(បរទេស)៖ ក្រុមហ៊ុនបច្ចេកវិទ្យាយក្ស Meta Platforms បានប្រកាសជាផ្លូវការនូវការតែងតាំងលោក C.J. Mahoney ឱ្យកាន់តំណែងជាប្រធានផ្នែកច្បាប់ (Chief Legal Officer) ថ្មី។ ការសម្រេចចិត្តនេះធ្វើឡើងក្នុងគោលបំណងពង្រឹងយុទ្ធសាស្ត្រផ្នែកច្បាប់ និងដោះស្រាយបញ្ហាបទប្បញ្ញត្តិដ៏ស្មុគស្មាញដែលក្រុមហ៊ុនកំពុងប្រឈមមុខនៅទូទាំងពិភពលោក។

លោក Mahoney មិនមែនជាបុគ្គលថ្មីថ្មោងក្នុងវិស័យច្បាប់ និងបច្ចេកវិទ្យានោះទេ។ យោងតាមប្រវត្តិការងារ លោកធ្លាប់បានកាន់តំណែងសំខាន់ៗជាច្រើនរួមមាន ជាមន្ត្រីជាន់ខ្ពស់ផ្នែកច្បាប់នៅ Microsoft ដោយលោកមានបទពិសោធន៍យ៉ាងជ្រៅជ្រះក្នុងការគ្រប់គ្រងបញ្ហាច្បាប់សម្រាប់ក្រុមហ៊ុនបច្ចេកវិទ្យាខ្នាតយក្ស។ លើសពីនេះ​លោកជាអនុតំណាងពាណិជ្ជកម្មសហរដ្ឋអាមេរិក (Deputy U.S. Trade Representative) ដោយធ្លាប់បានបម្រើការក្នុងរដ្ឋបាលរបស់លោកប្រធានាធិបតី ដូណាល់ ត្រាំ ក្នុងអាណត្តិទីមួយ ដែលផ្តល់ឱ្យលោកនូវការយល់ដឹងស៊ីជម្រៅអំពីនយោបាយ និងពាណិជ្ជកម្មអន្តរជាតិ។

លោក Mark Zuckerberg នាយកប្រតិបត្តិក្រុមហ៊ុន Meta បានថ្លែងក្នុងសេចក្តីថ្លែងការណ៍ថា៖ «លោក C.J. នាំមកនូវជំនាញផ្នែកច្បាប់លំដាប់ពិភពលោក ចំណង់ចំណូលចិត្តលើបច្ចេកវិទ្យាទំនើប និងការយល់ដឹងស៊ីជម្រៅអំពីបញ្ហាបទប្បញ្ញត្តិសកលដែលឧស្សាហកម្មរបស់យើងកំពុងជួបប្រទះ»។

ការតែងតាំងនេះកើតឡើងបន្ទាប់ពីអ្នកស្រី Jennifer Newstead ដែលជាប្រធានផ្នែកច្បាប់ចាស់របស់ Meta បានប្រកាសចាកចេញកាលពីចុងឆ្នាំមុន ដើម្បីទៅទទួលតំណែងជាប្រឹក្សាទូទៅនៅក្រុមហ៊ុន Apple ក្នុងខែមីនាខាងមុខ។ ក្រោមការដឹកនាំរបស់អ្នកស្រី Newstead ក្រុមហ៊ុន Meta ទទួលបានជោគជ័យក្នុងការការពារការប៉ុនប៉ងរបស់រដ្ឋាភិបាលអាមេរិក ក្នុងការបង្ខំឱ្យក្រុមហ៊ុនលក់ចេញវិញនូវ Instagram និង WhatsApp កាលពីខែវិច្ឆិកាឆ្នាំមុន។

លោក Mahoney នឹងត្រូវចូលកាន់តំណែងជាផ្លូវការនៅថ្ងៃពុធនេះ ដោយរាយការណ៍ផ្ទាល់ជូនលោក Zuckerberg ដោយភារកិច្ចចម្បង រួមមាន៖ ការដោះស្រាយបណ្តឹងផ្លូវច្បាប់ ដោយ Meta កំពុងប្រឈមមុខនឹងបណ្តឹងជាច្រើនដែលចោទប្រកាន់ថា ក្រុមហ៊ុនបរាជ័យក្នុងការការពារអ្នកប្រើប្រាស់វ័យក្មេងពីខ្លឹមសារបង្កគ្រោះថ្នាក់។ ការឆ្លើយតបនឹងការរិះគន់៖ ក្រុមសកម្មជនតស៊ូមតិបានលើកឡើងថា ក្រុមហ៊ុនបានភាន់ច្រឡំសាធារណជនអំពីផលប៉ះពាល់ផ្លូវចិត្តនៃបណ្តាញសង្គមរបស់ខ្លួន។

ក្រុមហ៊ុនបានបញ្ជាក់ថា ខ្លួនបាននឹងកំពុងអនុវត្តវិធានការសុវត្ថិភាពជាបន្តបន្ទាប់ ដើម្បីធ្វើឱ្យវេទិការបស់ខ្លួនកាន់តែមានសុវត្ថិភាពសម្រាប់អនីតិជន ប៉ុន្តែតួនាទីរបស់លោក Mahoney នឹងក្លាយជាគន្លឹះក្នុងការធានាភាពជោគជ័យផ្នែកច្បាប់ និងទំនុកចិត្តពីសាធារណជនឡើងវិញ៕

លោក C.J. Mahoney