(បរទេស)៖ ក្រុមហ៊ុន Tata Consultancy Services (TCS) ដែលជាក្រុមហ៊ុនសេវាកម្មបច្ចេកវិទ្យាព័ត៌មាន (IT) ធំបំផុតរបស់ប្រទេសឥណ្ឌា បានប្រកាសពីផែនការយុទ្ធសាស្ត្រក្នុងការបង្កើតក្រុមវិស្វករជំនាញដាក់ពង្រាយបច្ចេកវិទ្យា (Forward-deployed engineers) រហូតដល់ ៨,៩០០ នាក់ និងកំពុងស្វែងរកឱកាសទិញយកក្រុមហ៊ុន AI នានា។ ការប្រកាសនេះធ្វើឡើងដើម្បីឆ្លើយតបទៅនឹងក្តីបារម្ភរបស់វិនិយោគិនដែលថា បច្ចេកវិទ្យា AI អាចនឹងមកបង្អាក់ ឬបំផ្លាញឧស្សាហកម្មសេវាកម្ម IT តម្លៃ ៣១៥ ពាន់លានដុល្លាររបស់ឥណ្ឌា តាមរយៈការកាត់បន្ថយតម្រូវការកម្លាំងមនុស្ស និងការបង្រួញរយៈពេលនៃគម្រោង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៣ ខែកក្កដា ឆ្នាំ២០២៦។

ផ្ទុយពីការព្រួយបារម្ភទាំងឡាយ ថ្នាក់ដឹកនាំរបស់ក្រុមហ៊ុន TCS ជឿជាក់យ៉ាងមុតមាំថា AI នឹងបង្កើតឱកាសអាជីវកម្មថ្មីៗកាន់តែច្រើន ជាជាងការមកបំផ្លាញការងារក្រៅ (Outsourcing)។ លោក K Krithivasan នាយកប្រតិបត្តិ (CEO) របស់ក្រុមហ៊ុន បានមានប្រសាសន៍នៅក្នុងបទសម្ភាសន៍ថា៖ «យើងនឹង... ធានាឱ្យបានថា យើងមានបុគ្គលិកពី ១% ទៅ ១.៥% នៃបុគ្គលិកសរុបរបស់យើង ដែលអាចដើរតួជាអ្វីដែលយើងហៅថា FDEs (វិស្វករផ្នែកដាក់ពង្រាយបច្ចេកវិទ្យា)»។ តួនាទីរបស់វិស្វករទាំងនេះ គឺត្រូវចុះទៅធ្វើការផ្ទាល់ជាមួយអតិថិជន ដើម្បីជួយជម្រុញការយកឧបករណ៍ AI ទៅប្រើប្រាស់ឱ្យត្រូវទិសដៅ ដែលផែនការនេះបានធ្វើឱ្យ TCS ត្រូវប្រជែងផ្ទាល់ជាមួយក្រុមហ៊ុនបច្ចេកវិទ្យាឈានមុខគេដូចជា OpenAI, Anthropic និង Microsoft។

ទោះបីជាកំណើនចំណូលពីផ្នែក AI របស់ក្រុមហ៊ុនបានថយចុះមកត្រឹម ១៣% ក្នុងត្រីមាសទីមួយក៏ដោយ ក៏លោក Krithivasan បានច្រានចោលការយល់ឃើញដែលថា AI នឹងមកជំនួសការងារមនុស្សទាំងស្រុង ដោយលោកបានសង្កត់ធ្ងន់ថា៖ «អ្វីដែលអ្នកត្រូវការ គឺការយល់ដឹងស៊ីជម្រៅអំពីបរិបទការងាររបស់អតិថិជន ដើម្បីធ្វើឱ្យវាដំណើរការទៅបាន។ នេះជាកន្លែងដែលយើងបង្កើតភាពខុសប្លែក និងចំណុចខ្លាំងរបស់យើង។ វាមិនមែនទាក់ទងនឹងការចំណេញលើតម្លៃពលកម្មនោះទេ ប៉ុន្តែវាជាមូលដ្ឋានដោយសារតែប្រភពធនធានមនុស្សដែលមានទេពកោសល្យដែលយើងបានបង្កើតឡើង»។ លោកបន្ថែមថា អតិថិជនបច្ចុប្បន្នប្រើប្រាស់ម៉ូដែល AI ច្រើនចម្រុះ ដូច្នេះពួកគេរឹតតែត្រូវការដៃគូដែលមានជំនាញមកជួយតភ្ជាប់ប្រព័ន្ធ និងគ្រប់គ្រងលំហូរទិន្នន័យ។

គួរជម្រាបថា ដើម្បីគាំទ្រដល់យុទ្ធសាស្ត្រនេះ ក្រុមហ៊ុន TCS ក៏កំពុងសម្លឹងមើលការទិញយកក្រុមហ៊ុនក្នុងវិស័យ AI និងសុវត្ថិភាពទិន្នន័យ (Data security) ផងដែរ បន្ទាប់ពីបានផ្អាកការទិញក្រុមហ៊ុនខាងក្រៅអស់ជាច្រើនឆ្នាំ។ លោក Samir Seksaria នាយកផ្នែកហិរញ្ញវត្ថុ (CFO) បានបញ្ជាក់ថា៖ «យើងកំពុងស្វែងរកមើលកន្លែងណាដែលយើងអាចរកឃើញអ្វីដែលនឹងជួយជម្រុញ ឬលើកកម្ពស់ទីតាំងយុទ្ធសាស្ត្ររបស់យើង»។ បច្ចុប្បន្ន ក្រុមហ៊ុន TCS បាននិងកំពុងវិនិយោគទឹកប្រាក់ប្រហែល ១ ពាន់លានដុល្លារជារៀងរាល់ឆ្នាំ ទៅលើការបណ្តុះបណ្តាលបុគ្គលិកផ្ទៃក្នុង និងការអភិវឌ្ឍធនធានមនុស្សដើម្បីត្រៀមលក្ខណៈជាស្រេចក្នុងយុគសម័យ AI នេះ៕