(បរទេស)៖ ក្រុមហ៊ុន Alibaba Group នៅថ្ងៃអង្គារសប្តាហ៍នេះ បានប្រកាសដាក់ឱ្យប្រើប្រាស់នូវកម្មវិធីបញ្ញាសិប្បនិម្មិត (AI) ថ្មីមួយសម្រាប់សហគ្រាស ដែលផ្តោតលើប្រព័ន្ធស្វ័យប្រវត្តិកម្ម។ ការបោះជំហាននេះ បានធ្វើឱ្យការប្រកួតប្រជែងក្នុងទីផ្សារ AI Agent (ភ្នាក់ងារ AI) នៅប្រទេសចិនកាន់តែមានភាពស្រួចស្រាវ បន្ទាប់ពីចរន្តនៃឧបករណ៍ OpenClaw បានរីករាលដាលយ៉ាងខ្លាំងក្នុងវិស័យបច្ចេកវិទ្យាកាលពីពេលថ្មីៗនេះ។ នេះបើយោងតាមការចេញផ្សាយដោយសារព័ត៌មាន Reuters នៅថ្ងៃទី១៧ ខែមីនា ឆ្នាំ២០២៦។

កម្មវិធីថ្មីនេះមានឈ្មោះថា «Wukong» ដែលមានសមត្ថភាពអាចសម្របសម្រួលភ្នាក់ងារ AI ជាច្រើនក្នុងពេលតែមួយ ដើម្បីចាត់ចែងការងារអាជីវកម្មដ៏ស្មុគស្មាញ រួមមាន៖
* ការកែសម្រួលឯកសារ និងការធ្វើបច្ចុប្បន្នភាពតារាងទិន្នន័យ (Spreadsheet)
* ការកត់ត្រាសង្ខេបខ្លឹមសារកិច្ចប្រជុំ
* ការស្រាវជ្រាវព័ត៌មាននៅក្នុងកម្មវិធីតែមួយ (Single Interface)

បច្ចុប្បន្ន «Wukong» កំពុងស្ថិតក្នុងដំណាក់កាលសាកល្បង (Beta testing) សម្រាប់តែអ្នកដែលទទួលបានការអញ្ជើញប៉ុណ្ណោះ។ ការបញ្ចេញ «Wukong» នេះ កើតឡើងត្រឹមតែមួយថ្ងៃប៉ុណ្ណោះ បន្ទាប់ពី Alibaba បានប្រកាសរៀបចំរចនាសម្ព័ន្ធក្រុមហ៊ុនឡើងវិញ ក្រោមក្រុមធុរកិច្ចថ្មីឈ្មោះ Alibaba Token Hub (ATH)។ នេះសបញ្ជាក់ឱ្យឃើញពីការជម្រុញយុទ្ធសាស្ត្រទូទាំងក្រុមហ៊ុន ឆ្ពោះទៅរកការប្រើប្រាស់ AI Agent ក្នុងកម្រិតសហគ្រាស។

អ្នកប្រើប្រាស់អាចប្រើប្រាស់ Wukong ជាកម្មវិធីលើកុំព្យូទ័រ (Standalone desktop app) ឬតាមរយៈ DingTalk (ផ្លែតហ្វមការងាររបស់ Alibaba ដែលមានអ្នកប្រើប្រាស់កម្រិតក្រុមហ៊ុនជាង ២០ លាននាក់)។ លើសពីនេះ វាក៏នឹងតភ្ជាប់ជាមួយសេវាកម្មផ្ញើសារល្បីៗផ្សេងទៀតដូចជា Slack, Microsoft Teams និង WeChat ផងដែរ។

គួរជម្រាបថា ការដាក់ចេញនូវផលិតផលថ្មីនេះ ធ្វើឡើងស្របពេលដែលឧបករណ៍ OpenClaw (ឧបករណ៍ AI Agent បែប open-source) កំពុងទទួលបានការចាប់អារម្មណ៍ខ្លាំងក្នុងប្រទេសចិន ដែលជំរុញឱ្យក្រុមហ៊ុនបច្ចេកវិទ្យាធំៗផ្សេងទៀតដូចជា ByteDance, Tencent និងក្រុមហ៊ុន Startup Zhipu ប្រញាប់ប្រញាល់បញ្ចេញផលិតផលស្រដៀងគ្នា ទោះបីជាអាជ្ញាធរមានការព្រមានអំពីហានិភ័យផ្នែកសន្តិសុខក៏ដោយ៕