(បរទេស)៖ ខណៈដែលក្រុមហ៊ុនផលិតរថយន្តធំៗជាច្រើនកំពុងត្អូញត្អែរពីការធ្លាក់ចុះការលក់ ក្រុមហ៊ុន GAC Trumpchi បែរជាបើកឆាកឆ្នាំ ២០២៦ ដ៏គួរឱ្យភ្ញាក់ផ្អើល ដោយសម្រេចបាននូវការលក់រហូតដល់ ២៦,៩៣៧ គ្រឿង ក្នុងខែមករា។ នេះបើយោងតាមការចុះផ្សាយរបស់ Gasgoo។

តួលេខដ៏គួរឱ្យភ្ញាក់ផ្អើលនេះតំណាងឱ្យ៖

. កំណើន ២.០៦% ធៀបនឹងខែមករាឆ្នាំមុន។

. កំណើន ២៥.០៧% ធៀបនឹងខែធ្នូ ឆ្នាំ២០២៥។

តើអ្វីទៅជា GAC Trumpchi? GAC Trumpchi គឺជាម៉ាកយីហោរថយន្តកម្រិតខ្ពស់ (Premium) របស់ក្រុមហ៊ុនរដ្ឋចិន GAC Group ដែលមានមូលដ្ឋាននៅទីក្រុងក្វាងចូវ។ បង្កើតឡើងក្នុងឆ្នាំ ២០០៨ ម៉ាកនេះល្បីល្បាញខ្លាំងលើការផលិតរថយន្តដែលមានបច្ចេកវិទ្យាទំនើប និងគុណភាពខ្ពស់ ដើម្បីប្រជែងជាមួយម៉ាកល្បីៗមកពីអឺរ៉ុប និងជប៉ុន។

ភាពជោគជ័យបញ្ច្រាសទិសដៅទីផ្សារ ជោគជ័យនេះបានកើតឡើងចំពេលដែលទីផ្សាររថយន្តរួមនៅក្នុងប្រទេសចិនបានធ្លាក់ចុះដល់ទៅ ២៨% ដោយសារការប្រែប្រួលគោលនយោបាយពន្ធ។ ទោះជាយ៉ាងណាក៏ដោយ Trumpchi នៅតែអាចរក្សាលំនឹងបានយ៉ាងល្អ ដែលអ្នកវិភាគហៅថាជា «ភាពធន់មិនគួរឱ្យជឿ»។ ក្នុងនោះ រថយន្តស៊េរី Trumpchi M8 Master (ប្រភេទរថយន្តគ្រួសារ MPV លំដាប់ខ្ពស់) គឺជាតួអង្គសំខាន់បំផុតដែលជួយរុញច្រានការលក់ឱ្យហក់ឡើងខ្ពស់។

គួរជម្រាបថា ការសម្រេចបាននូវលទ្ធផលដ៏លេចធ្លោនៅដើមឆ្នាំ ២០២៦ នេះ សបញ្ជាក់ឱ្យឃើញថា យុទ្ធសាស្ត្រផ្ដោតលើគុណភាព និងការកែទម្រង់ការលក់របស់ GAC Trumpchi កំពុងផ្តល់ផ្លែផ្កាយ៉ាងពិតប្រាកដ និងផ្តល់ទំនុកចិត្តយ៉ាងខ្លាំងដល់ឧស្សាហកម្មរថយន្តទាំងមូល៕