(បរទេស)៖ អាជ្ញាធរសន្តិសុខអ៊ីនធឺណិតរបស់សិង្ហបុរី បានបញ្ជាក់ថា ក្រុមហ៊ុនទូរគមនាគមន៍ធំៗទាំង ៤ នៅសិង្ហបុរី រួមមាន Singtel, StarHub, M1 និង Simba Telecom ត្រូវបានក្រុមចារកម្មតាមអ៊ីនធឺណិតមួយឈ្មោះ «UNC3886» វាយប្រហារ កាលពីឆ្នាំមុន។ នេះបើយោងតាមការចេញផ្សាយដោយសារព័ត៌មាន Reuters នៅថ្ងៃទី០៩ ខែកុម្ភៈ ឆ្នាំ២០២៦។

អាជ្ញាធរបាននិយាយថា ពួក Hacker ​អាចចូលដល់ផ្នែកខ្លះនៃប្រព័ន្ធបណ្ដាញទូរគមនាគមន៍ ប៉ុន្តែ មិនអាចរំខានសេវាកម្មទូរស័ព្ទ ឬអ៊ីនធឺណិតបានទេ ហើយ មិនមានទិន្នន័យផ្ទាល់ខ្លួនរបស់អតិថិជនណាត្រូវបានលួចយកឡើយ។ ទោះយ៉ាងណា ពួកគេអាចយកបាន ទិន្នន័យបច្ចេកទេសបន្តិចបន្តួច ដែលភាគច្រើនពាក់ព័ន្ធនឹងបណ្ដាញ (network data) ដើម្បីជួយគម្រោងប្រតិបត្តិការរបស់ពួកគេបន្តទៀត។

ក្រុមហ៊ុនសន្តិសុខអ៊ីនធឺណិត Mandiant (ជាកម្មសិទ្ធិរបស់ Google) បានពិពណ៌នាក្រុម UNC3886 ថាជាក្រុមចារកម្មដែលមានទំនាក់ទំនងជាមួយចិន ហើយកន្លងមកធ្លាប់វាយប្រហារអង្គភាពផ្នែកការពារ​ជាតិ បច្ចេកវិទ្យា និងទូរគមនាគមន៍ នៅសហរដ្ឋអាមេរិក និងតំបន់អាស៊ី។ ភាគីចិនជាធម្មតាបដិសេធការចោទប្រកាន់ទាំងនេះ ហើយនិយាយថា ចិនប្រឆាំងការវាយប្រហារតាមអ៊ីនធឺណិតគ្រប់ប្រភេទ ហើយខ្លួនឯងក៏ជាជនរងគ្រោះផងដែរ។ ស្ថានទូតចិនប្រចាំសិង្ហបុរី មិនទាន់ឆ្លើយតបទៅសំណួរព័ត៌មាននៅឡើយទេ។

យោងតាមសេចក្ដីប្រកាសនៅថ្ងៃចន្ទនេះ ជាលើកដំបូងដែលរដ្ឋាភិបាលសិង្ហបុរី បង្ហាញច្បាស់ថា ហេដ្ឋារចនាសម្ព័ន្ធទូរគមនាគមន៍ គឺជាគោលដៅរបស់ក្រុម UNC3886។ កាលពីខែកក្កដា រដ្ឋាភិបាលបាននិយាយតែថា កំពុងឆ្លើយតបទៅនឹងការវាយប្រហារលើ «ទ្រព្យសម្បត្តិសំខាន់ៗមានតម្លៃខ្ពស់» ប៉ុណ្ណោះ៕