(បរទេស)៖ អ្នកប្រើប្រាស់ឧបករណ៍បច្ចេកវិទ្យានៅទូទាំងពិភពលោក រួមទាំងកម្ពុជាផងនោះ អាចនឹងត្រូវចំណាយប្រាក់កាន់តែច្រើនដើម្បីទិញទូរស័ព្ទដៃ កុំព្យូទ័រ និងម៉ាស៊ីនហ្គេម បន្ទាប់ពីតម្លៃបន្ទះឈីបអង្គចងចាំ (Memory Chips) បានហក់ឡើងខ្ពស់ហួសពីការរំពឹងទុក ដែលជះឥទ្ធិពលអវិជ្ជមានដល់ផលិតកម្មអេឡិចត្រូនិកក្នុងឆ្នាំ២០២៦នេះ។

យោងតាមការចុះផ្សាយរបស់ Reuters នៅថ្ងៃទី២២ ខែមករា ឆ្នាំ២០២៦ បានឱ្យដឹងថា តម្រូវការដ៏មហាសាលនៃបច្ចេកវិទ្យាបញ្ញាសិប្បនិម្មិត (AI) ពីសំណាក់ក្រុមហ៊ុនយក្សដូចជា OpenAI, Google និង Microsoft បានធ្វើឱ្យការផ្គត់ផ្គង់បន្ទះឈីបសម្រាប់ឧបករណ៍ប្រើប្រាស់ទូទៅមានភាពខ្វះខាតយ៉ាងខ្លាំង។

ក្រុមហ៊ុនផលិតបន្ទះឈីបធំៗលំដាប់ពិភពលោក រួមមាន Samsung, SK Hynix និង Micron បានផ្លាស់ប្តូរការយកចិត្តទុកដាក់ពីការផលិតឈីបសម្រាប់ទូរស័ព្ទ និងកុំព្យូទ័រ ទៅផ្ដោតលើការផលិតឈីបដែលមានតម្លៃថ្លៃ និងចំណេញខ្ពស់សម្រាប់ប្រើប្រាស់ក្នុង «មជ្ឈមណ្ឌលទិន្នន័យ AI ឬ AI Data Centers» វិញ។ ការផ្លាស់ប្តូរនេះបានធ្វើឱ្យតម្លៃបន្ទះឈីបឡើងកប់ពពក។ តម្លៃបន្ទះឈីប RAM និងអង្គផ្ទុកទិន្នន័យ អាចនឹងហក់ឡើងពី ៤០% ទៅ ៥០% ក្នុងត្រីមាសទី១ ឆ្នាំ២០២៦នេះ បន្ទាប់ពីបានឡើងថ្លៃ ៥០% រួចទៅហើយកាលពីឆ្នាំ២០២៥។ ក្រុមហ៊ុនដូចជា Xiaomi, Lenovo, Dell និង HP កំពុងស្ថិតក្នុងស្ថានភាពលំបាក ខណៈដែលក្រុមហ៊ុនខ្លះបានប្រកាសរួចហើយថា ពួកគេនឹងដំឡើងថ្លៃផលិតផលរហូតដល់ ២០% ដើម្បីទូទាត់លើការចំណាយបន្ទះឈីបដែលឡើងថ្លៃ។

ស្ថាប័នស្រាវជ្រាវ IDC និង Counterpoint បានផ្លាស់ប្តូរការព្យាករណ៍របស់ខ្លួន ដោយបញ្ជាក់ថា ការលក់ទូរស័ព្ទដៃទូទាំងពិភពលោកនឹងធ្លាក់ចុះប្រហែល ២%។ ទីផ្សារកុំព្យូទ័រ (PC) នឹងធ្លាក់ចុះប្រហែល ៤.៩% ចំណេកម៉ាស៊ីនហ្គេម (Consoles) ក៏នឹងរងផលប៉ះពាល់ និងធ្លាក់ចុះការលក់ប្រហែល ៤.៤% ផងដែរ។

តើឧបករណ៍ប្រភេទណាខ្លះដែលនឹងឡើងថ្លៃខ្លាំងជាងគេ? ឧបករណ៍កម្រិតមធ្យម និងតម្លៃធូរថ្លៃ (Low- to mid-range devices) នឹងរងផលប៉ះពាល់ខ្លាំងជាងគេ ព្រោះក្រុមហ៊ុនផលិតមានប្រាក់ចំណេញតិច មិនអាចទ្រាំទ្រនឹងការឡើងថ្លៃនៃគ្រឿងបន្លាស់បាន។

ហេតុអ្វីបានជា AI ធ្វើឱ្យឈីបឡើងថ្លៃ? ព្រោះប្រព័ន្ធ AI ត្រូវការអង្គចងចាំដែលមានល្បឿនលឿន និងសមត្ថភាពខ្ពស់បំផុត។ នៅពេលក្រុមហ៊ុន AI បញ្ជាទិញច្រើន ក្រុមហ៊ុនផលិតឈីបនឹងដំឡើងថ្លៃ និងកាត់បន្ថយការផលិតឈីបសម្រាប់ទូរស័ព្ទធម្មតា។

តើវិបត្តិនេះនឹងអូសបន្លាយដល់ពេលណា? អ្នកជំនាញសេដ្ឋកិច្ចបារម្ភថា ការឡើងថ្លៃនេះអាចនឹងអូសបន្លាយរហូតដល់ឆ្នាំ២០២៧ ដែលនឹងធ្វើឱ្យអតិផរណាលើវិស័យបច្ចេកវិទ្យាកាន់តែធ្ងន់ធ្ងរ៕