(តូក្យូ)៖ ក្រុមហ៊ុនយក្សជប៉ុន Sony Group បានប្រកាសនៅថ្ងៃទី២៧ ខែមីនា ឆ្នាំ២០២៦ នេះថា ខ្លួននឹងធ្វើការតម្លើងថ្លៃការលក់ម៉ាស៊ីនហ្គេម PlayStation 5 (PS5) នៅលើទីផ្សារសកល។ នេះគឺជាការតម្លើងថ្លៃលើកទី២ ហើយក្នុងរយៈពេលមិនដល់មួយឆ្នាំផង ដែលបង្កឡើងដោយសម្ពាធនៃសេដ្ឋកិច្ចសកល និងការកើនឡើងយ៉ាងគំហុកនៃតម្លៃគ្រឿងបង្គុំ ជាពិសេសគឺបន្ទះឈីបអង្គចងចាំ (Memory Chips)។

ការផ្លាស់ប្តូរតម្លៃនេះនឹងចាប់ផ្តើមអនុវត្តចាប់ពីថ្ងៃទី២ ខែមេសា ឆ្នាំ២០២៦តទៅ ដោយមានការប្រែប្រួលតាមតំបន់ដូចខាងក្រោម៖
* នៅសហរដ្ឋអាមេរិក៖ PS5 ម៉ូដែលប្រើថាស (Disc Edition) តម្លើង ១០០ ដុល្លារ (ឡើងដល់ ៦៤៩.៩៩ ដុល្លារ)
* PS5 ម៉ូដែលឌីជីថល (Digital Edition)៖ តម្លើង ១០០ ដុល្លារ (ឡើងដល់ ៥៩៩.៩៩ ដុល្លារ)
* PS5 Pro៖ តម្លើង ១៥០ ដុល្លារ (ឡើងដល់ ៨៩៩.៩៩ ដុល្លារ)
* ឧបករណ៍ផ្សេងៗ៖ ឧបករណ៍បញ្ជាហ្គេមពីចម្ងាយ PlayStation Portal ក៏នឹងឡើងថ្លៃ៥០ ដុល្លារ ផងដែរ (ឡើងដល់ ២៤៩.៩៩ ដុល្លារ)។

ទីផ្សារសំខាន់ៗផ្សេងទៀតដូចជា អឺរ៉ុប អង់គ្លេស និងជប៉ុន ក៏នឹងជួបប្រទះការតម្លើងថ្លៃក្នុងកម្រិតប្រហាក់ប្រហែលគ្នានេះដែរ។ យោងតាមការវិភាគ មូលហេតុចម្បងដែលធ្វើឱ្យតម្លៃគ្រឿងបង្គុំហក់ឡើង គឺដោយសារការរីកចម្រើនយ៉ាងរហ័សនៃ បញ្ញាសិប្បនិម្មិត (AI)។ តម្រូវការបន្ទះឈីបអង្គចងចាំសម្រាប់មជ្ឈមណ្ឌលផ្ទុកទិន្នន័យ (Data Centers) ដើម្បីបម្រើឱ្យ AI បានធ្វើឱ្យក្រុមហ៊ុនផលិតបន្ទះឈីបងាកទៅផ្តល់អាទិភាពលើការផលិតគ្រឿងបង្គុំសម្រាប់ AI ដែលមានប្រាក់ចំណេញខ្ពស់ជាង ជាជាងការផលិតសម្រាប់ឧបករណ៍អេឡិចត្រូនិកប្រើប្រាស់ទូទៅ។ កង្វះខាតការផ្គត់ផ្គង់នេះ បានរុញច្រានឱ្យតម្លៃដើមនៃផលិតកម្មរបស់ Sony កើនឡើង។

អ្នកវិភាគបានលើកឡើងថា ការតម្លើងថ្លៃនេះអាចនឹងធ្វើឱ្យតម្រូវការម៉ាស៊ីនហ្គេមមានការធ្លាក់ចុះ ខណៈដែលសេដ្ឋកិច្ចពិភពលោកកំពុងជួបការលំបាកស្រាប់។ កាលពីត្រីមាសចុងក្រោយនៃឆ្នាំ២០២៥ ការលក់ PS5 បានធ្លាក់ចុះ ១៦% រួចទៅហើយ បើធៀបនឹងឆ្នាំមុន។ ទោះជាយ៉ាងណាក៏ដោយ Sony បានបញ្ជាក់ថា នេះគឺជាជំហានចាំបាច់ដើម្បីធានាថា ក្រុមហ៊ុនអាចបន្តផ្តល់នូវបទពិសោធន៍លេងហ្គេមដែលមានគុណភាពខ្ពស់ និងការច្នៃប្រឌិតថ្មីៗដល់អ្នកប្រើប្រាស់៕