(បរទេស)៖ ក្រុមហ៊ុន Alibaba ដែលពិភពលោកស្គាល់ច្បាស់ថាជាស្តេចត្រាញ់ពាណិជ្ជកម្មអេឡិចត្រូនិក (e-Commerce) ម្ចាស់គេហទំព័រ Taobao និង Tmall កំពុងធ្វើការផ្លាស់ប្តូរមុខមាត់ថ្មីទាំងស្រុង តាមរយៈការបំប្លែងខ្លួនទៅជាក្រុមហ៊ុនបច្ចេកវិទ្យាឈានមុខ។ នៅពេលនេះ Alibaba មិនមែនគ្រាន់តែផ្ដោតលើការលក់ទំនិញអនឡាញទៀតឡើយ ប៉ុន្តែបានសម្រេចចិត្តបោះទុនយ៉ាងគំហុករហូតដល់ទៅជាង ៣៨០ ពាន់លានយន់ (ប្រហែល ៥៣ ពាន់លានដុល្លារ) ក្នុងរយៈពេល ៣ ឆ្នាំ ដើម្បីបំប្លែងខ្លួនទៅជាមហាអំណាចហេដ្ឋារចនាសម្ព័ន្ធ AI។

លោក Eddie Wu (Wu Yongming) នាយកប្រតិបត្តិ (CEO) របស់ក្រុមហ៊ុន បានបង្ហើបថា ចំនួនទឹកប្រាក់ចុងក្រោយអាចហក់ឡើងដល់ទៅ ៤៨០ ពាន់លានយន់ (ប្រហែល ៦៩ ពាន់លានដុល្លារ) ឯណោះ។ នេះបើយោងតាមការចេញផ្សាយដោយគេហទំព័រ Explain This Tech។

វិបត្តិកង្វះខាតសមត្ថភាពផ្ទុក៖ គ្រប់ម៉ាស៊ីនមេទាំងអស់ដំណើរការឡើងណែន
មូលហេតុចម្បងដែលបង្ខំឱ្យ Alibaba សម្រេចចិត្តបោះទុនលុយរាប់ពាន់លានបែបនេះ គឺដោយសារតម្រូវការប្រើប្រាស់ AI នៅក្នុងប្រទេសចិនបានផ្ទុះឡើងខ្លាំង រហូតដល់ថ្នាក់ក្រុមហ៊ុនមិនអាចដោះស្រាយទាន់។ នៅក្នុងកិច្ចប្រជុំរាយការណ៍ប្រាក់ចំណូល លោក CEO Eddie Wu បានសារភាពត្រង់ៗថា៖ «ខ្ញុំអាចប្រាប់អ្នកបានថា គ្រប់កាត (Card) ទាំងអស់នៅលើម៉ាស៊ីនមេ (Servers) របស់យើងកំពុងដំណើរការ។ មិនមានកាតណាមួយទំនេរនោះទេ»។

លោកបានបន្ថែមទៀតថា អតិថិជនត្រូវរង់ចាំក្នុងជួរយ៉ាងវែង ហើយតម្លៃសេវាកម្ម AI អាចនឹងត្រូវឡើងថ្លៃនៅពេលអនាគត។ បច្ចុប្បន្ន ប្រទេសចិនក្តោបក្តាប់រហូតដល់ទៅ ៣៦% នៃការប្រើប្រាស់ទិន្នន័យ AI សកលលោក ដែលបានវ៉ាដាច់សហរដ្ឋអាមេរិកទៅទៀត។

តើកញ្ចប់ថវិកា ៥៣ ពាន់លានដុល្លារ នឹងត្រូវយកទៅប្រើប្រាស់លើអ្វីខ្លះ?
ថវិកាដ៏មហាសាលនេះ ត្រូវបានបែងចែកទៅលើគោលដៅរូបវន្តច្បាស់លាស់ចំនួន ៣ រួមមាន៖

