(វ៉ាស៊ីនតោន)៖ តុលាការឧទ្ធរណ៍សហរដ្ឋអាមេរិក នៅថ្ងៃព្រហស្បតិ៍សប្តាហ៍នេះ បានប្រកាសគាំទ្ររដ្ឋអូហៃយ៉ូ (Ohio) អាចបន្តអនុវត្តច្បាប់ថ្មីមួយ ដែលតម្រូវឱ្យក្រុមហ៊ុនបណ្តាញសង្គមយក្សនានារួមមាន Instagram, TikTok និង YouTube ត្រូវសុំការអនុញ្ញាតពីមាតាបិតាជាមុនសិន មុននឹងអនុញ្ញាតឱ្យកុមារដែលមានអាយុក្រោម ១៦ឆ្នាំ អាចចូលប្រើប្រាស់ប្រព័ន្ធរបស់ពួកគេបាន។ នេះបើយោងតាមការចេញផ្សាយដោយសារព័ត៌មាន Reuters នៅថ្ងៃទី១៩ ខែមិថុនា ឆ្នាំ២០២៦។

សេចក្តីសម្រេចក្នុងសំឡេង ២ទល់នឹង១ ពីគណៈវិនិច្ឆ័យនៃតុលាការឧទ្ធរណ៍សហព័ន្ធតំបន់ទី៦ ដែលមានមូលដ្ឋាននៅទីក្រុងស៊ីនស៊ីណាទី បានធ្វើការលុបចោលសេចក្តីសម្រេចរបស់តុលាការជាន់ទាប ដែលធ្លាប់បានផ្អាកការអនុវត្តច្បាប់នេះជាបណ្តោះអាសន្ន តាមបណ្តឹងរបស់ក្រុមពាណិជ្ជកម្មបច្ចេកវិទ្យា NetChoice។ តុលាការឧទ្ធរណ៍បានរកឃើញថា ច្បាប់ស្តីពី «ការជូនដំណឹងដល់មាតាបិតាអំពីប្រព័ន្ធផ្សព្វផ្សាយសង្គម» ឬ (Social Media Parental Notification Act) នេះ មិនបានរំលោភលើកិច្ចការពារសេរីភាពនៃការបញ្ចេញមតិ ក្រោមវិសោធនកម្មទីមួយនៃរដ្ឋធម្មនុញ្ញសហរដ្ឋអាមេរិកនោះឡើយ។

ចៅក្រមតុលាការឧទ្ធរណ៍ លោក Eric Clay បានគូសបញ្ជាក់នៅក្នុងការសម្រេចនោះថា បើទោះបីជាច្បាប់នេះអាចបង្កើតជាបន្ទុកខ្លះដល់ក្រុមហ៊ុនបច្ចេកវិទ្យា និងកម្រិតលើរបៀបចែកចាយមាតិការបស់ពួកគេក៏ដោយ ប៉ុន្តែវាត្រូវបានបង្កើតឡើងក្នុងគោលបំណងច្បាស់លាស់ និងចំគោលដៅ ដើម្បីឆ្លើយតបទៅនឹងកង្វល់ដ៏សំខាន់របស់រដ្ឋអូហៃយ៉ូ ក្នុងការការពារកុមារពីគ្រោះថ្នាក់ និងការយល់ព្រមលើលក្ខខណ្ឌផ្សេងៗដោយគ្មានការត្រួតពិនិត្យពីអាណាព្យាបាល។ ងាកមកក្រុម NetChoice ដែលជាតំណាងឱ្យក្រុមហ៊ុនបច្ចេកវិទ្យាធំៗ រួមមាន Meta, Alphabet និង TikTok បានបង្ហាញការខកចិត្តជាខ្លាំង។ ក្រុមនេះបានប្រកែកថា ច្បាប់នេះមានភាពស្រពិចស្រពិល និងរំលោភលើឯកជនភាពលើប្រព័ន្ធអ៊ីនធឺណិត ក៏ដូចជាសិទ្ធិរដ្ឋធម្មនុញ្ញរបស់ប្រជាពលរដ្ឋនៅក្នុងរដ្ឋអូហៃយ៉ូ។ ពួកគេបានអះអាងបន្ថែមថា ពួកគេនៅតែមានជំនឿចិត្តយ៉ាងមុតមាំថា ច្បាប់ដែលពួកគេចាត់ទុកថាផ្ទុយនឹងរដ្ឋធម្មនុញ្ញមួយនេះ នឹងត្រូវប្រកាសទុកជាមោឃៈជាអចិន្ត្រៃយ៍នៅពេលក្រោយ។

គួររំលឹកផងដែរថា ច្បាប់របស់រដ្ឋអូហៃយ៉ូនេះ ត្រូវបានអនុម័តដោយសភារដ្ឋតាំងពីឆ្នាំ២០២៣ និងបានចូលជាធរមានក្នុងខែមករា ឆ្នាំ២០២៤ ប៉ុន្តែត្រូវបានរារាំងមិនឱ្យអនុវត្តភ្លាមៗ ដោយចៅក្រមស្រុកអាមេរិក លោក Algenon Marbley ក្រោយពីមានការប្តឹងតវ៉ា។ ច្បាប់នេះតម្រូវឱ្យអ្នកប្រតិបត្តិការគេហទំព័រទាំងឡាយណា ដែលត្រូវបានរំពឹងទុកថាមានកុមារចូលប្រើប្រាស់ ត្រូវតែផ្ទៀងផ្ទាត់អាយុរបស់អ្នកប្រើប្រាស់ ដោយផ្អែកលើកត្តាកំណត់ចំនួន ១១ ចំណុច។ ការសម្រេចចិត្តរបស់តុលាការអាមេរិកនៅពេលនេះ បានធ្វើឡើងចំពេលដែលរដ្ឋាភិបាលជាច្រើននៅជុំវិញពិភពលោក រួមទាំងប្រទេសអូស្ត្រាលីផងដែរ កំពុងបង្កើនការរឹតបន្តឹង និងបង្កើតច្បាប់ថ្មីៗ ដើម្បីការពារយុវជនពីផលប៉ះពាល់អវិជ្ជមាននៃបណ្តាញសង្គម ទៅលើសុខភាពផ្លូវចិត្ត និងសុវត្ថិភាពទូទៅរបស់ពួកគេ ដែលនេះជាកង្វល់សកលនាពេលបច្ចុប្បន្ន៕