(បរទេស)៖ តៃវ៉ាន់បានបង្ហាញជំហររឹងមាំចំពោះមុខសហរដ្ឋអាមេរិក ដោយបញ្ជាក់ថា ការផ្ទេរសមត្ថភាពផលិតបន្ទះឈីប (Semiconductor) ចំនួន ៤០% ទៅកាន់ទឹកដីអាមេរិក គឺជា «រឿងមិនអាចទៅរួច»។ អនុនាយករដ្ឋមន្ត្រីតៃវ៉ាន់ លោកស្រី Cheng Li-chiun បានសង្កត់ធ្ងន់ថា ប្រព័ន្ធអេកូឡូស៊ីឧស្សាហកម្មនេះត្រូវបានបង្កើតឡើងអស់រាប់សិបឆ្នាំមកហើយ ដូច្នេះវាមិនអាចរុះរើចេញបានងាយៗនោះទេ ហើយតៃវ៉ាន់នឹងនៅតែជាមូលដ្ឋានគ្រឹះដ៏សំខាន់បំផុតសម្រាប់វិស័យនេះដដែល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៩ ខែកុម្ភៈ ឆ្នាំ២០២៦។

ការឆ្លើយតបនេះធ្វើឡើងបន្ទាប់ពីរដ្ឋមន្ត្រីពាណិជ្ជកម្មអាមេរិក លោក Howard Lutnick បានជំរុញឱ្យមានការនាំយកផលិតកម្មមកអាមេរិកវិញ ដោយលោកលើកឡើងថា «វាមិនសមហេតុផលទេ ដែលផលិតកម្មបន្ទះឈីបទាំងអស់ស្ថិតនៅចម្ងាយតែ ៨០ ម៉ាយល៍ពីប្រទេសចិន»។ លោក Lutnick បានកំណត់គោលដៅយកចំណែកទីផ្សារ ៤០% មកវិញ ហើយថែមទាំងបានព្រមានពីការដំឡើងពន្ធរហូតដល់ ១០០% លើការនាំចូលពីតៃវ៉ាន់ ប្រសិនបើគោលដៅនេះមិនត្រូវបានសម្រេច។

ទោះបីជាមានការគាបសង្កត់ផ្នែកពន្ធក៏ដោយ លោកស្រី Cheng Li-chiun បានបញ្ជាក់ថា ទោះបីតៃវ៉ាន់ពង្រីកការវិនិយោគនៅអាមេរិក ដូចជាគម្រោងរបស់ក្រុមហ៊ុន TSMC នៅរដ្ឋ Arizona ក៏ដោយ ក៏សមត្ថភាពផលិតនៅក្នុងកោះតៃវ៉ាន់នឹងនៅតែបន្តរីកចម្រើនខ្លាំងជាងការវិនិយោគនៅបរទេសជានិច្ច។ លោកស្រីបានបន្ថែមថា តៃវ៉ាន់សុខចិត្តត្រឹមតែ «ចែករំលែកបទពិសោធន៍» ក្នុងការកសាងបណ្តុំឧស្សាហកម្មដល់អាមេរិកប៉ុណ្ណោះ ប៉ុន្តែនឹងមិនបោះបង់ចោលមជ្ឈមណ្ឌលផលិតកម្មក្នុងស្រុកឡើយ។

ជាលទ្ធផល ជម្លោះមតិរវាងមហាអំណាចបច្ចេកវិទ្យាទាំងពីរនេះ បានបង្ហាញឱ្យឃើញពីភាពតានតឹងនៃខ្សែសង្វាក់ផ្គត់ផ្គង់សកល ខណៈដែលអាមេរិកបារម្ភពីរឿងសន្តិសុខជាតិ ចំណែកតៃវ៉ាន់ត្រូវការពារ «ខែលការពារមាស» (Silicon Shield) ដែលជាសសរស្តម្ភសេដ្ឋកិច្ចដ៏សំខាន់បំផុតរបស់ខ្លួន៕