(បរទេស)៖ ការពិសោធន៍តាមការគិត (Thought Experiment) មួយបានបង្ហាញឱ្យឃើញពីទំហំទ្រព្យសម្បត្តិដ៏លើសលប់របស់​មហាសេដ្ឋីសម័យទំនើប៖ ប្រសិនបើលោក Elon Musk ចាយលុយអស់ ១ លានដុល្លារ ជារៀងរាល់ថ្ងៃ នោះលោកត្រូវចំណាយ​ពេលប្រហែល ២០៤០ឆ្នាំ ទើបអាចប្រើប្រាស់ទ្រព្យសម្បត្តិទាំងអស់នោះអស់។

តួលេខនេះបានរុញច្រានការយល់ដឹងអំពីការចំណាយ ការសន្សំ ឬការរៀបចំថវិកាធម្មតា ឱ្យទៅជាអ្វីមួយដែលស្ទើរតែមិនគួរឱ្យជឿ។

ការចាយ ១ លានដុល្លារក្នុងមួយថ្ងៃ មានន័យថាត្រូវចាយប្រហែល ៣៦៥ លានដុល្លារក្នុងមួយឆ្នាំ។ ក្នុងរយៈពេល ១០០ ឆ្នាំ ចំនួនទឹកប្រាក់ដែលចាយអស់គឺ ៣៦,៥ ប៊ីលានដុល្លារ។ ចំនួននេះស្តាប់ទៅហាក់ដូចជាច្រើនមហាសាលសម្រាប់មនុស្សទូទៅ ប៉ុន្តែវាគ្រាន់តែជា «ចំណែកដ៏តូចមួយ» នៃទ្រព្យសម្បត្តិសរុបរបស់ Elon Musk ប៉ុណ្ណោះ។

ក្នុងជាក់ស្ដែង ទ្រព្យសម្បត្តិរបស់លោកអាចមានការប្រែប្រួលឡើងចុះ «រាប់ប៊ីលានដុល្លារ» ក្នុងរយៈពេលតែមួយថ្ងៃប៉ុណ្ណោះ អាស្រ័យលើទីផ្សារភាគហ៊ុន ដែលធ្វើឱ្យការចាយលុយ ១ លានដុល្លារក្នុងមួយថ្ងៃ ក្លាយជារឿងមិនសូវសំខាន់សម្រាប់លោក។

អ្វីដែលធ្វើឱ្យសេណារីយ៉ូនេះគួរឱ្យចាប់អារម្មណ៍ មិនមែនជាការចាយវាយខ្ជះខ្ជាយនោះទេ ប៉ុន្តែគឺជា «សមាមាត្រ»។ ទី១ របៀបរស់នៅ៖ ការចាយវាយកម្រិតនេះអាចធ្វើឱ្យនរណាម្នាក់ផ្សេងទៀតក្ស័យធនភ្លាមៗ ប៉ុន្តែសម្រាប់កម្រិតទ្រព្យសម្បត្តិរបស់ Musk វាស្ទើរតែមិនមានផលប៉ះពាល់អ្វីទាំងអស់។​ទី២ និយមន័យថ្មីនៃលុយ៖ នៅកម្រិតនេះ លុយលែងមានមុខងារជា «ចំណូលផ្ទាល់ខ្លួន» ទៀតហើយ ប៉ុន្តែវាដំណើរការជា «អំណាចរចនាសម្ព័ន្ធ» ដែលផ្សារភ្ជាប់ទៅនឹងកម្មសិទ្ធិ ទីផ្សារ និងឥទ្ធិពលរយៈពេលវែង។

នៅពេលដែលទ្រព្យសម្បត្តិរបស់បុគ្គលម្នាក់អាចចាយវាយឆ្លងកាត់រាប់សហស្សវត្សរ៍ និយមន័យនៃពាក្យថា «អ្នកមាន» លែងជារឿងបុគ្គលទៀតហើយ ប៉ុន្តែវាបានក្លាយជារឿងប្រវត្តិសាស្ត្រ។ វាក៏បង្ខំឱ្យសង្គមត្រូវគិតសារជាថ្មីអំពីដែនកំណត់នៃទ្រព្យសម្បត្តិ តម្លៃ និងការទទួលខុសត្រូវក្នុងយុគសម័យទំនើបនេះ។