* សាងសង់មជ្ឈមណ្ឌលទិន្នន័យ AI (AIDCs)៖ ឆ្លើយតបនឹងការកើនឡើងនៃទិន្នន័យ ក្រុមហ៊ុននឹងបង្កើនទំហំមជ្ឈមណ្ឌលផ្ទុកទិន្នន័យឱ្យធំជាងមុនដល់ទៅ ១០ ដង បើធៀបនឹងកម្រិតក្នុងឆ្នាំ ២០២២។
* ផលិតបន្ទះឈីប AI ផ្ទាល់ខ្លួន៖ ក្រុមហ៊ុនបុត្រសម្ព័ន្ធ T-Head របស់ Alibaba ទើបតែបញ្ចេញឈីបជំនាន់ថ្មីឈ្មោះ Zhenwu M890 ដែលមានសមត្ថភាពខ្លាំងជាងមុន ៣ ដង ក្នុងគោលបំណងកាត់បន្ថយការពឹងផ្អែកលើក្រុមហ៊ុនខួរក្បាល AI យក្សរបស់អាមេរិក Nvidia។ លើសពីនេះ ក្រុមហ៊ុនក៏មានផែនការបញ្ចេញឈីបជំនាន់ក្រោយៗទៀតដូចជាស្រឡាយ V900 និង J900 ក្នុងឆ្នាំបន្តបន្ទាប់ផងដែរ។
* បង្កើតប្រព័ន្ធម៉ាស៊ីនមេធុនធ្ងន់៖ ដាក់ពង្រាយម៉ាស៊ីនមេដែលអាចផ្ទុកឈីប Zhenwu ដល់ទៅ ១២៨ គ្រាប់ក្នុងទូ (Rack) តែមួយ ដើម្បីជួយឱ្យសហគ្រាសក្នុងស្រុកអាចដំណើរការការងារ AI បានលឿន និងរលូន។

ហេតុអ្វីបានជា Alibaba ត្រូវបង្កើនល្បឿន និងប្រឈមមុខនឹងគូប្រជែង?
ក្រុមអ្នកវិភាគបានចង្អុលបង្ហាញពីកត្តាគន្លឹះសំខាន់ៗ ដែលជម្រុញឱ្យមានការសម្រេចចិត្តនេះ៖

* សម្ពាធភូមិសាស្ត្រនយោបាយពីអាមេរិក៖ ច្បាប់រឹតបន្តឹងការនាំចេញរបស់សហរដ្ឋអាមេរិក ធ្វើឱ្យក្រុមហ៊ុនចិនមិនអាចទិញឈីបកម្រិតខ្ពស់ពីលោកខាងលិចបានដោយសេរីឡើយ។ ដូចនេះ បន្ទះឈីបស្រឡាយ Zhenwu របស់ Alibaba គឺជា «ភាពចាំបាច់ផ្នែកយុទ្ធសាស្ត្រ» ដើម្បីរស់។
* និន្នាការនៃ Agentic AI៖ បច្ចេកវិទ្យា AI ស្វយ័តជំនាន់ថ្មី (ដូចជាម៉ូដែល Qwen 3.7-Max របស់ Alibaba ផ្ទាល់) ត្រូវការកម្លាំងម៉ាស៊ីនខ្លាំងដើម្បីដំណើរការការងារស្មុគស្មាញបានរាប់សិបឈុតជាប់ៗគ្នា។
* ការប្រកួតប្រជែងយ៉ាងស្រួចស្រាល់ក្នុងស្រុក៖ មិនមែនមានតែ Alibaba នោះទេដែលកំពុងបោះទុន។ គូប្រជែងធំៗដូចជា ByteDance (ក្រុមហ៊ុនមេរបស់ TikTok) កំពុងចំណាយទុនរហូតដល់ ២៨ ពាន់លានដុល្លារលើប្រព័ន្ធម៉ូដែល AI របស់ខ្លួន (Doubao) ខណៈដែល Tencent ក៏បានបង្កើនកញ្ចប់ថវិកាវិនិយោគលើផ្នែកបច្ចេកវិទ្យារបស់ខ្លួនរហូតដល់ ៦៣% ផងដែរ។ ស្ថានភាពនេះបង្ខំឱ្យ Alibaba មិនអាចដកថយបានឡើយ។

