(បរទេស)៖ ក្រុមហ៊ុនយក្ស Meta Platforms (មេធំរបស់ Facebook និង Instagram) ត្រូវត្រៀមខ្លួនប្រឈមមុខនឹងការកាត់ក្ដីដ៏ធំមួយនៅសប្ដាហ៍ក្រោយ បន្ទាប់ពីចៅក្រមរដ្ឋ New Mexico បានច្រានចោលរាល់ការប៉ុនប៉ងរបស់ក្រុមហ៊ុនក្នុងការទម្លាក់ចោលបណ្ដឹងពាក់ព័ន្ធនឹង «ការកេងប្រវ័ញ្ចលើកុមារ»។

តាមរបាយការណ៍ពី Reuters ចុះផ្សាយនៅថ្ងៃទី ៣០ ខែមករា ឆ្នាំ ២០២៦ បានឱ្យដឹងថា តុលាការបានកំណត់យកថ្ងៃទី ២ ខែកុម្ភៈ ឆ្នាំ ២០២៦ ជាថ្ងៃចាប់ផ្ដើមការកាត់ក្ដីជាផ្លូវការ។

បណ្ដឹងនេះត្រូវបានដាក់ដោយអគ្គមេធាវីរដ្ឋ New Mexico លោក Raúl Torrez តាំងពីចុងឆ្នាំ ២០២៣ បន្ទាប់ពីមានការស៊ើបអង្កេតសម្ងាត់មួយដែលបានរកឃើញថា បណ្ដាញសង្គមរបស់ Meta ត្រូវបានគេចោទថា បានក្លាយជាកន្លែងដែលជនល្មើសប្រើប្រាស់ដើម្បីទាក់ទង ជួញដូររូបភាពអាសអាភាសកុមារ និងល្បួងក្មេងៗ។ ករណីមួយទៀតគឺ ព្រះរាជអាជ្ញាអះអាងថា ក្បួនដោះស្រាយរបស់ Meta បាននាំផ្លូវកុមារឱ្យជួបជាមួយជនល្មើស និងបង្ហាញមាតិកាអាសអាភាសដល់កុមារដោយចេតនា។ អ្វីដែល​កាន់តែពិសេសនោះគឺ ឯកសារផ្ទៃក្នុងបង្ហាញថា បុគ្គលិក Meta ធ្លាប់បានព្រមានពីបញ្ហានេះ ប៉ុន្តែថ្នាក់ដឹកនាំបានផ្តល់អាទិភាពលើការទាក់ទាញអ្នកប្រើប្រាស់ និងប្រាក់ចំណេញជាងសុវត្ថិភាពកុមារ។

នៅក្នុងសវនាការមុនការកាត់ក្ដី ឯកសារផ្ទៃក្នុងថ្មីត្រូវបានលាតត្រដាងថា ថ្នាក់ដឹកនាំ Meta បានអនុម័តឱ្យប្រើប្រាស់ AI Chatbot បើទោះបីជាមានការព្រមានថា ប្រព័ន្ធនេះអាចនិយាយសន្ទនាបែបផ្លូវភេទជាមួយអនីតិជនក៏ដោយ។ នេះគឺជាចំណុចដ៏រសើប​ដែលនឹងត្រូវយកមកជជែកដេញដោល​ក្នុងតុលាការ។

អ្នកនាំពាក្យរបស់ក្រុមហ៊ុន Meta បានចេញមុខបដិសេធរាល់ការចោទប្រកាន់នេះ ដោយអះអាងថា ក្រុមហ៊ុនបានចំណាយប្រាក់រាប់ពាន់លានដុល្លារលើសុវត្ថិភាពកុមារ។ មានអ្នកជំនាញ និងបច្ចេកវិទ្យាទំនើបក្នុងការស្កេន និងរាយការណ៍មាតិកាមិនសមរម្យទៅកាន់អាជ្ញាធរ។ ក្រុមហ៊ុនជឿជាក់ថា ភស្តុតាងនៅក្នុងតុលាការនឹងបង្ហាញពីការប្តេជ្ញាចិត្តរបស់ខ្លួនចំពោះយុវជន។

ទោះបីជាយ៉ាងណា ចៅក្រម Bryan Biedscheid បានសម្រេចឱ្យបន្តនីតិវិធីកាត់ក្ដីដោយមានគណៈវិនិច្ឆ័យ (Jury Trial) ដែលរំពឹងថានឹងប្រើពេលពី ៦ ទៅ ៨ សប្ដាហ៍។

តើលោក Mark Zuckerberg ត្រូវចូលខ្លួនកាត់ក្ដីដែរឬទេ? ចៅក្រមបានទម្លាក់ឈ្មោះលោក Mark Zuckerberg ចេញពីបញ្ជីចុងចោទជាបុគ្គល ប៉ុន្តែលោកនៅតែអាចត្រូវបានគេកោះហៅឱ្យធ្វើជាសាក្សីក្នុងនាមជា CEO របស់ក្រុមហ៊ុន។

តើបណ្ដឹងនេះមានផលប៉ះពាល់ដល់អ្នកប្រើប្រាស់នៅកម្ពុជាទេ? លទ្ធផលនៃបណ្ដឹងនេះនឹងក្លាយជាគំរូសម្រាប់ច្បាប់ការពារកុមារទូទាំងពិភពលោក។ ប្រសិនបើតុលាការបង្គាប់ឱ្យ Meta បង្កើនសុវត្ថិភាព នោះអ្នកប្រើប្រាស់នៅកម្ពុជាក៏នឹងទទួលបាននូវមុខងារការពារកាន់តែប្រសើរផងដែរ៕