(ភ្នំពេញ)៖ វិទ្យាស្ថានបណ្តុះបណ្តាលវិស័យកាត់ដេរនៅកម្ពុជា (CGTI) និងមហាវិទ្យាល័យ ពហុបច្ចេកទេសគ័ងទុង (GDPT) បានសម្ពោធដំណើរការជាផ្លូវការ នូវគំរោង វិទ្យាស្ថាន ជីងស៊ឺ និងវិទ្យាស្ថាន ពហុបច្ចេកវិទ្យាលីងណាន អាទីសាន នៅកម្ពុជា ព្រមទាំងបានចុះហត្ថលេខាលើ អនុស្សរណៈ នៃការយោគយល់គ្នា(MoU) ដើម្បីផ្តល់ការបណ្តុះបណ្តាលបច្ចេកទេសសម្លៀកបំពាក់សម្រាប់និស្សិតកម្ពុជា កសាងសមត្ថភាពសម្រាប់គ្រូបង្វឹក និងនិស្សិតកម្ពុជាជាភាសាចិន ព្រមទាំង ដំណើរទស្សនកិច្ច ផ្លាស់ប្តូរបទពិសោធន៍។

អនុស្សរណៈនៃការយោគយល់គ្នា ដែល បានចុះហត្ថលេខា នៅថ្ងៃទី១៣ ខែមិថុនា ឆ្នាំ២០២៣ មានរយៈពេលបីឆ្នាំ ដោយភាគី ទាំងបីនឹងប្តេជ្ញារួមគ្នា ពង្រឹងសមត្ថភាពធនធានមនុស្ស និងកម្លាំងពលកម្មនៅកម្ពុជា លើជំនាញបច្ចេកទេសសម្លៀកបំពាក់ ដើម្បីជំរុញឱ្យវិស័យនេះកាន់តែរីកចម្រើន និងបង្កើនភាពប្រកួតប្រជែងនៅលើទីផ្សារអន្តរជាតិ។

ថ្លែងនៅក្នុងពិធិចុះកិច្ចព្រមព្រៀងនេះ លោក ថង សាម៉ុន អគ្គនាយករង នៃអគ្គនាយកដ្ឋានអប់រំ បណ្តុះបណ្តាល វិជ្ជាជីវៈ នៃក្រសួងការងារ បានគូសបញ្ជាក់ថា កិច្ចព្រមព្រៀងនេះ គឺជាសមិទ្ធផលដ៏សំខាន់មួយទៀត ក្នុងការពង្រឹងកិច្ចសហប្រតិបត្តិការអន្តរជាតិ ក្នុងវិស័យអប់រំ និងបណ្តុះបណ្តាលបច្ចេកទេសវិជ្ជាជីវៈ ជាពិសេសក្នុងវិស័យកាត់ដេរ និងវាយនភណ្ឌ ដែលនៅតែបន្តដើរតួនាទីយ៉ាងសំខាន់ក្នុងកំណើនសេដ្ឋកិច្ច និងការបង្កើតការងាររបស់ កម្ពុជា។ លោកបន្ថែមថា ការបន្តកិច្ចស ហការនេះ នឹងជួយដល់ការពង្រឹងសមត្ថភាពបច្ចេកទេសដល់កម្លាំងពលកម្មនៅកម្ពុជាបន្ថែមទៀត នៅក្នុងវិស័យកាត់ដេរ ស្បែកជើង និងទំនិញធ្វើដំណើរ តាមរយៈការអភិវឌ្ឍកម្មវិធីបណ្តុះបណ្តាលឯកទេសក្នុងបច្ចេកវិទ្យាកាត់ដេរ វិស្វកម្មឧស្សាហកម្ម ការរចនាឌីជីថល ផលិតកម្មវាយនភណ្ឌ និងវិស័យពាក់ព័ន្ធ។

លោកបន្តថា «កម្មវិធីទាំងនេះស្របគ្នាយ៉ាងខ្លាំងជាមួយនឹងតម្រូវការបច្ចុប្បន្ននៃការផ្លាស់ប្តូរឧស្សាហកម្ម និងឌីជីថលូបនីយកម្ម។ ពួកគេនឹងជួយបំពាក់បំប៉នសិស្ស និងគ្រូបង្វឹករបស់យើងជាមួយនឹងជំនាញជាក់ស្តែង សមត្ថភាពបច្ចេកវិទ្យា និងចំណេះដឹងដែលផ្តោតលើនវានុវត្តន៍ ដែលត្រូវបានទាមទារកាន់តែខ្លាំងឡើងដោយទីផ្សារការងារ»។

លោក Andrew Tey នាយកវិទ្យាស្ថានបណ្តុះបណ្តាលវិស័យកាត់ដេរនៅកម្ពុជា (CGTI) មានប្រសាសន៍ថា ការសហការគ្នានេះ គឺជាការប្តេជ្ញាចិត្តរួមគ្នាក្នុងការបណ្តុះទេពកោសល្យជំនាញសម្រាប់ឧស្សាហកម្មសម្លៀកបំពាក់ វាយនភណ្ឌ និងស្បែកជើង ដែលជាវិស័យសំខាន់សម្រាប់ការអភិវឌ្ឍសេដ្ឋកិច្ចរបស់ប្រទេសកម្ពុជា។

