(បរទេស)៖ ក្រុមហ៊ុនយក្សក្នុងវិស័យបច្ចេកវិទ្យាហិរញ្ញវត្ថុ PayPal បានប្រកាសជាផ្លូវការនូវផែនការកាត់បន្ថយបុគ្គលិកទ្រង់ទ្រាយធំរហូតដល់ ២០% នៃកម្លាំងពលកម្មសរុបរបស់ខ្លួន។ ការសម្រេចចិត្តនេះគឺជាផ្នែកមួយនៃយុទ្ធសាស្ត្រ «Turnaround Push» ដើម្បីស្ដារកំណើនប្រាក់ចំណេញ និងបង្កើនភាពប្រកួតប្រជែងនៅក្នុងទីផ្សារទូទាត់ប្រាក់ឌីជីថលដែលកំពុងមានការប្រជែងយ៉ាងខ្លាំងក្លា។

ក្រោមការដឹកនាំរបស់លោក Enrique Lores នាយកប្រតិបត្តិ (CEO) ដែលទើបកាន់តំណែង ក្រុមហ៊ុនកំពុងងាកចេញពីការពង្រីកខ្លួនដោយឥតដែនកំណត់ មកផ្ដោតលើ «ប្រសិទ្ធភាពប្រតិបត្តិការ» វិញ។ ការកាត់បន្ថយបុគ្គលិកប្រមាណ ៤,៧៦០ នាក់នេះ នឹងត្រូវអនុវត្តជាដំណាក់កាលក្នុងរយៈពេល ២ ទៅ ៣ ឆ្នាំខាងមុខ ដើម្បីធានាថាប្រតិបត្តិការអាជីវកម្មមិនមានការរអាក់រអួល។

ក្រុមហ៊ុន PayPal ក៏បានប្រកាសពីផែនការកាត់បន្ថយថ្លៃដើមទ្រង់ទ្រាយធំមួយ ក្នុងទំហំទឹកប្រាក់ ១.៥ពាន់លានដុល្លារ បន្ទាប់ពីលទ្ធផលប្រចាំត្រីមាសទី១ ឆ្នាំ២០២៦ បង្ហាញពីការធ្លាក់ចុះនៃប្រាក់ចំណេញសុទ្ធ បើទោះបីជាចំណូលសរុបកើនឡើងក៏ដោយ។ ថវិកានេះនឹងត្រូវបានបង្វែរទៅវិនិយោគលើការអភិវឌ្ឍផលិតផល និងបច្ចេកវិទ្យាស្នូល។

PayPal គ្រោងប្រើប្រាស់ Artificial Intelligence (AI) ក្នុងកម្រិតខ្ពស់ ដើម្បីធ្វើស្វ័យប្រវត្តិកម្មលើកិច្ចការរដ្ឋបាល និងការគាំទ្រអតិថិជន។ នេះជាសញ្ញាបង្ហាញថា ក្រុមហ៊ុនបច្ចេកវិទ្យាកំពុងផ្លាស់ប្តូររចនាសម្ព័ន្ធពីការប្រើប្រាស់កម្លាំងមនុស្ស មកប្រើប្រាស់បញ្ញាសិប្បនិម្មិតវិញ។

ក្រុមហ៊ុននឹងលុបបំបាត់តំណែងគ្រប់គ្រងថ្នាក់កណ្តាលមួយចំនួន ដើម្បីឱ្យការសម្រេចចិត្តពីថ្នាក់ដឹកនាំទៅកាន់ផ្នែកអនុវត្តផ្ទាល់មានភាពរហ័ស និងកាត់បន្ថយភាពយឺតយ៉ាវនៃប្រព័ន្ធការិយាធិបតេយ្យក្នុងស្ថាប័ន។

ទោះបីជាលទ្ធផលហិរញ្ញវត្ថុត្រីមាសទី១ បង្ហាញពីកំណើនចំណូល ៧% (៨.៣៥ ពាន់លានដុល្លារ) ក៏ដោយ ប៉ុន្តែការរំពឹងទុកលើប្រាក់ចំណេញនាពេលអនាគតហាក់មានភាពមិនប្រាកដប្រជា។ នេះបានធ្វើឱ្យតម្លៃភាគហ៊ុនរបស់ក្រុមហ៊ុនមានការប្រែប្រួល និងធ្លាក់ចុះក្នុងរង្វង់ ១០% បន្ទាប់ពីការប្រកាស ដោយសារអ្នកវិនិយោគរង់ចាំមើលលទ្ធផលជាក់ស្តែងនៃការកាត់បន្ថយចំណាយនេះ៕