(បរទេស)៖ ក្រុមហ៊ុនបច្ចេកវិទ្យាយក្ស OpenAI បានប្រកាសជាផ្លូវការនូវការដាក់ឱ្យដំណើរការ GPT Store (ឬហៅសាមញ្ញថា App Store របស់ ChatGPT) ដែលជាការបោះជំហានដ៏ធំមួយក្នុងការប្រែក្លាយ ChatGPT ពីប្រព័ន្ធសន្ទនាធម្មតា ឱ្យទៅជា «ប្រព័ន្ធអេកូឡូស៊ី» នៃកម្មវិធីឆ្លាតវៃលំដាប់ពិភពលោក។

បច្ចុប្បន្ន អ្នកប្រើប្រាស់អាចចូលទៅកាន់ «បញ្ជីកម្មវិធី» (App Directory) នៅក្នុងម៉ឺនុយឧបករណ៍របស់ ChatGPT ដើម្បីស្វែងរកកម្មវិធីរាប់លានដែលបង្កើតឡើងដោយដៃគូសហការ និងអ្នកអភិវឌ្ឍន៍ទូទាំងពិភពលោក។ ក្នុងនោះមានកម្មវិធីល្បីៗជាច្រើនបានចូលរួមរួចជាស្រេចដូចជា៖

* Canva៖ សម្រាប់ជួយរចនារូបភាព និង Slide កិច្ចការងារ។
* Expedia & Zillow៖ សម្រាប់ជួយរៀបចំគម្រោងធ្វើដំណើរ និងស្វែងរកអចលនទ្រព្យ។
* Consensus៖ សម្រាប់ស្វែងរក និងសង្ខេបឯកសារស្រាវជ្រាវវិទ្យាសាស្ត្រ។

តាមរយៈឧបករណ៍ថ្មីដែលហៅថា Apps SDK (ដំណាក់កាល Beta) OpenAI បានបើកផ្លូវឱ្យអ្នកបច្ចេកទេសអាចបង្កើតមុខងារដែលមានអន្តរកម្មខ្ពស់។ អ្វីដែលកាន់តែពិសេសនោះ ក្រុមហ៊ុនក៏បានបង្ហើបពីកម្មវិធី «GPT Builder Revenue Program» ដែលអនុញ្ញាតឱ្យអ្នកបង្កើតកម្មវិធីអាចរកចំណូលបាន ផ្អែកលើកម្រិតនៃប្រជាប្រិយភាពនៃការប្រើប្រាស់កម្មវិធីរបស់ពួកគេ។ នេះគឺជាការជំរុញទឹកចិត្តដល់អ្នកអភិវឌ្ឍន៍ ក្នុងការបង្កើតឧបករណ៍ដែលមានប្រយោជន៍កាន់តែច្រើនសម្រាប់មហាជន។

គួរជម្រាបថា គោលដៅចម្បងនៃគំនិតផ្ដួចផ្ដើមនេះ គឺដើម្បីពង្រីកសមត្ថភាពរបស់ ChatGPT ឱ្យលើសពីការឆ្លើយសំណួរធម្មតា។ កាលពីមុន មុខងារនេះត្រូវបានកំណត់សម្រាប់តែអ្នកប្រើប្រាស់បង់ប្រាក់ប៉ុណ្ណោះ ប៉ុន្តែបច្ចុប្បន្ន OpenAI បានបើកសិទ្ធិឱ្យ អ្នកប្រើប្រាស់ឥតគិតថ្លៃ ក៏អាចទទួលបានបទពិសោធន៍ពីកម្មវិធីទាំងនេះបានដែរ។ ការផ្លាស់ប្តូរនេះនឹងធ្វើឱ្យ ChatGPT ក្លាយជា «ជំនួយការចម្រុះមុខងារ» ដែលអាចដោះស្រាយរាល់តម្រូវការប្រចាំថ្ងៃរបស់មនុស្សគ្រប់គ្នា ក្នុងកម្មវិធីតែមួយ៕