(បទរស)៖ យោងតាមការចុះផ្សាយរបស់សារព័ត៌មាន Financial Times (FT) និងដកស្រង់ដោយ Reuters នៅថ្ងៃទី០៤ ខែមីនា ឆ្នាំ២០២៦ នេះបានឱ្យដឹងថា សេតវិមានកំពុងស្ថិតក្នុងកិច្ចពិភាក្សាផ្ទៃក្នុងយ៉ាងតឹងរ៉ឹង អំពីការសម្រេចចិត្តថា តើត្រូវអនុញ្ញាតឱ្យក្រុមហ៊ុនបច្ចេកវិទ្យាយក្សចិន Tencent Holdings បន្តកាន់កាប់ភាគហ៊ុនរបស់ខ្លួននៅក្នុងក្រុមហ៊ុនហ្គេមធំៗរបស់សហរដ្ឋអាមេរិក និងអឺរ៉ុបដែរឬទេ?

មន្ត្រីជាន់ខ្ពស់សហរដ្ឋអាមេរិក​ បានបើកកិច្ចប្រជុំដើម្បីវាយតម្លៃថា តើការវិនិយោគរបស់ Tencent ក្នុងក្រុមហ៊ុនហ្គេមដូចជា Epic Games (អ្នកបង្កើតហ្គេម Fortnite) និង Riot Games (អ្នកបង្កើតហ្គេម League of Legends) អាចបង្កជាហានិភ័យដល់សន្តិសុខជាតិ ឬទិន្នន័យអ្នកប្រើប្រាស់ដែរឬទេ។​ ការពិភាក្សានេះកើតឡើងស្របពេលដែលប្រធានាធិបតីអាមេរិក លោក ដូណាល់ ត្រាំ កំពុងត្រៀមខ្លួនសម្រាប់ជំនួបជាមួយប្រធានាធិបតីចិន លោក ស៊ី ជីនភីង ដែលគ្រោងនឹងធ្វើឡើងនៅក្នុងប្រទេសចិននាខែមេសាខាងមុខ។

ក្រៅពីក្រុមហ៊ុនអាមេរិក Tencent ក៏មានចំណែកភាគហ៊ុនធំនៅក្នុងក្រុមហ៊ុន Supercell របស់ប្រទេសហ្វាំងឡង់ (អ្នកបង្កើតហ្គេម Clash of Clans) ផងដែរ។
រដ្ឋបាលលោក ត្រាំ កំពុងពិចារណាថា តើគួរបង្ខំឱ្យ Tencent បោះបង់ភាគហ៊ុន (Divestment) ឬដាក់លក្ខខណ្ឌតឹងរ៉ឹងផ្សេងៗដើម្បីបន្តការវិនិយោគ។​ រដ្ឋាភិបាលអាមេរិកមានការសង្ស័យជាយូរមកហើយលើលទ្ធភាពដែលរដ្ឋាភិបាលចិនអាចចូលប្រើប្រាស់ទិន្នន័យផ្ទាល់ខ្លួនរបស់ពលរដ្ឋអាមេរិករាប់លាននាក់ តាមរយៈកម្មវិធី និងហ្គេមរបស់ក្រុមហ៊ុនបច្ចេកវិទ្យាចិន។ គណៈកម្មាធិការវិនិយោគបរទេសនៅសហរដ្ឋអាមេរិក (CFIUS) បាននឹងកំពុងតាមដានករណីនេះយ៉ាងដិតដល់។

មកទល់ពេលនេះ ទាំងសេតវិមាន និងក្រុមហ៊ុន Tencent មិនទាន់មានការឆ្លើយតបជាផ្លូវការចំពោះសំណើរសុំការអត្ថាធិប្បាយពីភ្នាក់ងារព័ត៌មាន​ Reuters នៅឡើយទេ៕