(បរទេស)៖​ ក្រុមហ៊ុន TSMC ដែលជាក្រុមហ៊ុនផលិតបន្ទះឈីបតាមកិច្ចសន្យាធំបំផុតនៅលើពិភពលោក មានផែនការដំឡើងថ្លៃសេវាផលិតបន្ទះឈីបចន្លោះពី ៥% ទៅ ១០% ចាប់ពីដើមឆ្នាំ២០២៧ ខាងមុខ។ ការសម្រេចចិត្តនេះ ធ្វើឡើងក្នុងគោលបំណងទប់ទល់នឹងការកើនឡើងនៃថ្លៃដើមវត្ថុធាតុដើម ឧបករណ៍ផលិតកម្ម និងចំណាយលើការសាងសង់រោងចក្រនៅក្រៅប្រទេស។​ នេះបើយោងតាមការចេញផ្សាយដោយ CNA នៅថ្ងៃទី២១ ខែកក្កដា​ ឆ្នាំ២០២៦។

យោងតាមសារព័ត៌មាន Nikkei Asia ការដំឡើងថ្លៃនេះនឹងប៉ះពាល់ដល់ប្រភេទផលិតផល និងអតិថិជនផ្សេងៗគ្នា ដោយក្នុងនោះ ការផលិតតាមបច្ចេកវិទ្យាចាស់ៗ (Mature nodes) ដូចជា ១២ណាណូម៉ែត្រ, ១៦ណាណូម៉ែត្រ និង ២៨ណាណូម៉ែត្រ នឹងប្រឈមមុខនឹងការដំឡើងថ្លៃខ្ពស់ជាងគេរហូតដល់ ១០%។ កិច្ចចរចារវាង TSMC និងអតិថិជនបានចាប់ផ្តើមកាលពីខែមិថុនា និងបានបញ្ចប់រួចរាល់នៅក្នុងខែកក្កដានេះ។

ទាក់ទិននឹងព័ត៌មាននេះ អ្នកនាំពាក្យរបស់ក្រុមហ៊ុន TSMC បានគូសបញ្ជាក់ថា៖ «យុទ្ធសាស្ត្រកំណត់តម្លៃរបស់យើង គឺជាយុទ្ធសាស្ត្រវែងឆ្ងាយ មិនមែនជាការកេងចំណេញឱកាសនោះទេ។ យើងនឹងបន្តធ្វើការយ៉ាងជិតស្និទ្ធជាមួយអតិថិជន និងលក់តម្លៃពិតប្រាកដរបស់យើងទៅឱ្យពួកគេ»។

គួរជម្រាបថា កាលពីខែមិថុនាកន្លងទៅ នាយកប្រតិបត្តិ (CEO) TSMC លោក C.C. Wei ក៏បានបង្ហើបពីបំណងនៃការដំឡើងថ្លៃនេះផងដែរ ដោយលោកបានបន្ថែមថា ក្រុមហ៊ុននឹងជៀសវាងការដំឡើងថ្លៃភ្លាមៗ ដូចដែលក្រុមហ៊ុនផលិតអង្គចងចាំ (Memory firms) មួយចំនួនធ្លាប់បានធ្វើកន្លងមកនោះឡើយ៕