(បរទេស)៖ សហរដ្ឋអាមេរិក បានអនុម័តជាផ្លូវការឲ្យក្រុមហ៊ុន Nvidia នាំចេញបន្ទះឈីបបញ្ញាសិប្បនិម្មិត (AI) ម៉ូដែល H200 ទៅកាន់ប្រទេសចិន ប៉ុន្តែការអនុញ្ញាតនេះត្រូវបានដាក់ក្រោមលក្ខខណ្ឌតឹងរឹងជាច្រើន ដើម្បីការពារផលប្រយោជន៍សន្តិសុខជាតិរបស់សហរដ្ឋអាមេរិក។

យោងតាមការប្រកាសពីក្រសួងពាណិជ្ជកម្មអាមេរិក បន្ទះឈីបកម្រិតខ្ពស់ប្រភេទ H200 ត្រូវតែឆ្លងកាត់ការត្រួតពិនិត្យ និងបញ្ជាក់សមត្ថភាពពីភាគីទីបី មុនពេលអនុញ្ញាតឲ្យនាំចេញទៅប្រទេសចិន។ រដ្ឋាភិបាលអាមេរិកចង់ធានាថា បន្ទះឈីបទាំងនេះមិនត្រូវបានប្រើប្រាស់សម្រាប់គោលបំណងយោធា ឬសកម្មភាពដែលអាចប៉ះពាល់ដល់សន្តិសុខជាតិឡើយ។ ក្រៅពីនេះ ក៏មានការកំណត់បរិមាណនៃបន្ទះឈីប H200 ដែលអាចលក់ទៅចិន ដោយមិនអនុញ្ញាតឲ្យលើសកម្រិតដែលអាចប៉ះពាល់ដល់ការផ្គត់ផ្គង់ក្នុងសហរដ្ឋអាមេរិក។ ក្រុមហ៊ុន Nvidia ត្រូវបញ្ជាក់ផងដែរថា ការនាំចេញទៅចិន នឹងមិនប៉ះពាល់ដល់តម្រូវការបន្ទះឈីបសម្រាប់អតិថិជនអាមេរិក និងដៃគូសំខាន់ៗរបស់ខ្លួនឡើយ។

ការសម្រេចចិត្តនេះ ត្រូវបានមើលឃើញថា ជាការបន្ធូរបន្ថយគោលនយោបាយតឹងរឹងមួយផ្នែក បន្ទាប់ពីសហរដ្ឋអាមេរិកបានដាក់ការរឹតបន្តឹងយ៉ាងខ្លាំងលើការនាំចេញបន្ទះឈីប AI កម្រិតខ្ពស់ទៅប្រទេសចិន ក្នុងរយៈពេលប៉ុន្មានឆ្នាំចុងក្រោយ ដោយសារការព្រួយបារម្ភអំពីការប្រើប្រាស់បច្ចេកវិទ្យាទាំងនេះក្នុងវិស័យយោធា និងការត្រួតត្រាសន្តិសុខ។

អ្នកវិភាគមួយចំនួនបានលើកឡើងថា ជំហាននេះបង្ហាញពីការព្យាយាមរបស់រដ្ឋាភិបាលអាមេរិកក្នុងការរកតុល្យភាពរវាងការការពារសន្តិសុខជាតិ និងការអនុញ្ញាតឲ្យក្រុមហ៊ុនបច្ចេកវិទ្យាអាមេរិករក្សាទីផ្សារធំមួយដូចជាចិន។ ទោះជាយ៉ាងណា ការត្រួតពិនិត្យ និងការអនុវត្តលក្ខខណ្ឌទាំងនេះ នៅតែជាបញ្ហាប្រឈមធំមួយនៅពេលអនុវត្តជាក់ស្តែង៕