(បរទេស)៖ យោងតាមការរាយការណ៍ពីសារព័ត៌មាន The Verge ក្រុមហ៊ុន Microsoft បានសម្រេចដាក់កម្រិតមិនឱ្យបុគ្គលិករបស់ខ្លួនប្រើប្រាស់កម្មវិធី AI ជំនាន់ថ្មី Claude Fable 5 របស់ក្រុមហ៊ុន Anthropic ឡើយ។ ការសម្រេចចិត្តនេះធ្វើឡើងភ្លាមៗ បន្ទាប់ពីក្រុមហ៊ុន Anthropic បានដាក់ចេញនូវគោលការណ៍រក្សាទុកទិន្នន័យថ្មី ដែលធ្វើឱ្យប៉ះពាល់ដល់ការការពារព័ត៌មានសម្ងាត់របស់ក្រុមហ៊ុន និងទិន្នន័យឯកជនរបស់អតិថិជន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១១ ខែមិថុនា​ ឆ្នាំ២០២៦។

Claude Fable 5 គឺជាម៉ូដែល AI ដ៏មានឥទ្ធិពលបំផុតចុងក្រោយបង្អស់របស់ Anthropic ដែលមានសមត្ថភាពខ្ពស់ខាងវិស្វកម្មកម្មវិធី និងការវិភាគទិន្នន័យ។ ទោះជាយ៉ាងណា គោលការណ៍ថ្មីរបស់វាបានចែងថា រាល់សំណួរ (Prompts) និងលទ្ធផល (Outputs) ទាំងអស់ នឹងត្រូវរក្សាទុកក្នុងប្រព័ន្ធរយៈពេល ៣០ ថ្ងៃសម្រាប់គោលបំណងសុវត្ថិភាព ហើយអាចរក្សាទុកហូតដល់ ២ ឆ្នាំ ប្រសិនបើប្រព័ន្ធរកឃើញការល្មើសច្បាប់ ដែលចំណុចនេះហើយបានធ្វើឱ្យក្រុមការងារច្បាប់របស់ Microsoft ត្រូវបង្ខំចិត្តលូកដៃចូលវាយតម្លៃ និងផ្អាកការប្រើប្រាស់ផ្ទៃក្នុងសិន។

គួរជម្រាបថា​ ការរឹតបន្តឹងនេះបានកើតឡើងចំពេលដែល Anthropic កំពុងមានសន្ទុះខ្លាំង ដោយសារព័ត៌មានបានទម្លាយថា ក្រុមហ៊ុនទើបតែបានប្រមូលទុនបន្ថែមចំនួន ៦៥ ពាន់លានដុល្លារ កាលពីចុងខែឧសភា កន្លងទៅ ដែលធ្វើឱ្យតម្លៃវាយតម្លៃក្រុមហ៊ុនសរុបហក់ឡើងដល់ ៩៦៥ ពាន់លានដុល្លារ នាំមុខគូប្រជែងចាស់វស្សា OpenAI ទៅទៀត ព្រមទាំងបានដាក់ពាក្យស្នើសុំជាសម្ងាត់ដើម្បីបោះផ្សាយលក់មូលបត្រជាសាធារណៈ (IPO) នៅសហរដ្ឋអាមេរិកថែមទៀតផង៕