(ភ្នំពេញ)៖ កាលពីល្ងាចថ្ងៃទី១២ ខែមីនា ឆ្នាំ២០២៦នេះ​ នៅរោងភាពយន្ដ Prime Cineplex ភាពយន្តខ្មែរ​រឿង «ទាយាទធ្មប់» របស់ផលិតកម្មTwo River International បានសម្ពោធដាក់បញ្ចាំងជាផ្លូវការ ក្រោមវត្តតារាល្បីៗ ផលិតករទាំងខ្មែរ បរទេស និងអ្នកជំនាញផលិតភាពយន្ដជាច្រើនរូប​។ភាពយន្ដខ្នាតធំនេះនឹងដាក់បញ្ចាំ​ង​ជាផ្លូវការនៅគ្រប់ភាពយន្ដទាំងអស់នៅទូទាំងប្រទេសចាប់ពីថ្ងៃទី១៩ ខែមីនា ឆ្នាំ២០​២៦ នេះតទៅ ព្រោះជារឿងធំប្រចាំឆ្នាំដែលទស្សនិកជនទន្ទឹងរង់ចាំជាយូរមកហើយ។

លោក ជី សិលា ស្ថាបនិក​ និងជានាយកប្រតិបត្តិក្រុមហ៊ុនសប្បាយ (Sabay) រួមទាំង Sabay Cinema ដែលជាអ្នកបោះទុនម្នាក់ដែរក្នុងរឿង «ទាយាទធ្មប់»​បានឲ្យដឹងថា កន្លងមករឿង​មកហើយ ខណៈ «ទាយាទធ្មប់» វគ្គទី២នេះ សង្ឃឹមថាបងប្អូនចូលរួមគាំទ្រកាន់តែច្រើន។ Sabay Cinema ចង់ជម្រុញកុនខ្មែរឲ្យកាន់តែច្រើន ហើយប្រភេទកុនភ័យរន្ធត់ កុនខ្មោចជាដើម មានការពេញនិយមរហូត ក្មេងៗយុវវ័យនរណាក៏ចូលចិត្តដែរ។ រឿងនេះមិនមែនជាកុនខ្មោចដ៏គួរឲ្យខ្លាចទេ តែជាជំនឿគ្រួសារ មនោសញ្ចេតនាឪពុកម្ដាយ និងកូន វាជារសជាតិថ្មីមួយ។

លោក ជី សិលា បន្ថែមថា Sabay ជាស្លាកយីហោមួយដែលមានអាយុកាល២០​ឆ្នាំ ខណៈលោកនៅក្នុងវិស័យភាពយន្ដ ១៦ឆ្នាំមកហើយ។ លោកថា Sabay Cinema នឹងពង្រឹងអ្វីដែលខ្លួនមានឲ្យកាន់តែមានលក្ខណៈពិសេស ហើយនឹងទៅបើករោងភាពយន្ដបន្ថែមទៀតនៅតាមបណ្ដាខេត្តណាដែលមានប្រជាជនច្រើន នាពេលខាងមុខ។

ចំណែកតារាសម្ដែងល្បី ឌុច លីដា ដែលជាតួអង្គម្នាក់នៅក្នុងរឿង «ទាយាទធ្មប់» បានឲ្យដឹងដែរថា រឿងនេះនាងចំណាយពេលមិនយូរទេ អ៊ីចឹងនាងអាចសម្ដែងបាន ហើយនាងលេងជាតួធ្មប់។នាងថាមិនរួញរាឡើយក្នុងការសម្ដែង បែបណាក៏បានឲ្យតែស័ក្ដិសមជាមួយសាច់រឿង។នាងបន្ថែមថា អាចលេងបានទាំងស៊ិចស៊ី សុភាព ស្លូត គឺទៅតាមសាច់រឿង ហើយធ្វើតួម្ដាយ យាយចាស់ក៏បានគឺនាងមិនប្រកាន់តួទេ​។

តារាសម្ដែងវ័យក្មេង ម៉ានីកា ដែលជាតួអង្គសំខាន់ក្នុងរឿង «ទាយាទធ្មប់»​​ បានឲ្យដឹងថា នាងថតរឿងនេះជួបឈុតពិបាកច្រើនដូចជាការធ្លាក់ទឹក លេងជាមួយភ្លើង ព្រោះជារឿងបែបរន្ធត់ មន្ដអា​គម តែលាយឡំជាមួយក្ដីស្រលាញ់ ម្ដាយនិងកូន។ នាងថាឈុតពិបាកគឺមានចុះទឹក​ជ្រៅ ហើយនាងអត់ចេះហែលទឹកទេ ហើយវាជាលើកទី៤ សម្រាប់នាងក្នុងការថតឲ្យផលិតករបរ​ទេស។ រឿងនេះសង្ឃឹមថាជោគជ័យ ព្រោះអាចមានឈុតពិបាកច្រើន តែនាងនៅតែអាចធ្វើបាន។

លោក Jimmy Henderson ជនជាតិអ៊ីតាលីជាអ្នកដឹកនាំរឿង «ទាយាទធ្មប់» បានឲ្យដឹងថា ការផលិតវគ្គ២ នេះគឺដោយសាតែជោគជ័យវគ្គ១។ លោកមានក្ដីរីករាយដែលបានធ្វើការជាមួយម៉ានីកា និងក្រុមការងារទាំងមូល ហើយលោកបានមកខ្មែរតាំងពីឆ្នាំ២០១១ និងបានផលិត១២រឿងមកហើយ។ លោកជឿជាក់ថារឿង «ទាយាទធ្មប់» និងបំ​បែក​កំណត់ត្រានាពេលខាងមុខ។ផលិតករល្បីឈ្មោះរូបនេះយល់ថាបច្ចុប្បន្នរឿងខ្មែរ ទាំងគុណភាព និងបរិមាណមានការកើនឡើង យ៉ាងតិចបំផុតមានរឿងថ្មីមួយចេញនៅលើរោងភាពយន្ដក្នុង១សប្ដាហ៍ ដែលគួរឲ្យកត់សម្គាល់ ហើយគុណភាពមានការកើនឡើង។ លោកថាចន្លោះពី១ឆ្នាំទៅ១ឆ្នាំកន្លះ រឿងខ្មែរ អាចប្រកួតប្រជែងទីផ្សារនៅប្រទេសជិតខាងបានហើយ។

សូមរំឭកថារឿង «ទាយាទធ្មប់» វគ្គ១ បានដាក់បញ្ចាំងកាលពីថ្ងៃទី១២ ខែធ្នូ ឆ្នាំ២០២៤ ដោយទទួលបានការគាំទ្រច្រើនទើប Two River International ឈានមកផលិតវគ្គ២ និងសម្ពោធជាផ្លូវការនាពេលនេះ៕