(បរទេស)៖ យោងតាមរបាយការណ៍ពី The Information ក្រុមហ៊ុន OpenAI កំពុងមានគម្រោងដាក់បញ្ចូល Sora ដែលជាបច្ចេកវិទ្យាបង្កើតវីដេអូដ៏ទំនើប ទៅក្នុងកម្មវិធី ChatGPT ដើម្បីពង្រីកសមត្ថភាពឱ្យកាន់តែសម្បូរបែប។ ការផ្លាស់ប្តូរនេះនឹងធ្វើឱ្យ OpenAI ក្លាយជាគូប្រជែងដ៏ស្រួចស្រាវជាមួយក្រុមហ៊ុនខ្នាតយក្សដូចជា Meta និង Google នៅក្នុងសមរភូមិបច្ចេកវិទ្យា «វីដេអូបង្កើតដោយ AI» (Text-to-Video)។ នេះបើយោងតាមការចេញផ្សាយដោយ CNA នៅថ្ងៃទី១១ ខែមីនា ឆ្នាំ២០២៦។

បច្ចុប្បន្ន ពិភពលោកកំពុងសម្លឹងឃើញថា បច្ចេកវិទ្យាដែលជំនាញខាងបង្កើតវីដេអូ និងរូបភាព គឺជា «ព្រំដែនបន្ទាប់នៃសក្ដានុពលបច្ចេកវិទ្យាសម្រាប់ការផ្លាស់ប្តូរ» បន្ទាប់ពី AI ផ្នែកអត្ថបទបានជោគជ័យកន្លងមក។ Sora ត្រូវបានគេស្គាល់ថាជាឧបករណ៍ដែលអាចបំប្លែងអត្ថបទឱ្យទៅជាវីដេអូបានយ៉ាងរស់រវើក ដែលជួយឱ្យអ្នកប្រើប្រាស់អាចបង្កើតមាតិកាប្លែកៗសម្រាប់ចែករំលែកលើបណ្តាញសង្គមបានយ៉ាងងាយស្រួល។

ទោះបីជាមានការដាក់បញ្ចូលទៅក្នុង ChatGPT ក៏ដោយ ក៏ OpenAI នឹងនៅតែបន្តរក្សា Sora ជាកម្មវិធីដាច់ដោយឡែក (Standalone App) សម្រាប់អ្នកប្រើប្រាស់ទូទៅដដែល។ គិតត្រឹមពេលនេះ ខាងក្រុមហ៊ុន OpenAI មិនទាន់មានការឆ្លើយតបជាផ្លូវការចំពោះសំណើសុំការអត្ថាធិប្បាយជុំវិញព័ត៌មានលម្អិតបន្ថែមនៅឡើយទេ ខណៈដែលអ្នកគាំទ្របច្ចេកវិទ្យាកំពុងរង់ចាំមើលការផ្លាស់ប្តូរដ៏ធំនេះ៕