(បរទេស)៖ លោក Yann Lecun ដែលជាអតីតប្រធានអ្នកវិទ្យាសាស្ត្រ AI របស់ក្រុមហ៊ុន Meta និងត្រូវបានគេស្គាល់ថាជា «បិតាបង្កើត AI ឬ​ godfather of AI» បាន​រិះគន់​ចំៗ​ទៅ​លើលោក Alexander Wang ប្រធានផ្នែក AI វ័យក្មេងរបស់ Meta ថា ជាមនុស្សដែលខ្វះបទពិសោធន៍ក្នុងការដឹកនាំការស្រាវជ្រាវ ជាពិសេសក្រោយ​ពេល​ដែល Meta បានសម្រេចចិត្តផ្លាស់ប្តូរទិសដៅយុទ្ធសាស្ត្ររបស់ខ្លួន។

លោក Lecun បានលើកឡើងថា ទោះបីជាលោក Wang (សហស្ថាបនិក Scale AI វ័យ ២៩ ឆ្នាំ) ជាមនុស្សរៀនរហ័សក៏ដោយ ប៉ុន្តែលោកមិនមានបទពិសោធន៍​ក្នុង​ការ​អនុវត្តការ​ស្រាវជ្រាវ ឬយល់ដឹងពីអ្វីដែលអ្នកស្រាវជ្រាវចង់បាននោះទេ។ ការរិះគន់នេះកើតឡើងបន្ទាប់ពីលោក Mark Zuckerberg បានបាត់បង់ទំនុកចិត្តលើក្រុមការងារ​ចាស់ ក្រោយរឿងអាស្រូវនៃការបំប៉ោងសមត្ថភាពម៉ូឌែល Llama 4។

លើសពីនេះ លោក Lecun ក៏បានព្រមានផងដែរថា បុគ្គលិកពូកែៗជាច្រើនបានចាកចេញពី Meta ហើយអ្នកដែលនៅសេសសល់ក៏នឹងត្រៀមចាកចេញដែរ ដោយ​សារ​ក្រុមហ៊ុន​ងាក​ទៅ​រកអ្វីដែល «សុវត្ថិភាព» និង «ដើរតាមក្រោយគេ» ជាជាងការបង្កើតថ្មី។ លោកថែមទាំងបានបញ្ជាក់ទៀតថា បច្ចេកវិទ្យា LLMs (Large Language Models) ដែលក្រុមហ៊ុនជាច្រើនកំពុងសម្រុកធ្វើ គឺជា «ផ្លូវទាល់» សម្រាប់ការឈានទៅរកបញ្ញាសិប្បនិម្មិតកម្រិតខ្ពស់ (Superintelligence)៕