លោក Enjoy Ho ប្រធានសមាគមវាយនភណ្ឌ សម្លៀកបំពាក់ ស្បែកជើង និងផលិត ផលធ្វើដំណើរនៅកម្ពុជា (TAFTAC) បានមានប្រសាសន៍ថា ឧស្សាហកម្មវាយនភណ្ឌ សម្លៀកបំពាក់ ស្បែកជើង និងទំនិញធ្វើដំណើរ គឺជាសសរស្តម្ភនៃវិស័យផលិតកម្មរបស់ប្រទេសកម្ពុជា និងជាកម្លាំងចលករស្នូលនៃការងារ និងកំណើនសេដ្ឋកិច្ច។ បច្ចុប្បន្ននេះ ឧស្សាហកម្មនេះកំពុងឆ្លងកាត់ការផ្លាស់ប្តូរ និងការធ្វើឱ្យប្រសើរឡើងជាលំដាប់។ សហគ្រាសនានាមានតម្រូវការបន្ទាន់កាន់តែខ្លាំងឡើងសម្រាប់ជំនាញបច្ចេកទេសដែលមានស្តង់ដារ មានឯកទេសច្បាស់លាស់ និងមានភាពបត់បែន ខណៈការខ្វះខាតកម្លាំងពលកម្មមានជំនាញខ្ពស់ គឺជាឧបសគ្គដ៏សំខាន់មួយដែលរារាំងដល់ការអភិវឌ្ឍគុណភាព នៃឧស្សាហកម្មរបស់ កម្ពុជា។

លោកបន្ថែមថា«កិច្ចសហប្រតិបត្តិការត្រីភាគីនេះកើតឡើងនៅពេលវេលាត្រឹមត្រូវ និងមានសារៈសំខាន់យ៉ាងខ្លាំង។ យើងកំពុងណែនាំគំរូបណ្តុះបណ្តាលប្រកបដោយភាពច្នៃប្រឌិត និងអាចបត់បែនបាន ដែលរួមបញ្ចូលគ្នានូវ «ការអប់រំសិក្សាពេញម៉ោង និង ការបណ្តុះបណ្តាលជំនាញក្រៅម៉ោង»។ នេះមិនត្រឹមតែបង្កើតប្រព័ន្ធអប់រំសិក្សាឯកទេសជាប្រព័ន្ធប៉ុណ្ណោះ ទេ ប៉ុន្តែថែមទាំងបំពេញតម្រូវការលើកកម្ពស់ជំនាញរយៈពេលខ្លី ដោយបានឆ្លើយតបយ៉ាងច្បាស់លាស់នូវតម្រូវការពិតប្រាកដនៃការអភិវឌ្ឍឧស្សាហកម្មរបស់ប្រទេសកម្ពុជា។ យើងនឹងផ្តល់ជូននូវកម្មសិក្សា និងបណ្តាញការងារដែលមានគុណភាពខ្ពស់សម្រាប់អ្នកហ្វឹកហាត់គម្រោង ដោយសម្រេចបាននូវ ការរៀនសូត្រដែលសមស្របនឹងការអនុវត្ត ការបណ្តុះបណ្តាលដែលសមស្របនឹងតម្រូវការ »។

លោក លីវ កេរ៉ុង លេខាធិការបក្ស នៃមហាវិទ្យាល័យ ពហុបច្ចេកទេសគ័ងទុង (GDPT) បានឱ្យដឹងថា មហាវិទ្យាល័យ ពហុបច្ចេកទេសគ័ងទុង បានបង្កើតឡើងក្នុងឆ្នាំ ១៩៨៥ គឺជាមហាវិទ្យាល័យអប់រំវិជ្ជាជីវៈកម្រិតខ្ពស់ ដែលទទួលបានការឧបត្ថម្ភដោយរដ្ឋាភិបាលប្រជាជនខេត្តក្វាងទុង។ GDPT គឺជាមហាវិទ្យាល័យវិជ្ជាជីវៈកម្រិតខ្ពស់តែមួយគត់នៅក្នុងខេត្តក្វាងទុង ដែលមានជំនាញខាងវាយនភណ្ឌ និងសម្លៀកបំពាក់ ។ បច្ចុប្បន្នសាលានេះមាន សាខាចំនួនបី និងមាននិស្សិតពេញម៉ោងចំនួន ២៣.០០០ នាក់ ដែលផ្តល់ជូនជំនាញចំនួន ៥៨។

លោកបន្តថា«យើងបានបណ្តុះបណ្តាលស្តង់ដារវិជ្ជាជីវៈវាយនភណ្ឌ និងសម្លៀកបំពាក់ចំនួន ២៣ ស្តង់ដារកម្មវិធីសិក្សា និងស្តង់ដារការងារទៅក្រៅប្រទេស និ ងមានកម្មវិធីបណ្តុះបណ្តាល «ជំនាញចិន + វិជ្ជាជីវៈ» ជាច្រើន ដោយបណ្តុះបណ្តាលបុគ្គលិកបច្ចេកទេស និងជំនាញក្នុងស្រុកជាង ៤០០០ នាក់» ៕