(បរទេស)៖ យោងតាមឯកសារតុលាការបានឱ្យដឹងថា អ្នកប្រើប្រាស់ដែលមានអាយុចន្លោះពី១៣ ដល់ ១៥ឆ្នាំ ក្នុងនោះយ៉ាងហោចម្នាក់ក្នុងចំណោម៥នាក់ បានប្រាប់ក្រុមហ៊ុន Meta ថា ពួកគេបានឃើញ «រូបភាពអាក្រាតកាយ ឬរូបភាពផ្លូវភេទនៅលើ Instagram» ដែលពួកគេមិនចង់ឃើញទាល់តែសោះ។ ឯកសារនេះត្រូវបានដាក់ជាសាធារណៈកាលពីថ្ងៃសុក្រសប្តាហ៍មុន ដែលជាផ្នែកមួយនៃបណ្តឹងសហព័ន្ធនៅក្នុងរដ្ឋ California។ យោងតាមខ្លឹមសារដែលភ្នាក់ងារ Reuters បានពិនិត្យ ក្នុងនោះក៏មានបញ្ចូលនូវផ្នែកខ្លះនៃសក្ខីកម្ម (deposition) របស់លោក Adam Mosseri ដែលជាប្រធាន Instagram កាលពីខែមីនា ឆ្នាំ២០២៥ ផងដែរ។

យោងតាមការចេញផ្សាយដោយសារព័ត៌មាន Reuters នៅថ្ងៃទី២៤ ខែកុម្ភៈ ឆ្នាំ២០២៦ បានបង្ហាញថាការស្ទង់មតិនេះត្រូវបានធ្វើឡើងក្នុងចំណោមអ្នកប្រើប្រាស់វ័យក្មេង ហើយលទ្ធផលបង្ហាញពីបញ្ហាប្រឈមដ៏ធំទាក់ទងនឹងសុវត្ថិភាពលើប្រព័ន្ធអ៊ីនធឺណិត។ ព័ត៌មាននេះបានលេចឡើងចំពេលមានការប្តឹងផ្តល់ជាបន្តបន្ទាប់ពីបណ្តារដ្ឋនានានៅសហរដ្ឋអាមេរិក ដែលចោទប្រកាន់ Meta ថាបានដឹងពីគ្រោះថ្នាក់ដែលប៉ះពាល់ដល់សុខភាពផ្លូវចិត្តរបស់យុវជន ប៉ុន្តែមិនបានចាត់វិធានការការពារឱ្យបានគ្រប់គ្រាន់។ ក្រៅពីការឃើញរូបភាពដោយអចេតនា របាយការណ៍ក៏បានលើកឡើងពីបញ្ហា «Sextortion» (ការគំរាមកំហែងបង្ហោះរូបភាពអាសអាភាសដើម្បីជំរិតទារប្រាក់) ដែលកំពុងតែកើនឡើង និងប៉ះពាល់ដល់កុមារយ៉ាងធ្ងន់ធ្ងរ។

ជុំវិញព័ត៌មាននេះ ក្រុមហ៊ុន Meta បានចេញមុខការពារខ្លួនដោយលើកឡើងថា ពួកគេបាននឹងកំពុងដាក់ចេញនូវមុខងារថ្មីៗជាច្រើន ដើម្បីការពារអ្នកប្រើប្រាស់វ័យក្មេង ដូចជា៖
1. ការកំណត់គណនី «Teen Accounts» ដោយស្វ័យប្រវត្តិ។
2. ការដាក់កម្រិតលើសារពីមនុស្សចម្លែក (DMs)។
3. ការប្រើប្រាស់បច្ចេកវិទ្យា AI ដើម្បីស្វែងរក និងលុបខ្លឹមសារដែលមិនសមរម្យ។

គួរជម្រាបថា ករណីនេះគឺជាផ្នែកមួយនៃសម្ពាធផ្លូវច្បាប់កាន់តែខ្លាំងឡើងទៅលើក្រុមហ៊ុនបច្ចេកវិទ្យាយក្ស ដើម្បីធានាថាវេទិការបស់ពួកគេមិនក្លាយជាកន្លែងបង្កគ្រោះថ្នាក់ដល់កុមារ និងយុវជន៕