(បរទេស)៖ រដ្ឋាភិបាលសហរដ្ឋអាមេរិកបានប្រកាសជាផ្លូវការនូវកិច្ចព្រមព្រៀងតម្លៃ ៤,៣ ពាន់លានដុល្លារ រវាងក្រុមហ៊ុន Tesla និងក្រុមហ៊ុន LG Energy Solution ដើម្បីសាងសង់រោងចក្រផលិតអាគុយប្រភេទ LFP ដ៏ធំមួយនៅក្នុងរដ្ឋ Michigan។ គម្រោងនេះត្រូវបានរំពឹងថានឹងចាប់ផ្តើមដំណើរការផលិតនៅឆ្នាំ ២០២៧ ក្នុងគោលបំណងពង្រឹងសមត្ថភាពផលិតកម្មថាមពលស្អាតនៅក្នុងស្រុក និងកាត់បន្ថយការពឹងផ្អែកលើការនាំចូលពីប្រទេសចិនដែលកំពុងជួបបញ្ហាពន្ធគយ។ នេះបើយោងតាមការចេញផ្សាយដោយ CNA នៅថ្ងៃទី១៧ ខែមីនា ឆ្នាំ២០២៦។

ក្រសួងមហាផ្ទៃសហរដ្ឋអាមេរិកបានបញ្ជាក់ពីសារៈសំខាន់នៃគម្រោងនេះថា៖ «កោសិកាអាគុយដែលផលិតនៅអាមេរិក នឹងត្រូវយកទៅប្រើប្រាស់សម្រាប់ប្រព័ន្ធផ្ទុកថាមពល Megapack 3 របស់ Tesla ដែលផលិតនៅទីក្រុង Houston ដែលនេះនឹងបង្កើតឱ្យមានខ្សែសង្វាក់ផ្គត់ផ្គង់អាគុយក្នុងស្រុកយ៉ាងរឹងមាំ»។ ការសម្រេចចិត្តនេះបង្ហាញពីយុទ្ធសាស្ត្រថ្មីរបស់ Tesla ក្នុងការងាកមកប្រើប្រាស់ធនធានក្នុងស្រុកសម្រាប់ផលិតផលផ្ទុកថាមពលខ្នាតយក្សរបស់ខ្លួនវិញ។

កិច្ចព្រមព្រៀងនេះក៏ជាផ្នែកមួយនៃលទ្ធផលនៃកិច្ចប្រជុំកំពូលសន្តិសុខថាមពលឥណ្ឌូប៉ាស៊ីហ្វិក ក្រោមការដឹកនាំរបស់រដ្ឋបាលលោកប្រធានាធិបតី ដូណាល់ ត្រាំ។ វាគឺជាជំហានដោះស្រាយបញ្ហាដែលធ្លាប់មានកន្លងមក ខណៈដែល LG ធ្លាប់បានលាក់បាំងឈ្មោះអតិថិជនរបស់ខ្លួនក្នុងកិច្ចសន្យាផ្គត់ផ្គង់អាគុយសកលកាលពីឆ្នាំមុន ប៉ុន្តែពេលនេះត្រូវបានបញ្ជាក់ច្បាស់ថាជាក្រុមហ៊ុនរបស់មហាសេដ្ឋី Elon Musk។

គួរជម្រាបថា បច្ចុប្បន្ន ទីផ្សារអាគុយប្រភេទ LFP ភាគច្រើនត្រូវបានគ្រប់គ្រងដោយក្រុមហ៊ុនចិន ប៉ុន្តែការវិនិយោគរបស់ LG នៅលើទឹកដីអាមេរិកលើកនេះ នឹងក្លាយជាចំណុចរបត់ថ្មីមួយ។ LG Energy Solution គឺជាក្រុមហ៊ុនផលិតដ៏កម្រមួយនៅអាមេរិកដែលអាចផលិតអាគុយប្រភេទនេះបាន ដែលជួយឱ្យ Tesla អាចបន្តឈានមុខគេក្នុងឧស្សាហកម្មថាមពល ដោយមិនចាំបាច់បារម្ភខ្លាំងពីការប្រកួតប្រជែងឬការរឹតត្បិតពាណិជ្ជកម្មពីបរទេស៕