(កំពង់ធំ)៖ លោក តាន់ ប៊ុនហុង ប្រធានមន្ទីរអប់រំ យុវជន និងកីឡាខេត្តកំពង់ធំ បានលើកឡើងថា «កីឡានាំមកនៅសុខភាព សាមគ្គីភាព អភិវឌ្ឍគ្រួសារ សង្គមជាតិ និងសន្តិភាព»។

លោក តាន់ ប៊ុនហុង បានថ្លែងក្នុងពិធីបិទ ការប្រកួតកីឡា សិស្សបឋមសិក្សា ជ្រើសរើសជើងឯកថ្នាក់ខេត្ត ប្រចាំឆ្នាំសិក្សា២០២៥ - ២០២៦ នៅបរិវេណវិទ្យាល័យកំពង់ធំ នារសៀលថ្ងៃទី០៨ ខែមីនា ឆ្នាំ២០២៦។

លោកបានកោតសរសើរបំផុតចំពោះការិយាល័យជំនាញ នៃមន្ទីរអប់រំ យុវជន និងកីឡាខេត្ត គណៈកម្មការ និងអនុគណៈកម្មការរៀបចំការប្រកួតព្រមទាំងស្ថាប័ន អង្គភាពពាក់ព័ន្ធនានាក្នុងខេត្ត ដែលបានសហការ និងសម្របសម្រួល ការងារបានយ៉ាងល្អ ប្រសើរ សម្រាប់ដំណើរការរៀបចំការប្រកួតនេះទទួលបានជោគជ័យ ប្រកបដោយមោទនភាព ក្រៃលែង។

លោកបន្តថាកីឡាករ កីឡាការិនីទាំងអស់ ដែលបានមក ចូលរួមក្នុងការប្រកួត ហើយគោរពបានត្រឹមត្រូវ តាមគោលការណ៍ និងបទបញ្ជានៃការប្រកួត និងមាន ស្មារតីស្រឡាញ់កីឡាយ៉ាងពិតប្រាកដ ព្រមទាំងបានទទួលយក នូវលទ្ធផលបច្ចេកទេស ស្រប តាមសមត្ថភាព របស់ខ្លួនមិនគិតតែពីឈ្នះនោះឡើយ » កីឡានាំមកនូវ សុខភាព សាមគ្គី ភាព និងមិត្តភាព។

លោកបន្តទៀតថាការប្រកួតអស់រយៈពេល២ថ្ងៃកន្លងមកនេះ គឺដើម្បីជ្រើសរើសឱ្យបានកីឡាករ និងកីឡាការិនី ដែលមានសមត្ថភាពបច្ចេកទេស ល្អជាងគេបំផុត សម្រាប់ យកទៅចូលរួមប្រកួតកីឡាសិស្សបឋមសិក្សា ជ្រើសរើសជើងឯកថ្នាក់ជាតិ ប្រចាំឆ្នាំសិក្សា ២០២៥-២០២៦។ ដូច្នេះគ្រឹះស្ថានបឋមសិក្សាណាដែលកីឡាករ និងកីឡាការិនី មានសមត្ថភាពល្អទទួលបានជ័យលាភី ក្នុងការប្រកួតនេះ ត្រូវតែខិតខំធ្វើការ ហ្វឹកហាត់ឱ្យបានជាប្រចាំ ដើម្បីបង្កើនកម្រិតសមត្ថភាពបច្ចេកទេស របស់ខ្លួនបន្ថែមទៀតឱ្យ កាន់តែល្អប្រសើរ ត្រៀមលក្ខណៈសម្បត្តិចូលរួមប្រកួត ដណ្តើមយកមេដាយ និងពានរង្វាន់ ថ្នាក់ជាតិ ជូនខេត្តកំពង់ធំឱ្យខាងតែបាន។

លោក តាន់ ប៊ុនហុង សូមអំពាវនាវដល់លោក លោកស្រី ព្រមទាំងសប្បុរសជននានា ដែលស្រឡាញ់វិស័យកីឡា ចូលរួមជួយឧបត្ថម្ភគាំទ្រ ជាសម្ភារកីឡាក្តី ឬជាថវិកាក្តី ដើម្បីលើកទឹកចិត្តដល់កីឡាករ កីឡាការិនី និងក្រុមកីឡា ទាំងអស់ សម្រាប់ផ្គត់ផ្គង់ ក្នុងដំណើរការហ្វឹកហាត់ ក៏ដូចជា ក្នុងដំណើរការប្រកួត ថ្នាក់ជាតិ នាពេលខាងមុខនេះ។

សូមបញ្ជាក់ផងដែរថា រយៈពេល២ថ្ងៃសមាសភាពចូលរួមប្រកួតមាន៖

*១៖ កីឡាបាល់ទាត់ កុមារាចំនួន៨ក្រុម កីឡាករ ១៤៤នាក់ កុមារីចំនួន៤ក្រុម កីឡាការីនីចំនួន៧២នាក់។
*២៖ កីឡាបាល់ទះ កុមារាចំនួន៨ក្រុម កីឡាករ៩៦នាក់ កុមារីចំនួន៥ក្រុម កីឡាការិនីចំនួន៦០នាក់។
*៣៖ កីឡាបាល់បោះកុមារាចំនួន៤ក្រុម កីឡាការចំនួន ៤៨នាក់ កុមារីចំនួន៤ក្រុម កីឡាការិនីចំនួន៤៨នាក់។
*៤៖ កីឡាអត្តពលកម្ម មាន៤ប្រភេទវិញ្ញាសាកុមារាកុមារីមាន(រត់ល្បឿន៦០ម៉ែត្រ លោតកម្ពស់ លោតចម្ងាយ.រត់ចម្ងាយ១.០០០ម៉ែត្រ) ចំនួនកុមារា២៨ កីឡាការិនីចំនួន២៨។ លទ្ធផលនៃការប្រកួតដែលទទួលពានរង្វាន់រួមមាន បាល់ទះកុមារា លេខ១ស្រុកបារាយណ៍ លេខ ២ស្រុកសណ្ដាន់ លេខ៣ស្រុកប្រាសាទបល្ល័ង្ក។ ចំណែកឯបាល់ទាត់កុមារាលេខលេខ១ក្រុងស្ទឹងសែន លេខ២ស្រុកប្រាសាទបល្ល័ង្ក លេខ៣ស្រុកសន្ទុក៕