(ភ្នំពេញ)៖ ពិភពលោកកំពុងឈានដល់របត់ថ្មីមួយនៃការព្យាបាលជំងឺមហារីក បន្ទាប់ពីក្រុមអ្នកវិទ្យាសាស្ត្រនៃសាកលវិទ្យាល័យ Rice University សហរដ្ឋអាមេរិក បានប្រកាសពីជោគជ័យនៃបច្ចេកវិទ្យា «រោងចក្រផលិតថ្នាំបង្កប់ ឬ Drug Factory Implants» ដែលមានសមត្ថភាពកម្ចាត់កោសិកាមហារីកបានយ៉ាងឆាប់រហ័ស និងមានផលប៉ះពាល់តិចតួចបំផុតចំពោះរាងកាយ។

តើអ្វីទៅជាបច្ចេកវិទ្យា «រោងចក្រផលិតថ្នាំ»? បច្ចេកវិទ្យានេះមិនមែនជាការប្រើប្រាស់ថ្នាំលេប ឬការចាក់តាមសរសៃឈាមដែលរត់ពេញរាងកាយនោះទេ ប៉ុន្តែវាគឺជាគ្រាប់តូចៗ ដែលមានទំហំប៉ុន «ក្បាលម្ជុល»។ គ្រាប់ទាំងនេះត្រូវបានបង្កប់ដោយផ្ទាល់នៅក្បែរដុំសាច់មហារីក តាមរយៈប្រតិបត្តិការវះកាត់តូចបំផុត។

នៅក្នុងគ្រាប់នីមួយៗ មានផ្ទុកកោសិកាដែលត្រូវបានកែច្នៃហ្សែនឱ្យផលិតសារធាតុ Interleukin (IL-2 ឬ IL-12) ដែលជាសារធាតុធម្មជាតិម្យ៉ាងជួយដាស់ប្រព័ន្ធការពាររាងកាយឱ្យស្គាល់ និងវាយប្រហារកោសិកាមហារីកដោយស្វ័យប្រវត្តិ ២៤ម៉ោងលើ២៤ម៉ោង។

យោងតាមរបាយការណ៍ស្រាវជ្រាវ ការពិសោធន៍លើសត្វកណ្តុរដែលមានជំងឺមហារីកអូវែ (Ovarian Cancer) និងមហារីកពោះវៀនធំ បានបង្ហាញថា បច្ចេកវិទ្យានេះអាចកម្ចាត់ដុំសាច់ឱ្យរលាយបាត់អស់ ក្នុងរយៈពេលត្រឹមតែ ៦ ថ្ងៃ ប៉ុណ្ណោះ។ សារៈសំខាន់បំផុតនោះគឺ ថ្នាំត្រូវបានបញ្ចេញចំគោលដៅ ១០០% ដែលធ្វើឱ្យកោសិកាល្អៗ និងសរីរាង្គផ្សេងទៀតមិនទទួលរងការខូចខាត ដូចការព្យាបាលតាមបែបចាក់គីមីឡើយ។

បច្ចុប្បន្ន បច្ចេកវិទ្យានេះមិនត្រឹមតែស្ថិតក្នុងមន្ទីរពិសោធន៍នោះទេ វាត្រូវបានសាកល្បងលើមនុស្ស ដោយក្រុមហ៊ុន Avenge Bio បាននិងកំពុងបន្តការសាកល្បងគ្លីនិក (Clinical Trials) លើអ្នកជំងឺមហារីកអូវែពិតប្រាកដ។ គិតត្រឹមដើមឆ្នាំ ២០២៦ នេះ អ្នកស្រាវជ្រាវបានចាប់ផ្តើមអភិវឌ្ឍបន្ថែមដើម្បីប្រើប្រាស់ប្រឆាំងនឹងមហារីកសួត មហារីកលំពែង និងមហារីកថ្លើមផងដែរ។ គម្រោងនេះផងដែរ ក៏ទទួលបានកញ្ចប់ថវិកាឧបត្ថម្ភរហូតដល់ ៤៥ លានដុល្លារ ពីទីភ្នាក់ងារ ARPA-H របស់រដ្ឋាភិបាលអាមេរិក ដើម្បីពន្លឿនការអភិវឌ្ឍឱ្យបានជោគជ័យសម្រាប់ប្រើប្រាស់ជាទូទៅ។

លោកបណ្ឌិត Omid Veiseh សាស្ត្រាចារ្យផ្នែកវិស្វកម្មជីវសាស្ត្រនៃសាកលវិទ្យាល័យ Rice បានមានប្រសាសន៍ថា៖ «យើងមានគោលដៅកាត់បន្ថយអត្រាមរណៈដោយសារជំងឺមហារីកឱ្យបានជាង ៥០% តាមរយៈបច្ចេកវិទ្យានេះ។ វាប្រៀបដូចជាការដាក់ទាហានការពារឱ្យនៅយាមចំពីមុខសត្រូវតែម្តង»។

ទោះជាយ៉ាងណា បច្ចេកវិទ្យានេះនៅត្រូវការពេលវេលាបន្ថែមទៀតក្នុងការសាកល្បងលើមនុស្សឱ្យបានគ្រប់ជ្រុងជ្រោយ ដើម្បីធានាសុវត្ថិភាពខ្ពស់បំផុតមុននឹងដាក់ឱ្យប្រើប្រាស់ជាផ្លូវការនៅតាមមន្ទីរពេទ្យនានាលើពិភពលោក។

តើឧបករណ៍បង្កប់នោះត្រូវដកចេញវិញទេ? គ្រាប់នីមួយៗត្រូវបានរចនាឡើងឱ្យដំណើរការក្នុងរយៈពេលខ្លី (ប្រហែល ៣០ ថ្ងៃ) ដើម្បីកម្ចាត់មហារីក ហើយវានឹងរលាយ ឬឈប់ដំណើរការដោយខ្លួនឯងដោយសុវត្ថិភាព។

តើវាមានការឈឺចាប់ទេ? ការដាក់បញ្ចូលត្រូវបានធ្វើឡើងតាមរយៈការវះកាត់តូចបំផុត ដែលធ្វើឱ្យអ្នកជំងឺឆាប់ជាសះស្បើយ និងមិនត្រូវការស្នាក់នៅមន្ទីរពេទ្យយូរឡើយ៕