(បរទេស)៖ ក្រុមហ៊ុនយក្សជប៉ុន Kawasaki Heavy Industries បានសម្រេចចេញគម្រោងរ៉ូបូតជើងបួនមានឈ្មោះផ្លូវការថា «Corleo» ដោយវិវត្តន៍ពីដំណាក់កាលគំនិត (Concept) ទៅកាន់ផែនការផលិតកម្មជាផ្លូវការហើយ។ នេះគឺជាការបោះជំហានថ្មីមួយក្នុងការបង្កើតមធ្យោបាយធ្វើដំណើរដែលរួមបញ្ចូលគ្នារវាងវិស្វកម្មម៉ូតូ និងបច្ចេកវិទ្យារ៉ូបូតទំនើប។

Corleo មិនមែនគ្រាន់តែជារ៉ូបូតធម្មតានោះទេ ប៉ុន្តែវាគឺជា «យានជំនិះដើរបាន» ដែលអនុញ្ញាតឱ្យអ្នកជិះអាចបញ្ជាទិសដៅតាមរយៈ ការផ្អៀងខ្លួន (Body Weight Shifting) ដូចទៅនឹងការបើកបរម៉ូតូដែរ។ លក្ខណៈពិសេសនៃប្រព័ន្ធបច្ចេកវិទ្យារួមមាន៖

* បញ្ញាសិប្បនិម្មិត (AI): គ្រប់គ្រងតុល្យភាព និងវិភាគស្ថានភាពដីដោយស្វ័យប្រវត្តិ។
* ការរក្សាលំនឹង: អាចធ្វើដំណើរលើផ្លូវថ្ម ចំណោតខ្ពស់ និងផ្ទៃដីមិនស្មើគ្នាដោយមិនរង្គើ។
* ប្រព័ន្ធ GPS: បំពាក់នូវផែនទីច្បាស់លាស់សម្រាប់តម្រង់ទិសដៅ។

ដើម្បីជំរុញនិរន្តរភាពបរិស្ថាន Corleo ប្រើប្រាស់ ម៉ាស៊ីនអ៊ីដ្រូសែនទំហំ ១៥០ស៊ីស៊ី ដើម្បីបង្កើតជាថាមពលអគ្គិសនីសម្រាប់ដំណើរការជើងរ៉ូបូតទាំងបួន។ ជម្រើសថាមពលនេះ ធ្វើឱ្យវាក្លាយជាយានជំនិះដែលបញ្ចេញឧស្ម័នពុលទាបបំផុត (Low-emission)។ យោងតាមក្រុមការងារអភិវឌ្ឍន៍អាជីវកម្ម Safe Adventure របស់ Kawasaki ផែនការពេលវេលាត្រូវបានកំណត់ថា នៅឆ្នាំ២០២៧ គឺដាក់ឱ្យប្រើប្រាស់កម្មវិធីជំនួយការហ្វឹកហាត់ (Simulator) ដើម្បីសម្រួចបច្ចេកវិទ្យា។ ឆ្នាំ២០៣០ បង្ហាញរូបរាងផ្លូវការជាសាធារណៈនៅក្នុងព្រឹត្តិការណ៍ Expo 2030 នៅទីក្រុងរីយ៉ាដ (Riyadh)។ និងឆ្នាំ២០៣៥ ចាប់ផ្តើមចរាចរលក់នៅលើទីផ្សារជាលក្ខណៈពាណិជ្ជកម្មពេញលេញ។

គួរជជម្រាបថា ការផ្លាស់ប្តូរនេះបង្ហាញថា Kawasaki មិនមែនគ្រាន់តែផលិតគ្រឿងចក្រសម្រាប់កម្សាន្តនោះទេ ប៉ុន្តែពួកគេកំពុងបង្កើតដំណោះស្រាយថ្មីសម្រាប់ការដឹកជញ្ជូននាពេលអនាគត ដែលអាចទៅដល់គ្រប់ទីកន្លែង ទោះបីជាកន្លែងដែលកង់មិនអាចទៅដល់ក៏ដោយ៕