ការគណនាផលត្រឡប់មកវិញ (ROI) ឬ (Return on Investment) ដែលមានភាពច្បាស់លាស់
ទោះបីជាការចំណាយដ៏ធំសម្បើមនេះ ធ្វើឱ្យប្រាក់ចំណូលកែតម្រូវ (EBITA) របស់ Alibaba ធ្លាក់ចុះរហូតដល់ ៨៤.៤% នៅក្នុងត្រីមាសចុងក្រោយ (ដោយសារការសម្រុកវិនិយោគ និងការផ្សព្វផ្សាយកម្មវិធី Qwen) ក៏ដោយ ប៉ុន្តែថ្នាក់ដឹកនាំនៅតែមានជំនឿចិត្តខ្ពស់។ លោក CEO Eddie Wu បានបញ្ជាក់ប្រាប់អ្នកវិភាគថា៖ «ផ្អែកលើលក្ខខណ្ឌតម្រូវការក្នុងរយៈពេលពី ៣ ទៅ ៥ ឆ្នាំខាងមុខ ផលត្រឡប់មកវិញលើការវិនិយោគ (ROI - Return on Investment) ពីមជ្ឈមណ្ឌលទិន្នន័យ AI ដែលយើងកំពុងសាងសង់គឺមានភាពប្រាកដប្រជាណាស់»។

ការអះអាងនេះត្រូវបានគាំទ្រដោយលទ្ធផលស្ទង់មតិចុងក្រោយពីស្ថាប័នផ្ដល់ប្រឹក្សាហិរញ្ញវត្ថុ Morgan Stanley ទៅលើប្រធានផ្នែកព័ត៌មានវិទ្យា (CIOs) នៅក្នុងប្រទេសចិន ដែលបានរកឃើញថា Alibaba ត្រូវបានគេមើលឃើញថាជាអ្នកដឹកនាំ និងជាអ្នកឈ្នះដ៏ធំបំផុតនៅក្នុងសមរភូមិ AI នេះ ដោយទទួលបានការគាំទ្រកើនឡើងពី ៣២% ដល់ ៤១% នាំមុខដាច់លើគូប្រជែងរួមមាន ByteDance និង Tencent។

អ្នកវិភាគរបស់ Morgan Stanley បានសរសេរកត់សម្គាល់នៅក្នុងរបាយការណ៍ថា៖ «ជាមួយនឹងសមត្ថភាព AI ពេញលេញ (Full-stack AI) Alibaba ត្រូវបានរៀបចំទីតាំងរួចរាល់ដើម្បីក្លាយជាអ្នកឈ្នះដ៏សំខាន់នៅក្នុងទម្រង់ AI របស់ប្រទេសចិន»។

គួរជម្រាបថា ការភ្នាល់ទឹកប្រាក់ ៥៣ ពាន់លានដុល្លារនេះ មិនមែនជាការសម្រេចចិត្តដើម្បីគ្រាន់តែធ្វើការសាកល្បងនោះឡើយ ប៉ុន្តែវាជាភាពចាំបាច់ផ្នែកយុទ្ធសាស្ត្រដើម្បីរស់រានមានជីវិត និងរក្សាភាពជាអ្នកដឹកនាំទីផ្សារ។ នៅក្នុងពិភពបច្ចេកវិទ្យាបច្ចុប្បន្ន ការប្រណាំងប្រជែងអាវុធ AI មិនមែនស្ថិតនៅលើតែអ្នកណាបង្កើតកម្មវិធីបានឆ្លាតជាងគេនោះទេ ប៉ុន្តែវាស្ថិតនៅលើ «អ្នកណាដែលគ្រប់គ្រងហេដ្ឋារចនាសម្ព័ន្ធរូបវន្ត និងម៉ាស៊ីនមេពិតប្រាកដ» ដែលដំណើរការកម្មវិធីទាំងនោះ ហើយ Alibaba បានជ្រើសរើសធ្វើជាម្ចាស់នៅលើសមរភូមិផ្នែក Hardware មួយនេះ៕