(បរទេស)៖ ទោះបីជាមានការបារម្ភមួយចំនួនពីស្ថិរភាពទីផ្សារបច្ចេកវិទ្យា ប៉ុន្តែនាយកប្រតិបត្តិ (CEO) ក្រុមហ៊ុន MediaTek លោក Rick Tsai បានអះអាងយ៉ាងមុតមាំនៅថ្ងៃព្រហស្បតិ៍ថា និន្នាការបញ្ញាសិប្បនិម្មិត (AI) នៅតែបន្តរីកដុះដាលយ៉ាងខ្លាំង។ លោកបានសង្កត់ធ្ងន់ថា តម្រូវការសម្រាប់មជ្ឈមណ្ឌលទិន្នន័យ (Data Centres) កំពុងមានការកើនឡើងក្នុងល្បឿនលឿនជាងមុន ដែលជាសញ្ញាវិជ្ជមានបំផុតសម្រាប់ឧស្សាហកម្មផលិតបន្ទះឈីបសកល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣០ ខែមេសា ឆ្នាំ២០២៦។

ក្នុងកិច្ចប្រជុំស្តីពីរបាយការណ៍ហិរញ្ញវត្ថុ លោក Rick Tsai បានបញ្ជាក់យ៉ាងច្បាស់ថា៖ «គ្រប់គ្នាអាចមើលឃើញថា តម្រូវការសម្រាប់មជ្ឈមណ្ឌលទិន្នន័យនៅតែបន្តកើនឡើង ហើយថែមទាំងមានល្បឿនលឿនជាងមុនទៀតផង។ គ្មានសំណួរទេថា និន្នាការយក្ស AI គឺនៅតែបន្ត»។ ការលើកឡើងនេះ បានធ្វើឱ្យអ្នកវិនិយោគកាន់តែមានទំនុកចិត្ត ខណៈដែលលោកព្យាករថា ទីផ្សារបន្ទះឈីបសម្រាប់ AI អាចនឹងហក់ឡើងដល់ ៨០ ពាន់លានដុល្លារ ត្រឹមឆ្នាំ ២០២៧។

ភាពជោគជ័យនេះមិនមែនកើតឡើងចំពោះតែ MediaTek ម្នាក់ឯងនោះទេ ក្រុមហ៊ុនយក្សដទៃទៀតដូចជា TSMC, Samsung និង Alphabet (Google) ក៏សុទ្ធតែរាយការណ៍ពីប្រាក់ចំណេញហក់ឡើងខ្ពស់មិនធ្លាប់មាន ដោយសារតែការចំណាយយ៉ាងគំហុកលើបច្ចេកវិទ្យា AI ពីសំណាក់ក្រុមហ៊ុននានាជុំវិញពិភពលោក។ ទោះបីជាអាជីវកម្មទូរស័ព្ទដៃរបស់ MediaTek មានការធ្លាក់ចុះបន្តិចបន្តួច ប៉ុន្តែចំណូលពីផ្នែក AI បានក្លាយជាក្បាលម៉ាស៊ីនថ្មីដែលជួយរុញច្រានតម្លៃភាគហ៊ុនរបស់ក្រុមហ៊ុនឱ្យហក់ឡើងរហូតដល់ ៨៣% ក្នុងឆ្នាំនេះ។

គួរជម្រាបថា​ ការអះអាងរបស់អ្នកដឹកនាំក្រុមហ៊ុនលំដាប់ពិភពលោកនេះ បានបង្ហាញថា AI មិនមែនគ្រាន់តែជាការពេញនិយមមួយឆាវនោះទេ ប៉ុន្តែវាគឺជា «មហានិន្នាការ» ដែលនឹងផ្លាស់ប្តូរមុខមាត់សេដ្ឋកិច្ចបច្ចេកវិទ្យាក្នុងរយៈពេលវែង។ ដូចដែលលោក Tsai បានលើកឡើង MediaTek រំពឹងថានឹងប្រមូលចំណូលបានរាប់ពាន់លានដុល្លារបន្ថែមទៀតពីការលក់បន្ទះឈីបជំនាន់ថ្មី ដើម្បីឆ្លើយតបទៅនឹងតម្រូវការពិភពលោកដែលមិនចេះរីងស្ងួតនេះ៕