ចិន រំពឹងថាមានដំណោះស្រាយស្របច្បាប់ និងតុល្យភាព សម្រាប់កិច្ចសន្យា TikTok នៅអាមេរិក
26-12-2025 10:11
(បរទេស)៖ រដ្ឋាភិបាលចិន បានថ្លែងថា ក្រុមហ៊ុនដែលពាក់ព័ន្ធក្នុងកិច្ចព្រមព្រៀង TikTok នឹងរកដំណោះស្រាយ ដែលគោរពតាមច្បាប់របស់ចិន និងយកចិត្តទុកដាក់ចំពោះផលប្រយោជន៍រួមរបស់គ្រប់ភាគី នៅពេល TikTok បន្តដំណើរការដោយមានទំនុកចិត្តនៅទីផ្សារអាមេរិក។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី២៦ ខែធ្នូ ឆ្នាំ២០២៥។
កិច្ចសន្យានេះកើតឡើង បន្ទាប់ពី ByteDance ម្ចាស់កម្មវិធីវីដេអូខ្លីៗ TikTok បានចុះហត្ថលេខាលើកិច្ចព្រមព្រៀងជាមួយក្រុមហ៊ុនវិនិយោគជាផ្លូវការមួយ ដែលរួមមានក្រុមហ៊ុន Oracle ដើម្បីផ្ទេរការគ្រប់គ្រងប្រតិបត្តិការ Tik Tok នៅអាមេរិក និងបញ្ឈប់ការហាមឃាត់ TikTok នៅសហរដ្ឋអាមេរិក។
អ្នកនាំពាក្យក្រសួងពាណិជ្ជកម្មចិន លោកស្រី He Yongqian បាននិយាយក្នុងសន្និសីទសារព័ត៌មានមួយ ដោយសង្ឃឹមថា ភាគីសហរដ្ឋអាមេរិកនឹងធ្វើការជាមួយប្រទេសចិនក្នុងទិសដៅដូចគ្នា បំពេញការប្តេជ្ញាចិត្តរបស់ខ្លួនដោយស្មោះត្រង់ ផ្តល់បរិយាកាសអាជីវកម្មដ៏យុត្តិធម៌ បើកចំហ មានតម្លាភាព និងមិនរើសអើងសម្រាប់ប្រតិបត្តិការជាបន្តបន្ទាប់ និងមានស្ថិរភាពរបស់សហគ្រាសចិននៅសហរដ្ឋអាមេរិក៕
