(ប៉េកាំង)៖ ការនាំចេញស្មាតហ្វូននៅក្នុងប្រទេសចិន បានបន្តធ្លាក់ចុះនៅក្នុងត្រីមាសទីពីរ ឆ្នាំ២០២៦ នេះ ដែលវាជាការដាំក្បាលចុះប្រាំត្រីមាសជាប់ៗគ្នាយ៉ាងរ៉ាំរ៉ៃ ដោយសារតែបណ្តាក្រុមហ៊ុនផលិត Android ភាគច្រើនបានសម្រេចចិត្តតម្លើងតម្លៃលក់ ដើម្បីទប់ទល់នឹងវិបត្តិហក់ឡើងថ្លៃនៃបន្ទះឈីបអង្គចងចាំ (Memory Chips) និងគ្រឿងបង្គុំសំខាន់ៗ។ នេះបើយោងតាមរបាយការណ៍ចុងក្រោយចេញផ្សាយដោយក្រុមហ៊ុនស្រាវជ្រាវទីផ្សារលំដាប់អន្តរជាតិ IDC នៅថ្ងៃអង្គារ ទី១៤ ខែកក្កដា ឆ្នាំ២០២៦។

យោងតាមទិន្នន័យពី IDC ការនាំចេញស្មាតហ្វូនសរុបនៅក្នុងទីផ្សារប្រទេសចិន បានធ្លាក់ចុះ ៤.៣ ភាគរយ មកនៅត្រឹម ៦៦ លានគ្រឿង នៅក្នុងត្រីមាសទីពីរ បើធៀបនឹងរយៈពេលដូចគ្នាកាលពីឆ្នាំមុន។ ជាមួយគ្នានេះ បើគិតសរុបពេញមួយឆមាសទីមួយ (គិតចាប់ពីខែមករា ដល់ខែមិថុនា) ការនាំចេញស្មាតហ្វូនសរុបក៏បានដាំក្បាលចុះ ៤.២ ភាគរយផងដែរ។

ទោះបីជាទីផ្សាររួមជួបប្រទះនឹងឱនភាពយ៉ាងណាក៏ដោយ អ្វីដែលគួរឱ្យកត់សម្គាល់នោះគឺ មានតែក្រុមហ៊ុនបច្ចេកវិទ្យាយក្ស Huawei និង Apple ពីរប៉ុណ្ណោះ ដែលអាចហែលឆ្លងរលកវិបត្តិនេះ និងបង្ហាញតួលេខកំណើនវិជ្ជមាន ដោយក្រុមហ៊ុន Apple សម្រេចបានកំណើននាំចេញហក់ឡើងគួរឱ្យកត់សម្គាល់រហូតដល់ ២៤.៤ ភាគរយ នៅក្នុងត្រីមាសនេះ ខណៈ Huawei ទទួលបានកំណើនកើនឡើង ១៩.៤ ភាគរយ ដោយបន្តក្តោបក្តាប់តំណែងលេខ១ ក្នុងទីផ្សារចិន ជាមួយនឹងចំណែកទីផ្សាររហូតដល់ទៅ ២២.៦ ភាគរយ។ ចំណែកឯ Apple ឈរនៅចំណាត់ថ្នាក់លេខ២ ជាមួយនឹងចំណែកទីផ្សារ ១៨.១ ភាគរយ។

លោក Arthur Guo អនុប្រធានអ្នកវិភាគជាន់ខ្ពស់ប្រចាំ IDC China បានពន្យល់ពីដើមចមនៃបាតុភូតនេះថា៖ «ខណៈពេលដែលដៃគូប្រកួតប្រជែងដទៃទៀតនាំគ្នាតម្លើងតម្លៃលក់ គឺមានតែ Huawei និង Apple ប៉ុណ្ណោះដែលរក្សាតម្លៃផលិតផលរបស់ខ្លួនឱ្យនៅថេរដដែល។ កត្តានេះបានផ្តល់ហេតុផលយ៉ាងមុតមាំ និងជម្រុញចិត្តឱ្យអតិថិជនដែលធ្លាប់តែស្ទាក់ស្ទើរ សម្រេចចិត្តទិញភ្លាមៗ ជំនួសឱ្យការរង់ចាំ»។

ផ្ទុយទៅវិញ ក្រុមហ៊ុន Android ក្នុងស្រុកធំៗផ្សេងទៀត បានរងការវាយប្រហារយ៉ាងដំណំ ដោយសារតែពួកគេបានបង្ខំចិត្តឡើងថ្លៃ ឬកាត់បន្ថយការផលិតម៉ូដែលធុនមធ្យម និងធុនថោក ដើម្បីរក្សាប្រាក់ចំណេញ ស្របពេលដែលតម្លៃបន្ទះឈីបដកដង្ហើមរួមមាន DRAM និង NAND Flash កំពុងឡើងថ្លៃកប់ពពក។ ក្រុមហ៊ុន Xiaomi (ឈរនៅចំណាត់ថ្នាក់លេខ៥) មានការនាំចេញបានដាំក្បាលចុះយ៉ាងខ្លាំងរហូតដល់ ២១.៧ ភាគរយ។ ក្រុមហ៊ុន Oppo និង Vivo មានការនាំចេញបានធ្លាក់ចុះ ៩.៧ ភាគរយ និង ១១.៤ ភាគរយ រៀងៗខ្លួន។ លើសពីនេះ IDC បានបន្ថែមថា ការថយចុះនៃប្រសិទ្ធភាព និងការកាត់បន្ថយកម្មវិធីឧបត្ថម្ភធនពីរដ្ឋាភិបាលចិន ក៏ជារបាំងយាយីមួយ ដែលធ្វើឱ្យកម្លាំងទិញ និងតម្រូវការផ្លាស់ប្តូរទូរស័ព្ទថ្មីរបស់ប្រជាជនចិន ធ្លាក់ចុះខ្សោយជាងត្រីមាសមុនៗផងដែរ៕