(បរទេស)៖ ខណៈដែលទីផ្សារទូរសព្ទបត់ត្រូវបានគ្រប់គ្រងដោយក្រុមហ៊ុនយក្សកូរ៉េខាងត្បូង និងក្រុមហ៊ុនចិនជាច្រើនឆ្នាំមកហើយនោះ ពេលនេះមានសញ្ញាកាន់តែច្បាស់ថា ក្រុមហ៊ុន Apple កំពុងត្រៀមខ្លួនយ៉ាងសកម្មដើម្បីចូលមកអង្រួនទីផ្សារនេះ។ យោងតាមរបាយការណ៍ចុងក្រោយពីខ្សែសង្វាក់ផ្គត់ផ្គង់បានឱ្យដឹងថា Apple បានសម្រេចចិត្តបង្កើនចំនួនកម្ម៉ង់អេក្រង់បត់ (Folding Display) ពីដៃគូផ្គត់ផ្គង់ចម្បងរបស់ខ្លួនគឺ Samsung Display និង LG Display ក្នុងកម្រិតមួយយ៉ាងខ្ពស់ដែលមិនធ្លាប់មានពីមុនមក។

ចំណាត់ការនេះត្រូវបានអ្នកវិភាគចាត់ទុកថា ជាការបោះជំហានចេញពីដំណាក់កាលស្រាវជ្រាវ និងអភិវឌ្ឍន៍ ឈានចូលទៅកាន់ដំណាក់កាលត្រៀមផលិតក្នុងខ្នាតធំ ដែលជាសញ្ញាបង្ហាញថា ឧបករណ៍បត់ដំបូងរបស់ Apple អាចនឹងបង្ហាញខ្លួនក្នុងពេលឆាប់ៗខាងមុខ។

មូលហេតុដែលនាំឱ្យ Apple សម្រេចចិត្តបង្កើនចំនួនកម្ម៉ង់នៅពេលនេះ ត្រូវបានគេជឿថា មានជាប់ពាក់ព័ន្ធនឹងភាពជោគជ័យក្នុងការដោះស្រាយបញ្ហាបច្ចេកទេស ដែលក្រុមហ៊ុនធ្លាប់មានការបារម្ភកាលពីពេលកន្លងទៅ។
ជាច្រើនឆ្នាំមកហើយដែល Apple សុខចិត្តដើរយឺតជាងគូប្រជែង ដោយសារក្រុមហ៊ុនមិនទាន់ពេញចិត្តនឹងភាពធន់នៃអេក្រង់បត់ និងបញ្ហាស្នាមផ្នត់ដែលកើតមាននៅចំកណ្ដាលអេក្រង់។ ទោះជាយ៉ាងណា ការបង្កើនចំនួនកម្ម៉ង់យ៉ាងសន្ធឹកសន្ធាប់ពី Samsung និង LG បង្ហាញថា Apple ប្រហែលជាបានរកឃើញដំណោះស្រាយបច្ចេកវិទ្យាអេក្រង់បត់ដែល «ល្អឥតខ្ចោះ» និងមានភាពធន់ខ្ពស់ស្របតាមស្ដង់ដារដ៏តឹងរ៉ឹងរបស់ខ្លួនហើយ។

ទោះជាមានការហក់លោតនៃចំនួនគ្រឿងបន្លាស់ក៏ដោយ ប៉ុន្តែគេនៅមិនទាន់ដឹងច្បាស់ថា តើឧបករណ៍បត់ដំបូងរបស់ Apple នឹងមានរូបរាងជា iPhone ឬជា iPad នោះទេ។ អ្នកជំនាញមួយចំនួនបានដាក់ការរំពឹងទុកថា Apple អាចនឹងបញ្ចេញ iPad ដែលមានអេក្រង់ធំបត់បានជាមុនសិន ដើម្បីស្ទាបស្ទង់ទីផ្សារ និងផ្ដល់បទពិសោធន៍ថ្មីសម្រាប់ការងារការិយាល័យ និងការកម្សាន្ត។ ផ្ទុយទៅវិញ ក៏មានព័ត៌មានលេចធ្លាយថា Apple កំពុងអភិវឌ្ឍ iPhone បត់ផ្ដេកដែលមានរូបរាងតូចច្រឡឹងដូចជាស៊េរី Flip ដែលវាអាចនឹងក្លាយជាអាវុធដ៍មានឥទ្ធិពលបំផុតក្នុងការដណ្ដើមយកចំណែកទីផ្សារពីគូប្រជែង។

ផ្អែកលើស្ថានភាពនៃការកម្ម៉ង់គ្រឿងបន្លាស់នាពេលនេះ កាលបរិច្ឆេទដែលឧបករណ៍បត់របស់ Apple នឹងបង្ហាញខ្លួនជាផ្លូវការត្រូវបានគេរំពឹងទុកថា នឹងកើតឡើងនៅចុងឆ្នាំ ២០២៦ ឬដើមឆ្នាំ ២០២៧។ ការចូលខ្លួនមកដល់របស់ Apple មិនត្រឹមតែជាការបន្ថែមជម្រើសថ្មីសម្រាប់អ្នកប្រើប្រាស់ប៉ុណ្ណោះទេ ប៉ុន្តែវាក៏ជួយជម្រុញឱ្យបច្ចេកវិទ្យាអេក្រង់បត់កាន់តែមានភាពស៊ីវិល័យ និងអាចក្លាយជាស្ដង់ដារថ្មីនៃស្មាតហ្វូននាពេលអនាគត។ បើទោះបីជាតម្លៃនៃឧបករណ៍ថ្មីនេះអាចនឹងស្ថិតក្នុងលំដាប់ខ្ពស់បំផុត (Ultra-Premium) ក៏ដោយ ប៉ុន្តែទំនុកចិត្តរបស់អ្នកប្រើប្រាស់លើម៉ាកសញ្ញា Apple នឹងធ្វើឱ្យផលិតផលនេះក្លាយជាទីចាប់អារម្មណ៍បំផុតក្នុងពិភពបច្ចេកវិទ្យា៕