(បរទេស)៖ យោងតាមរបាយការណ៍ចុងក្រោយពីភ្នាក់ងារសារព័ត៌មានបច្ចេកវិទ្យាធំៗ ក្រុមហ៊ុន Apple កំពុងស្ថិតក្នុងកិច្ចពិភាក្សាយ៉ាងស៊ីជម្រៅជាមួយក្រុមហ៊ុន Google ដើម្បីបញ្ចូលបច្ចេកវិទ្យាបញ្ញាសិប្បនិម្មិត (AI) ដែលមានឈ្មោះថា Gemini ទៅក្នុងប្រព័ន្ធប្រតិបត្តិការ iPhone (iOS)។ គោលបំណងធំនៃកិច្ចសហការនេះ គឺដើម្បីប្រែក្លាយ Siri ពីជំនួយការសំឡេងធម្មតា ឱ្យទៅជា AI Chatbot ដ៏មានសមត្ថភាពខ្ពស់ អាចប្រកួតប្រជែងជាមួយ ChatGPT បាន។

ហេតុអ្វីបានជា Apple ជ្រើសរើស Google Gemini? ទោះបីជា Apple កំពុងអភិវឌ្ឍម៉ូដែល AI ផ្ទាល់ខ្លួនក៏ដោយ ប៉ុន្តែការប្រើប្រាស់ Gemini របស់ Google នឹងជួយឱ្យ Apple ពន្លឿនការដាក់ឱ្យប្រើប្រាស់។ Apple ត្រូវការ AI ដែលមានសមត្ថភាពខ្ពស់ជាបន្ទាន់ ដើម្បីឆ្លើយតបនឹងការកើនឡើងនៃតម្រូវការរបស់អ្នកប្រើប្រាស់។ មួយវិញទៀត គឺសមត្ថភាពយល់ដឹងស៊ីជម្រៅ។ Gemini ត្រូវបានគេទទួលស្គាល់ថា មានសមត្ថភាពខ្លាំងក្នុងការបង្កើតអត្ថបទ ការសរសេរកូដ និងការយល់ដឹងពីបរិបទស្មុគស្មាញ។ ការរួមបញ្ចូលគ្នារវាង Hardware និង Software ដោយ Apple នឹងផ្តោតលើការកែច្នៃ AI ឱ្យដំណើរការបានយ៉ាងរលូន និងមានសុវត្ថិភាពបំផុតនៅលើឧបករណ៍ iPhone និង Mac។

ប្រសិនបើកិច្ចព្រមព្រៀងនេះសម្រេចបានជោគជ័យ អ្នកប្រើប្រាស់ iPhone នឹងទទួលបានបទពិសោធន៍ថ្មីដូចជា ការសន្ទនាបែបធម្មជាតិ។ Siri នឹងអាចយល់ និងឆ្លើយតបនឹងសំណួរវែងៗ និងស្មុគស្មាញបានកាន់តែល្អ និងអាចជួយសរសេរអ៊ីមែល បង្កើតរូបភាព ឬសង្ខេបអត្ថបទវែងៗបានភ្លាមៗ ជាពិសេសគឺភាពឆ្លាតវៃក្នុងកម្មវិធីផ្សេងៗ ដោយ AI នឹងមានវត្តមាននៅក្នុងកម្មវិធី Photos, Notes និង Apple Music ដើម្បីជួយសម្រួលការងារប្រចាំថ្ងៃ។

យោងតាមរបាយការណ៍ពីលោក Mark Gurman នៃសារព័ត៌មាន Bloomberg បានឱ្យដឹងថា ក្រុមហ៊ុន Apple មានគម្រោងប្រកាសចេញ Siri ជំនាន់ថ្មីនៅ «ពាក់កណ្តាលខែកុម្ភៈ» ខាងមុខនេះ។ ការប្រកាសនេះនឹងបង្ហាញពីលទ្ធផលនៃកិច្ចសហការជាដៃគូជាមួយ Google ដែលទើបតែប្រកាសនាពេលថ្មីៗនេះ រួមជាមួយនឹងការបង្ហាញសមត្ថភាពពិតៗដែលជំរុញដោយបច្ចេកវិទ្យា Gemini។

បន្ទាប់ពីការបង្ហាញខ្លួនជាលើកដំបូងនេះ លោក Gurman បានរាយការណ៍ថា Siri ថ្មីនឹងត្រូវបានដាក់បញ្ចូលទៅក្នុងប្រព័ន្ធប្រតិបត្តិការ iOS 26.4។ ប្រព័ន្ធនេះនឹងចាប់ផ្តើមការសាកល្បង (Beta Testing) នៅក្នុងខែកុម្ភៈ មុននឹងបញ្ចេញឱ្យប្រើប្រាស់ជាសាធារណៈនៅក្នុងខែមីនា ឬដើមខែមេសា ឆ្នាំ ២០២៦ នេះ។

ទោះបីជា Apple បានប្រកាសពីគម្រោង Siri ជំនាន់ក្រោយតាំងពីកម្មវិធី WWDC 2024 ក៏ដោយ ប៉ុន្តែព័ត៌មានចុងក្រោយបានបញ្ជាក់ថា Siri ដែលប្រើបច្ចេកវិទ្យា Gemini នេះ នឹងមានលក្ខណៈដូចជា AI Chatbot (ស្រដៀងទៅនឹង ChatGPT របស់ OpenAI) ដែលមានសមត្ថភាពសន្ទនា និងដោះស្រាយបញ្ហាស្មុគស្មាញបានយ៉ាងឆ្លាតវៃ។

លោក Gurman បន្ថែមថា បន្ទាប់ពីការបង្ហាញក្នុងខែកុម្ភៈ Apple នឹងមានការប្រកាសដ៏ធំមួយទៀតសម្រាប់ Siri ជំនាន់ថ្មីនេះ (ដែលបច្ចុប្បន្នមានឈ្មោះកូដថា Campos) នៅក្នុងសន្និសីទអ្នកអភិវឌ្ឍន៍ប្រចាំឆ្នាំ (WWDC) នាដូវក្តៅខាងមុខ។ បន្ទាប់ពីនោះ Siri ជំនាន់ចុងក្រោយបំផុត រួមជាមួយមុខងារ Apple Intelligence ដែលប្រើបច្ចេកវិទ្យា Gemini ត្រូវបានគេរំពឹងថានឹងមកដល់ជាផ្លូវការជាមួយប្រព័ន្ធប្រតិបត្តិការ iOS 27, iPadOS 27 និង macOS 27 នៅចុងឆ្នាំនេះ៕