ទ្រព្យសម្បត្តិភាគច្រើនលើសលប់របស់ Elon Musk មិនមែនជាប្រាក់ខែប្រចាំខែនោះទេ ប៉ុន្តែគឺជា «កម្មសិទ្ធិភាគហ៊ុន» នៅក្នុងក្រុមហ៊ុនបច្ចេកវិទ្យាកំពូលៗដែលលោកបានបង្កើត និងដឹកនាំ។ ទី១ Tesla ក្រុមហ៊ុនផលិតរថយន្តអគ្គិសនី)៖ នេះគឺជាប្រភពទ្រព្យសម្បត្តិធំជាងគេបង្អស់របស់លោក។ Musk កាន់កាប់ភាគហ៊ុនប្រហែល ១៣% នៃក្រុមហ៊ុន Tesla។ នៅពេលដែលតម្លៃភាគហ៊ុន Tesla កើនឡើងក្នុងទីផ្សារ ទ្រព្យសម្បត្តិរបស់លោកក៏ហក់ឡើងរាប់ប៊ីលានដុល្លារក្នុងពេលតែមួយ។ ទី២ SpaceX ក្រុមហ៊ុនបច្ចេកវិទ្យាអវកាស)៖ លោកកាន់កាប់ភាគហ៊ុនប្រហែល ៤២% នៃក្រុមហ៊ុននេះ។ SpaceX គឺជាក្រុមហ៊ុនឯកជនដែលមានតម្លៃបំផុតមួយក្នុងលោក ដែលផ្ដល់សេវាកម្មបង្ហោះផ្កាយរណប និងដឹកជញ្ជូនទៅកាន់លំហអាកាស។ ទី៣ xAI ក្រុមហ៊ុនបញ្ញាសិប្បនិម្មិត៖ ជាក្រុមហ៊ុនថ្មីបំផុតដែលកំពុងទាក់ទាញការវិនិយោគរាប់ប៊ីលានដុល្លារ។ ការផ្ទុះឡើងនៃបច្ចេកវិទ្យា AI ក្នុងឆ្នាំ ២០២៥ បានធ្វើឱ្យតម្លៃក្រុមហ៊ុននេះហក់ឡើងខ្ពស់ ដែលជាកត្តារុញច្រានទ្រព្យសម្បត្តិលោក Musk ឱ្យលើសពី ៥០០ ប៊ីលានដុល្លារ។ ទី៤ X (អតីត Twitter)៖ ទោះបីជាតម្លៃរបស់វាមានការធ្លាក់ចុះខ្លះចាប់តាំងពីការទិញយក ប៉ុន្តែវានៅតែជាទ្រព្យសកម្មយុទ្ធសាស្ត្រដ៏សំខាន់សម្រាប់ឥទ្ធិពលសកលរបស់លោក។ ទី៥ ក្រុមហ៊ុនផ្សេងៗ រួមមាន The Boring Company (ជីករូងក្រោមដី) និង Neuralink (បច្ចេកវិទ្យាភ្ជាប់ខួរក្បាលជាមួយកុំព្យូទ័រ)។

ចំណុចដែលគួរឱ្យចាប់អារម្មណ៍បំផុតនោះគឺ Musk ធ្លាប់បានលើកឡើងថា លោកមាន «សាច់ប្រាក់សុទ្ធ» តិចតួចបំផុត បើធៀបនឹងទ្រព្យសម្បត្តិសរុប។ លោកប្រើប្រាស់វិធីសាស្ត្រ «ខ្ចីបុលដោយយកភាគហ៊ុនធ្វើជាទ្រព្យបញ្ចាំ» ដើម្បីយកមកចាយវាយ និងវិនិយោគបន្ត។ វិធីសាស្ត្រនេះអនុញ្ញាតឱ្យលោកមានលុយចាយវាយមហាសាល ដោយមិនចាំបាច់លក់ភាគហ៊ុន ដែលជួយឱ្យលោកបញ្ចៀសការបង់ពន្ធលើប្រាក់ចំណេញបានយ៉ាងច្រើន៕