(បរទេស)៖ នៅថ្ងៃសុក្រសប្តាហ៍នេះ ការិយាល័យសិទ្ធិមនុស្សនៃអង្គការសហប្រជាជាតិ (UN) បានអំពាវនាវឱ្យរដ្ឋាភិបាលនានា បង្កើនការរឹតបន្តឹងបទប្បញ្ញត្តិ និងការត្រួតពិនិត្យឱ្យបានម៉ឺងម៉ាត់ជាងមុន ដើម្បីធ្វើយ៉ាងណាឱ្យបណ្តាញទំនាក់ទំនងសង្គម និងផ្លែតហ្វម (Platforms) អនឡាញនានា មានសុវត្ថិភាពសម្រាប់កុមារ។

លោក Volker Tuerk ស្នងការជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្ស បានថ្លែងនៅក្នុងសេចក្តីថ្លែងការណ៍មួយថា៖ «ការបង្កើនកិច្ចការពារកុមារនៅលើប្រព័ន្ធអ៊ីនធឺណិត គឺជាអាទិភាពដ៏បន្ទាន់មួយ ដែលយើងត្រូវតែធានាថា មិនត្រឹមតែត្រូវតែធ្វើឱ្យបានសម្រេចនោះទេ ប៉ុន្តែត្រូវតែធ្វើវាឱ្យបានត្រឹមត្រូវបំផុត»។ លោកបានបន្ថែមទៀតថា ក្រុមហ៊ុនបច្ចេកវិទ្យាទាំងអស់ ចាំបាច់ត្រូវតែបញ្ចូលកម្មវិធី ឬមុខងារការពារសុវត្ថិភាពកុមារទៅក្នុងប្រព័ន្ធបច្ចេកវិទ្យារបស់ពួកគេផ្ទាល់តែម្តង។

គួរជម្រាបថា មូលហេតុដែល UN ជំរុញរឿងនេះបន្ទាន់ ព្រោះបច្ចុប្បន្ន កុមារប្រឈមនឹងហានិភ័យធំៗចំនួន ៣នៅលើពិភពអនឡាញ គឺ ការកេងប្រវ័ញ្ច និងការបៀតបៀនបានកើនឡើងនៃរូបភាព/វីដេអូមិនសមរម្យ និងការបោកប្រាស់ ឬល្បួងកុមារតាមអនឡាញ (Cyberbullying & Online Grooming)។ ផលប៉ះពាល់ផ្លូវចិត្ត ដោយមាតិកាដែលបង្ហាញពីហិង្សា ភាពស៊ីវិល័យហួសហេតុ និងការញៀននឹងបណ្តាញសង្គម ដែលធ្វើឱ្យប៉ះពាល់ដល់ការលូតលាស់ខួរក្បាល និងសុខភាពផ្លូវចិត្តរបស់កុមារ។ និងមួយទៀត គឺឯកជនភាពទិន្នន័យ ដោយក្រុមហ៊ុនបច្ចេកវិទ្យាធំៗជារឿយៗប្រមូលទិន្នន័យផ្ទាល់ខ្លួនរបស់កុមារ ដើម្បីគោលបំណងពាណិជ្ជកម្ម និងការផ្សាយពាណិជ្ជកម្ម៕