(បរទេស)៖ យុគសម័យនៃការផ្តល់ត្រឹម «ការណែនាំ» បានឈានដល់ទីបញ្ចប់ហើយ។ យោងតាមរបាយការណ៍ផ្តាច់មុខពីសារព័ត៌មាន Financial Times (FT) បានឱ្យដឹងថា សហភាពអឺរ៉ុប (EU) កំពុងរៀបចំយន្តការច្បាប់ថ្មីមួយ ដើម្បីបង្ខំឱ្យរដ្ឋជាសមាជិកទាំងអស់ បញ្ឈប់ការប្រើប្រាស់ឧបករណ៍បច្ចេកវិទ្យាពីអ្នកផ្គត់ផ្គង់ចិន ជាពិសេសក្រុមហ៊ុន Huawei និង ZTE នៅក្នុងហេដ្ឋារចនាសម្ព័ន្ធសំខាន់ៗរបស់ខ្លួន។

កាលពីឆ្នាំ ២០២០ សហភាពអឺរ៉ុបបានដាក់ចេញនូវ «5G Toolbox» ដែលជាបណ្តុំនៃវិធានការណែនាំឱ្យរដ្ឋសមាជិកប្រុងប្រយ័ត្នចំពោះអ្នកផ្គត់ផ្គង់ដែលមានហានិភ័យខ្ពស់។ ទោះជាយ៉ាងណាក៏ដោយ បច្ចុប្បន្នមានប្រទេសត្រឹមតែប្រហែល ១ ភាគ ៣ ប៉ុណ្ណោះ ដែលបានអនុវត្តការហាមឃាត់នេះលើវិស័យសំខាន់ៗ។ ការយឺតយ៉ាវនេះបានធ្វើឱ្យមន្ត្រីជាន់ខ្ពស់នៅទីក្រុងព្រុចសែលយល់ឃើញថា ដល់ពេលដែលត្រូវប្រើ «វិធានការក្តៅ» ឬច្បាប់បង្ខំ ដើម្បីធានាបាននូវសន្តិសុខរួមទូទាំងប្លុកអឺរ៉ុប។

ហេតុអ្វីបានជា EU ចាត់ទុកបច្ចេកវិទ្យាចិនជា «ហានិភ័យ»? មូលហេតុដែលនាំឱ្យមានការសម្រេចចិត្តដ៏តឹងរ៉ឹងនេះ រួមមានកត្តាសំខាន់ៗចំនួន ៣​ ទី១ គឺសន្តិសុខទិន្នន័យ៖ ក្តីបារម្ភថា ច្បាប់សន្តិសុខជាតិរបស់ចិនអាចបង្ខំឱ្យក្រុមហ៊ុនបច្ចេកវិទ្យាផ្តល់ទិន្នន័យសម្ងាត់ជូនរដ្ឋាភិបាលទីក្រុងប៉េកាំង។ ទី២ គឺការពឹងផ្អែកយុទ្ធសាស្ត្រ៖ ការឈ្លានពានរបស់រុស្ស៊ីលើអ៊ុយក្រែន បានបង្រៀនអឺរ៉ុបឱ្យយល់ច្បាស់ពីមេរៀននៃការពឹងផ្អែកលើធនធានពីប្រទេសដែលមិនមានមនោគមវិជ្ជាដូចគ្នា (ដូចជាការរំពឹងលើហ្គាសរុស្ស៊ី)។ EU មិនចង់ឱ្យប្រព័ន្ធ 5G ឬបណ្តាញអគ្គិសនីរបស់ខ្លួន ស្ថិតក្នុងកណ្តាប់ដៃបច្ចេកវិទ្យាបរទេសឡើយ និងទី៣ គឺអធិបតេយ្យភាពឌីជីថល៖ អឺរ៉ុបចង់ជំរុញឱ្យក្រុមហ៊ុនក្នុងស្រុកដូចជា Ericsson និង Nokia ក្លាយជាអ្នកកាន់កាប់ទីផ្សារស្នូលឡើងវិញ ដើម្បីពង្រឹងឯករាជ្យភាពបច្ចេកវិទ្យា។

ការដកឧបករណ៍ចិនចេញពីហេដ្ឋារចនាសម្ព័ន្ធដែលមានស្រាប់ មិនមែនជារឿងងាយស្រួល ឬចំណាយតិចនោះទេ។ ក្រុមហ៊ុនទូរគមនាគមន៍ធំៗនៅអឺរ៉ុប (ដូចជា Deutsche Telekom) អាចនឹងត្រូវចំណាយប្រាក់រាប់ពាន់លានដុល្លារ ដើម្បីដក និងជំនួសឧបករណ៍ដែលកំពុងដំណើរការ មិនត្រឹមតែមានការចំណាយខ្ពស់ប៉ុណ្ណោះទេ វាថែមទាំងមានការយឺតយ៉ាវនៃបច្ចេកវិទ្យា ដោយអ្នកជំនាញខ្លះបារម្ភថា ការដក Huawei ចេញ អាចធ្វើឱ្យល្បឿននៃការដាក់ពង្រាយបណ្តាញ 5G ឬ 6G នៅអឺរ៉ុបមានភាពយឺតយ៉ាវជាងតំបន់ដទៃ។

ក្រុមហ៊ុន Huawei តែងតែបដិសេធរាល់ការចោទប្រកាន់ និងបញ្ជាក់ថា ខ្លួនគឺជាក្រុមហ៊ុនឯកជនដែលមិនស្ថិតនៅក្រោមការបញ្ជារបស់រដ្ឋាភិបាលឡើយ ខណៈដែលរដ្ឋាភិបាលទីក្រុងប៉េកាំងបានចាត់ទុកវិធានការរបស់ EU ថាជា «ការរើសអើង និងការប្រើប្រាស់នយោបាយដើម្បីបង្ក្រាបពាណិជ្ជកម្ម»៕