(បរទេស)៖ ក្រុមហ៊ុន Foxtron ដែលជាការចាប់ដៃគ្នារវាងក្រុមហ៊ុនផលិត iPhone គឺ Foxconn និងក្រុមហ៊ុនឡានលំដាប់លេខមួយរបស់តៃវ៉ាន់ Yulon Motor បានទាក់ទាញការចាប់អារម្មណ៍យ៉ាងខ្លាំង ក្រោយប្រកាសចេញរថយន្តអគ្គិសនីម៉ូដែលថ្មីសន្លាងឈ្មោះថា «Bria»។ រថយន្តនេះនឹងត្រូវដាក់លក់ក្នុងតម្លៃចន្លោះពី ២៨,៦០០ ដុល្លារ ដល់ ៣៦,៥៤០ ដុល្លារ ដែលជាកម្រិតតម្លៃប្រកួតប្រជែងខ្លាំងក្នុងទីផ្សាររថយន្តអគ្គិសនី (EV) បច្ចុប្បន្ន។ នេះបើយោងតាមការចេញផ្សាយដោយ CNA នៅថ្ងៃទី២៥ ខែធ្នូ ឆ្នាំ២០២៥។

ភាពជោគជ័យនេះ កើតចេញពីការរួមបញ្ចូលគ្នានូវបច្ចេកវិទ្យាដ៏ទំនើបរបស់ Foxconn ជាមួយបទពិសោធន៍ផលិតរថយន្តជាង ៧០ ឆ្នាំរបស់ Yulon Motor។ ក្នុងរយៈពេលត្រឹមតែ ៥ ឆ្នាំ ក្រុមហ៊ុនបានប្រែក្លាយខ្លួនពីអ្នកផលិតគ្រឿងអេឡិចត្រូនិច ទៅជាអ្នកដើរតួអង្គសំខាន់ក្នុងឧស្សាហកម្មយានយន្ត រហូតទទួលបានការកោតសរសើរពីអ្នកជំនាញថាជា «អ្នកផ្លាស់ប្តូរហ្គេម» (Game Changer) នៅក្នុងទីផ្សារអាស៊ី។

លោក Young Liu ប្រធានក្រុមហ៊ុន Foxconn បានសង្កត់ធ្ងន់ពីចក្ខុវិស័យរបស់ខ្លួនថា៖ «គោលដៅរបស់យើងគឺធ្វើឱ្យបច្ចេកវិទ្យារថយន្តអគ្គិសនី ក្លាយជាជម្រើសសម្រាប់មនុស្សគ្រប់គ្នា មិនមែនត្រឹមតែជាទំនិញប្រណីតនោះទេ»។ សម្ដីនេះឆ្លុះបញ្ចាំងពីការប្តេជ្ញាចិត្តរបស់ក្រុមហ៊ុន ក្នុងការនាំយកបច្ចេកវិទ្យាកម្រិតខ្ពស់មកដាក់ក្នុងតម្លៃសមរម្យបំផុតសម្រាប់អ្នកប្រើប្រាស់ទូទៅ។

តាមរយៈម៉ូដែល Bria នេះ Foxtron មិនត្រឹមតែចង់លក់រថយន្តប៉ុណ្ណោះទេ ប៉ុន្តែពួកគេកំពុងបង្ហាញពិភពលោកនូវ «គំរូយោង» ដែលក្រុមហ៊ុនផ្សេងទៀតអាចយកទៅប្រើប្រាស់បាន។ នេះគឺជាយុទ្ធសាស្ត្ររុញច្រានឱ្យតៃវ៉ាន់ ក្លាយជាមជ្ឈមណ្ឌលផលិតរថយន្តអគ្គិសនីពិភពលោកនាពេលអនាគតដ៏ខ្លីខាងមុខនេះ៕