(បរទេស)៖​ អូស្ត្រាលី​ បានអនុវត្តច្បាប់ថ្មីមួយ ដែលត្រូវបានគេហៅថា​ជា ច្បាប់ដំបូងលើពិភពលោក ក្នុងការហាមឃាត់កុមារ និងយុវជនអាយុក្រោម ១៦ ឆ្នាំ មិនឲ្យប្រើប្រាស់បណ្តាញសង្គម។ ក្នុងរយៈពេលតែមួយខែបន្ទាប់ពីច្បាប់នេះចូលជាធរមាន គណនីយុវជនប្រមាណ ៤.៧ លានគណនី ត្រូវបានបិទ ឬលុបចោល ដើម្បីអនុវត្តតាមបទប្បញ្ញត្តិថ្មីនេះ។

តាមការរាយការណ៍របស់ Reuters ច្បាប់នេះបានចូលជាធរមាននៅថ្ងៃទី១០ ខែធ្នូ ឆ្នាំ ២០២៥ ហើយអនុវត្តលើបណ្តាញសង្គមធំៗជាច្រើន រួមមាន Facebook, Instagram, TikTok, Snapchat, YouTube, X (Twitter) និង Threads។ ក្រុមហ៊ុនបច្ចេកវិទ្យាត្រូវមានកាតព្វកិច្ចទប់ស្កាត់អ្នកប្រើអាយុក្រោម ១៦ឆ្នាំ មិនឲ្យចូលប្រើប្រាស់ បើមិនដូច្នោះទេ អាចប្រឈមនឹងពិន័យធ្ងន់ធ្ងរ រហូតដល់ជិត ៥០លានដុល្លារ​អូស្ត្រាលី។

រដ្ឋាភិបាលអូស្ត្រាលីបានបញ្ជាក់ថា វិធានការនេះមានគោលបំណង ការពារសុខុមាលភាពផ្លូវចិត្តរបស់កុមារ និងយុវជន កាត់បន្ថយហានិភ័យពីខ្លឹមសារអនឡាញដែលមិនសមរម្យ និងលើកទឹកចិត្តឲ្យកុមារចំណាយពេលវេលាច្រើនជាមួយសកម្មភាពខាងក្រៅ។ ទោះជាយ៉ាងណា ក្រុមហ៊ុនបច្ចេកវិទ្យាខ្លះ ដូចជា Meta បានបង្ហាញការព្រួយបារម្ភថា ច្បាប់នេះអាចមិនមានប្រសិទ្ធភាពពេញលេញ ហើយបានអំពាវនាវឲ្យរដ្ឋាភិបាលពិចារណាវិធីសាស្ត្រផ្សេងៗ ដូចជាការផ្ទៀងផ្ទាត់អាយុពីកម្រិត App Store ជំនួសវិញ។

អ្នកជំនាញជាច្រើនកំពុងតាមដានយ៉ាងជិតស្និទ្ធ ដើម្បីវាយតម្លៃផលប៉ះពាល់រយៈពេលវែងនៃច្បាប់នេះ លើឥរិយាបថ និងសុខភាពផ្លូវចិត្តរបស់យុវជន ខណៈប្រទេសផ្សេងៗជាច្រើនក៏កំពុងពិចារណាយកគំរូរបស់អូស្ត្រាលីទៅអនុវត្តដូចគ្នាផងដែរ៕