(បច្ចេកវិទ្យា)៖ ក្រុមហ៊ុនស្តាតអាប់ចិន Linkerbot កំពុងក្លាយជាទីចាប់អារម្មណ៍ខ្លាំងពាសពេញពិភពលោក ក្រោយប្រកាសត្រៀមដំឡើងតម្លៃខ្លួនឱ្យដល់ ៦ ពាន់លានដុល្លារ។ អ្វីដែលអស្ចារ្យនោះគឺ ក្រុមហ៊ុននេះអាចផលិត «ដៃមនុស្សយន្ត» ដែលមានភាពប៉ិនប្រសប់បំផុត រហូតគ្រប់គ្រងទីផ្សារពិភពលោកបានជាង ៨០% ក្នុងចំណោមដៃយន្តកម្រិតខ្ពស់សម្រាប់មនុស្សយន្តរូបរាងដូចមនុស្ស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៤ ខែឧសភា​ ឆ្នាំ២០២៦។

Linkerbot មិនមែនគ្រាន់តែផលិតដៃសម្រាប់ធ្វើការងារផ្ទះធម្មតានោះទេ ប៉ុន្តែគឺដើម្បីជំនួសការងារសិប្បកម្មកម្រិតខ្ពស់។ លោក Alex Zhou នាយកប្រតិបត្តិក្រុមហ៊ុនបានបញ្ជាក់ថា៖ «គោលដៅរបស់យើង គឺចម្លងរាល់ជំនាញដ៏ប៉ិនប្រសប់របស់មនុស្ស មកដាក់ក្នុងគ្រឿងយន្តរបស់យើង»។ បច្ចុប្បន្ន ដៃយន្តនេះអាចធ្វើការងារបានជាង ៥០០ ប្រភេទ តាំងពីការដោតម្ជុល រហូតដល់ការផលិតគ្រឿងបន្លាស់ដែលមានភាពជាក់លាក់បំផុត។

លោក CEO រូបនេះ ក៏បានបង្ហើបពីក្ដីស្រមៃដែលបំផុសគំនិតដោយតួអង្គ Doraemon ផងដែរ គឺលោកចង់ឃើញមនុស្សយន្តអាចលេងព្យាណូ ម៉ាស្សា ឬសូម្បីតែធ្វើជាពេទ្យធ្មេញ។ លោក Georg Stieler អ្នកជំនាញផ្នែកមនុស្សយន្ត បានលើកឡើងថា ការផលិតដៃគឺជាផ្នែកដែលពិបាកបំផុត ព្រោះសូម្បីតែមហាសេដ្ឋី Elon Musk ក៏ធ្លាប់សារភាពដែរថា ដៃមនុស្សយន្ត Optimus របស់ Tesla បានស៊ីកម្លាំងវិស្វកម្មអស់ជាងពាក់កណ្ដាលនៃគម្រោងទាំងមូលទៅហើយ។

គួរជម្រាបថា បច្ចុប្បន្ន ម្ចាស់រោងចក្រជាច្រើនបានជ្រើសរើសយកតែ «ដៃយន្ត» របស់ Linkerbot ទៅបំពាក់លើគ្រឿងចក្រដែលមានស្រាប់ ដើម្បីចំណេញថវិកា ជាជាងការទិញមនុស្សយន្តពេញមួយតួខ្លួនដែលថ្លៃខ្លាំង។ លោក Zhou បានបន្ថែមដោយភាពជាក់ស្ដែងថា៖ «ម្ចាស់រោងចក្រនៅចិនមានការគិតជាក់ស្តែងនិយមណាស់។ ពួកគេយល់ថា សម្រាប់ការងាររោងចក្រភាគច្រើន គ្រាន់តែមានដៃពីរ និងប្រអប់ដៃដ៏ប៉ិនប្រសប់មួយគូ គឺគ្រប់គ្រាន់ហើយ»។ នេះសបញ្ជាក់ឱ្យឃើញថា បច្ចេកវិទ្យារបស់ Linkerbot មិនត្រឹមតែទំនើបនោះទេ ប៉ុន្តែវាជាដំណោះស្រាយដែលអាចយកទៅប្រើប្រាស់ក្នុងអាជីវកម្មបានយ៉ាងមានប្រសិទ្ធភាព៕