអូសបន្លាយពេលជាច្រើនឆ្នាំ។

យោងតាមអនុស្សរណៈផ្ទៃក្នុងរបស់លោក Shou Zi Chew នាយកប្រតិបត្តិ TikTok បានឱ្យដឹងថា ក្រុមហ៊ុនថ្មីដែលនឹងត្រូវបង្កើតឡើងមានឈ្មោះថា «TikTok USDS Joint Venture LLC» ដោយមានការបែងចែកភាគហ៊ុនដូចតទៅ៖ ទី១ ភាគហ៊ុនចំនួន ៨០.១% ត្រូវបានកាន់កាប់ដោយវិនិយោគិនអាមេរិក និងសកល ក្នុងនោះ​មាន​ក្រុមហ៊ុន Oracle, Silver Lake និងក្រុមហ៊ុន MGX មកពីទីក្រុងអាប៊ូដាប៊ី កាន់កាប់ម្នាក់ ១៥%។ ទី២ ភាគហ៊ុនចំនួន ១៩.៩% នឹងត្រូវរក្សាទុកដោយក្រុមហ៊ុនមេ ByteDance ខណៈកិច្ចព្រមព្រៀងនេះត្រូវបានរំពឹងថានឹងត្រូវបញ្ចប់ជាស្ថាពរនៅថ្ងៃទី ២២ ខែមករា ឆ្នាំ២០២៦ ខាងមុខនេះ។

លោក Shou Zi Chew បានបញ្ជាក់ប្រាប់បុគ្គលិកថា ក្រុមហ៊ុនបណ្តាក់ទុនរួមគ្នានេះនឹង «ដំណើរការជាអង្គភាពឯករាជ្យ» ដែលមានអំណាចពេញលេញលើ៖ ទី១ គឺ ការការពារទិន្នន័យអ្នកប្រើប្រាស់អាមេរិក។ ទី២គឺ សុវត្ថិភាពនៃក្បួនដោះស្រាយ (Algorithm)។ ទី៣ គឺការត្រួតពិនិត្យខ្លឹមសារ (Content Moderation) និងទី៤​ គឺ និងការធានាលើសុវត្ថិភាពផ្នែកទន់ (Software)។

ក្រុមហ៊ុន Oracle នឹងដើរតួជាដៃគូសន្តិសុខបច្ចេកវិទ្យា ដោយរាល់ទិន្នន័យអ្នកប្រើប្រាស់អាមេរិកជាង ១៧០ លាននាក់ នឹងត្រូវរក្សាទុកក្នុងប្រព័ន្ធផ្ទុកទិន្នន័យរបស់ Oracle នៅក្នុងសហរដ្ឋអាមេរិកផ្ទាល់។

កិច្ចព្រមព្រៀងនេះកើតឡើងបន្ទាប់ពីប្រធានាធិបតី ដូណាល់ ត្រាំ បានប្រើប្រាស់អំណាចប្រតិបត្តិដើម្បីពន្យារពេលការបិទ TikTok និងជំរុញឱ្យមានការលក់អាជីវកម្មនេះទៅឱ្យជនជាតិអាមេរិក។ លោក ត្រាំ ក៏បានទទួលស្គាល់ផងដែរថា TikTok បានដើរតួយ៉ាងសំខាន់ក្នុងការជួយឱ្យលោកឈ្នះការបោះឆ្នោតកាលពីឆ្នាំមុន ដោយសារលោកមានអ្នកតាមដានជាង ១៥ លាននាក់នៅលើគណនីផ្ទាល់ខ្លួន។

លោក Shou Zi Chew បានសរសេរក្នុងអនុស្សរណៈថា៖ «ការចុះហត្ថលេខានេះ នឹងអនុញ្ញាតឱ្យជនជាតិអាមេរិកជាង ១៧០ លាននាក់ បន្តស្វែងរកពិភពលោកដែលមានលទ្ធភាពមិនចេះរីងស្ងួត ដែលជាផ្នែកមួយនៃសហគមន៍សកលដ៏សំខាន់»។

ទោះបីជាយ៉ាងណាក៏ដោយ អ្នកនយោបាយមួយចំនួននៅតែមានការមន្ទិល និងគ្រោងនឹងកោះហៅថ្នាក់ដឹកនាំថ្មីរបស់ TikTok មកសាកសួរនៅក្នុងសភាបន្តទៀតនៅឆ្នាំ ២០២៦ ដើម្បីធានាថា ByteDance ពិតជាមិនមានឥទ្ធិពលលើក្បួនដោះស្រាយ និងទិន្នន័យរបស់ពលរដ្ឋអាមេរិកពិតប្រាកដមែន៕