(ស៊ីដនី)៖ ច្បាប់ស្តីពីការហាមឃាត់មិនឱ្យកុមារ និងយុវជនអាយុក្រោម ១៦ឆ្នាំ ប្រើប្រាស់បណ្តាញសង្គមរបស់ប្រទេសអូស្ត្រាលី ដែលជាច្បាប់ដំបូងបង្អស់លើពិភពលោក កំពុងតែរងការរិះគន់ថា «គ្មានប្រសិទ្ធភាព និងបរាជ័យតាំងពីជំហានដំបូង» ក្នុងការអនុវត្តប្រព័ន្ធផ្ទៀងផ្ទាត់អាយុ (Age Checks)។ នេះបើយោងតាមលទ្ធផលនៃរបាយការណ៍ស៊ើបអង្កេត និងស្រាវជ្រាវផ្តាច់មុខដែលត្រូវបានចុះផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី០៧ ខែកក្កដា ឆ្នាំ២០២៦។

តាមការទម្លាយព័ត៌មានពីក្រុមអ្នកជំនាញតេស្តសូហ្វវែរមកពីក្រុមហ៊ុន KJR ដែលជាស្ថាប័នធ្លាប់បានផ្តល់ប្រឹក្សាបច្ចេកទេសផ្ទាល់ដល់រដ្ឋាភិបាលអូស្ត្រាលី ក្នុងការរៀបចំប្រព័ន្ធការពារកុមារ បានឱ្យដឹងថា បណ្តាញសង្គមធំៗមិនបានទាមទារ ឬសួររកភស្តុតាងបញ្ជាក់អាយុទាល់តែសោះ នៅក្នុងដំណាក់កាលចុះឈ្មោះដំបូង។ នៅក្នុងការសាកល្បងសម្ងាត់មួយ ក្រុមការងារបានបង្កើតគណនីគំរូចំនួន ៥០ គណនីនៅលើបណ្តាញសង្គមល្បីៗ រួចបំពេញអាយុត្រឹម ១៦ឆ្នាំ (ដែលជាអាយុប្រកៀកប្រកិតនឹងការហាមឃាត់) ប៉ុន្តែប្រព័ន្ធរបស់ក្រុមហ៊ុនបច្ចេកវិទ្យាទាំងអស់នោះ មិនបានបង្ហាញផ្ទាំងទាមទារឱ្យផ្ទៀងផ្ទាត់អត្តសញ្ញាណប័ណ្ណ ឬរូបថតសូម្បីតែម្តង។

លោក អេនឌ្រូ ហែមម៉ុន (Andrew Hammond) នាយកក្រុមហ៊ុនតេស្តបច្ចេកវិទ្យា KJR បានថ្លែងប្រាប់ Reuters ថា៖ «តាមគោលការណ៍ច្បាប់ ក្រុមហ៊ុនទាំងនោះត្រូវតែទាមទារឱ្យអ្នកប្រើប្រាស់បង្ហាញភស្តុតាងបញ្ជាក់អាយុពិតប្រាកដ ប៉ុន្តែជាក់ស្តែង យើងមិនដែលត្រូវបានគេសួររកការផ្ទៀងផ្ទាត់ ឬតម្រូវឱ្យប្រើប្រាស់វិធានការធានាអាយុ (Age-assurance measures) ណាមួយឡើយ ក្នុងកំឡុងពេលចុះឈ្មោះបង្កើតគណនីថ្មី»។

ចំណុចខ្សោយដ៏ធំធេងដែលត្រូវបានរកឃើញនៅក្នុងខ្សែសង្វាក់គ្រប់គ្រងរបស់បណ្តាញសង្គម រួមមាន ការធ្លាយធ្លាយតាំងពីច្រកចូល។ ខណៈពេលដែលរដ្ឋាភិបាលខំផ្តោតលើភាពត្រឹមត្រូវនៃសូហ្វវែរស្កេនមុខ ប៉ុន្តែប្រព័ន្ធចម្រោះជំហានដំបូងរបស់បណ្តាញសង្គម (ដែលប៉ាន់ស្មានអាយុអ្នកប្រើប្រាស់ផ្អែកលើសកម្មភាពទូទៅលើអ៊ីនធឺណិត) បែរជាមិនដំណើរការ និងមិនបានបញ្ជូនគណនីគួរឱ្យសង្ស័យទៅកាន់ដំណាក់កាលឆែកអត្តសញ្ញាណប័ណ្ណនោះឡើយ។ ការលួចបន្លំកម្រិតខ្ពស់ពីយុវជន ដោយ យោងតាមការសិក្សាមួយផ្សេងទៀតដែលចុះផ្សាយក្នុងទិនានុប្បវត្តិវេជ្ជសាស្ត្រចក្រភពអង់គ្លេស (BMJ) បានរកឃើញថា យុវជនក្រោមអាយុ ១៦ឆ្នាំប្រមាណជាង ៨០% នៅតែបន្តប្រើប្រាស់បណ្តាញសង្គម Instagram, Snapchat, TikTok និង YouTube បានដោយរលូន តាមរយៈការភូតភរថ្ងៃខែឆ្នាំកំណើត ការប្រើប្រាស់គណនីក្លែងក្លាយ ឬគណនីខ្ចីពីមនុស្សចាស់ និងការប្រើប្រាស់ប្រព័ន្ធប្តូរទីតាំងអ៊ីនធឺណិត (VPN)។

ជុំវិញភាពធូររលុង និងការមិនយកចិត្តទុកដាក់របស់ក្រុមហ៊ុនបច្ចេកវិទ្យាយក្ស (Big Tech) នេះ បានធ្វើឱ្យរាជរដ្ឋាភិបាលអូស្ត្រាលី ដឹកនាំដោយនាយករដ្ឋមន្ត្រី លោក អេនថូនី អាល់បានីស៊ី (Anthony Albanese) ក្តៅក្រហាយយ៉ាងខ្លាំង។ កាលពីខែមិថុនា ឆ្នាំ២០២៦ កន្លងទៅថ្មីៗនេះ រដ្ឋាភិបាលបានសម្រេចចិត្តអនុម័តច្បាប់បន្ថែម ដោយដំឡើងប្រាក់ពិន័យទ្វេដង រហូតដល់ទៅ ៩៩ លានដុល្លារអូស្ត្រាលី (ប្រមាណ ៦៦ លានដុល្លារអាមេរិក) ចំពោះក្រុមហ៊ុនណាដែលបណ្តែតបណ្តោយឱ្យមានការល្មើសច្បាប់ជាលក្ខណៈប្រព័ន្ធ ព្រមទាំងគំរាមចាត់វិធានការតាមផ្លូវតុលាការថែមទៀតផង។

ទោះជាយ៉ាងណាក៏ដោយ តំណាងក្រុមហ៊ុនបច្ចេកវិទ្យាយក្សមួយចំនួនបានបដិសេធការចោទប្រកាន់ និងបានការពារខ្លួនដោយលើកឡើងថា ពួកគេកំពុងអនុវត្តតាមការណែនាំជាជំហានៗរបស់ស្នងការសុវត្ថិភាពអ៊ីនធឺណិត ដែលតម្រូវឱ្យបង្កើតប្រព័ន្ធផ្ទៀងផ្ទាត់មួយដែលមានភាពរលូន និងមិនបង្កការរំខានខ្លាំងពេកដល់អ្នកប្រើប្រាស់៕