(ភ្នំពេញ)៖ ក្រុមហ៊ុនផលិតរថយន្តអគ្គិសនីឈានមុខគេរបស់ចិន XPENG កំពុងត្រៀមលក្ខណៈបញ្ចេញរថយន្តអគ្គិសនីម៉ូឌែលថ្មីមួយទៀត ដែលត្រូវបានគេរំពឹងថាមានឈ្មោះ "LISA" គឺ Xpeng Mona D02 ដើម្បីបន្តជោគជ័យបន្ទាប់ពីម៉ូឌែល MONA M03។ នេះបើយោងតាមការចេញផ្សាយដោយសារព័ត៌មានចិន Car News China នាថ្ងៃទី២៤ ខែមីនា ឆ្នាំ២០២៦ ។

រថយន្តស៊េរីថ្មីដែលកំពុងស្ថិតក្នុងដំណាក់កាលសាកល្បង (Spy shots) នេះ មានកូដសម្គាល់ថា D02 ហើយត្រូវបានគេរំពឹងថានឹងបង្ហាញខ្លួនជាផ្លូវការនៅដើមឆ្នាំ២០២៦ នេះ ។ ហើយអ្វីដែលកាន់តែពិសេសនោះ ឈ្មោះ "LISA" ត្រូវបានគេចាត់ទុកថាជាការបង្កប់ន័យដ៏ឆ្លាតវៃ ដោយកាលណាដាក់បញ្ចូលគ្នាជាមួយម៉ូឌែល "MONA" វានឹងក្លាយជាឈ្មោះ "MONALISA" តែម្តង។

លក្ខណៈពិសេសរបស់ម៉ូឌែលថ្មីនេះត្រូវបានរចនាឡើងជារថយន្តប្រភេទ SUV ខ្នាតតូចដែលមានរូបរាងបែបស្ព័រ (Coupe-SUV) និងមានដំបូលកញ្ចក់ Panoramic យ៉ាងស្រស់ស្អាត។ និងបំពាក់បច្ចេកវិទ្យាប្រព័ន្ធបើកបរវៃឆ្លាត (Pure vision-based ADAS) ដែលមិនប្រើ LiDAR ប៉ុន្តែមានសមត្ថភាពខ្ពស់ក្នុងការបើកបរក្នុងទីក្រុង។ ប្រើប្រាស់អាគុយប្រភេទ LFP Blade Battery ដែលអាចបើកបរបានចម្ងាយជិត ៦០០គីឡូម៉ែត្រ ក្នុងការសាកម្តង ដោយរត់លើកម្លាំងម៉ាស៊ីន ២១៥សេះ (160 kW)។

ជាមួយគ្នានេះអ្នកជំនាញយានយន្តបានលើកឡើងថា ការបញ្ចេញម៉ូឌែល "LISA" នេះ គឺជាយុទ្ធសាស្ត្រថ្មីរបស់ក្រុមហ៊ុន XPENG ក្នុងការវាយលុកទីផ្សាររថយន្តអគ្គិសនីដែលមានតម្លៃសមរម្យ ប៉ុន្តែបំពាក់ដោយបច្ចេកវិទ្យាទំនើបបំផុត ដើម្បីប្រកួតប្រជែងជាមួយគូប្រជែងធំៗនៅលើពិភពលោក។

សូមជម្រាបផងថា បច្ចុប្បន្ន ក្រុមហ៊ុន XPENG មិនទាន់បញ្ជាក់ពីតម្លៃផ្លូវការនៅឡើយទេ ប៉ុន្តែស្ថិតក្នុងគម្រោងនេះត្រូវបានគេរំពឹងថា នឹងមានតម្លៃប្រហាក់ប្រហែលនឹងម៉ូឌែល MONA M03 ដែលកំពុងមានការគាំទ្រយ៉ាងខ្លាំងនៅលើទីផ្សារ ខណៈ​រថយន្ត Mona M03 ប្រភេទ Sedan មាន​តម្លៃ​ចាប់ពី 119,800 ដល់ 139,800 យន់ (17,400 ដល់ 20,300 ដុល្លារ​អាមេរិក) ហើយយោងតាម CarNewsChina បានប៉ាន់ប្រមាណ​ថា​រថយន្ត Mona D02 ប្រភេទ SUV ក៏អាច​មាន​តម្លៃ​ប្រកួតប្រជែង​ប្រហែល 150,000 យន់ (21,700 ដុល្លារ​អាមេរិក)៕