អនុប្រធានសហព័ន្ធគុនខ្មែរ និងជាអគ្គលេខាធិការរងគុនខ្មែរអន្តរជាតិ ប្រតិកម្មចំពោះការរិះគន់បែបជេប្រមាថ និងប្រើពាក្យអសីលធម៌លើមន្ត្រីស្ថាប័នកីឡា
23-07-2026 14:35
(ភ្នំពេញ)៖ លោក គង់ វិសាល អនុប្រធានសហព័ន្ធគុនខ្មែរ ព្រមទាំងជាអគ្គលេខាធិការរងគុនខ្មែរអន្តរជាតិ បានចេញមុខប្រតិកម្មយ៉ាងខ្លាំងក្លា និងគូសបន្ទាត់ក្រហមយ៉ាងច្បាស់ ចំពោះការប្រើប្រាស់បណ្តាញសង្គមធ្វើការរិះគន់បែបអសីលធម៌ ជេរប្រមាថ និងវាយប្រហារមកលើមន្ត្រីជាន់ខ្ពស់ និងស្ថាប័នកីឡា។
ប្រតិកម្មនេះកើតឡើង បន្ទាប់ពីមានការសង្កេតឃើញបុគ្គលមួយចំនួន ប្រើប្រាស់មធ្យោបាយផ្សាយផ្ទាល់លើបណ្តាញសង្គម (Facebook Live) ដោយនិយាយរិះគន់ និងប្រើប្រាស់ពាក្យពេចន៍ធ្ងន់ៗ ខ្វះមូលដ្ឋានច្បាស់លាស់ ស្ទើរតែដល់កម្រិតមើលងាយ និងជេរប្រមាថមកលើថ្នាក់ដឹកនាំសហព័ន្ធ និងមន្ត្រីចាស់ទុំ ដែលមានវ័យចំណាស់អាចជាឪពុក ឬជាតាខ្លួនឯងបាន។
តាមរយៈសារដ៏មានអត្ថន័យ និងការអប់រំ លោក គង់ វិសាល បានលើកឡើងពីគោលការណ៍នៃការរិះគន់ក្នុងសង្គមថា «ប្អូនៗមានសិទ្ធិរិះគន់អំពីបញ្ហាកីឡា ឬសិល្បៈគ្រប់ទម្រង់ ដើម្បីស្ថាបនា ប្រកបដោយសីលធម៌ល្អ! ក្នុងនាមសង្គមខ្មែរដែលមានអរិយធម៌ វប្បធម៌ ប្រពៃណីដ៏ល្អផូរផង់។ តែបើប្រែការរិះគន់ទៅជា «បែបអសីលធម៌, បែបជេរប្រមាថ, បែបបំផ្លាញសីលធម៌សង្គម បំផ្លាញសេចក្តីថ្លៃថ្នូរប្រជាជនខ្មែរក្នុងសង្គម, បែបចងគំនុំ» ទៅលើស្ថាប័ន ឬរវាងបុគ្គល និងបុគ្គល... តើពួកគាត់ខុសអ្វី?»។
លោក គង់ វិសាល បានថ្លែងប្រាប់ Fresh News Plus ថា «ក្នុងនាមខ្ញុំអ្នកដឹកនាំបន្តវេនជំនាន់ក្រោយ ខ្ញុំនឹងមិនលើកលែងឱ្យដាច់ខាត រាល់ទង្វើអសីលធម៌ទាំងនោះ ទោះបីក្នុងតម្លៃណាក៏ដោយ។ មនុស្សអាចទ្រាំនឹងការលំបាក តែមិនអាចទ្រាំរងការប្រមាថបានឡើយ។ បន្ទាត់ក្រហមខ្ញុំបានគូសរួចហើយ បើនៅតែព្យាយាមឆ្លងហួស សាកស្រមៃមើល៍ទៅនឹងមានអ្វីកើតឡើង «ចូរប្រយ័ត្នប្រយែងសំដី» មុននឹងយកខ្ញុំជាសត្រូវ។ ចូរសិក្សាពីបងឱ្យច្បាស់, ខ្ញុំមិនមែនជាអ្នកលេង ឬអ្នកមែនទេ, តែខ្ញុំអ្នកធ្វើប្រកបដោយសីលធម៌ ប្រកបដោយការព្យាយាមអត់ធ្មត់ខ្ពស់ លះបង់ បំរើស្ថាប័នដែលស្រឡាញ់ពេញចិត្តដោយគ្មានលក្ខខណ្ឌ អស់រយ:ពេលជាង២៥ឆ្នាំ»។
លោកបានសង្កត់ធ្ងន់ទៀតថា មនុស្សអាចទ្រាំទ្រនឹងការលំបាកបាន ប៉ុន្តែពុំអាចទ្រាំរងនូវការប្រមាថមើលងាយយ៉ាងធ្ងន់ធ្ងរនោះទេ។ ក្នុងនាមជាអ្នកដឹកនាំបន្តវេនជំនាន់ក្រោយ លោកបានប្រកាសយ៉ាងដាច់អហង្ការថា នឹងមិនលើកលែងដាច់ខាត ចំពោះរាល់ទង្វើអសីលធម៌ និងការប្រមាថទាំងឡាយណាដែលបន្តប៉ះពាល់ដល់ស្ថាប័ន និងកិត្តិយសបុគ្គល។ «បន្ទាត់ក្រហមបងបានគូសរួចហើយ បើនៅតែព្យាយាមឆ្លងហួស សាកស្រមៃមើលទៅនឹងមានអ្វីកើតឡើង។ ចូរប្រយ័ត្នប្រយែងសំដី! មុននឹងយកបងជាសត្រូវ ចូរសិក្សាពីបងឱ្យច្បាស់ បងមិនមែនជាអ្នកលេង ឬអ្នកម៉ែនទេ តែបងជាអ្នកធ្វើប្រកបដោយសីលធម៌ ប្រកបដោយការព្យាយាមអត់ធ្មត់ខ្ពស់»។ នេះបើតាមការបញ្ជាក់បន្ថែមរបស់លោក គង់ វិសាល។
ជាការពិត មហាជនដែលបានតាមដានយ៉ាងយកចិត្តទុកដាក់ ចំពោះសកម្មភាពកីឡាប្រដាល់គុនខ្មែរ ការគ្រប់គ្រងដឹកនាំក្នុងរបត់ថ្មីដែលមានវត្តមានលោក ខូវ ឆាយ ជាប្រធានសហព័ន្ធគុនខ្មែរ ខណៈដែលសកម្មភាពរបស់លោក គង់ វិសាល មានតួនាទីច្រើនដូចជាទទួលបន្ទុកផ្នែកកីឡា និងសិល្បៈ ជាអនុប្រធានសហព័ន្ធប្រដាល់គុនខ្មែរ ជាអគ្គលេខាធិការរងគុនខ្មែរអន្តរជាតិ ខណៈសកម្មភាពរីកចម្រើន ឬការអនុវត្តប្រតិបត្តិការងារ គឺបានមកពីវិស័យឯកជន ដែលព្រមព្រៀងក្នុងកិច្ចសន្យាជានីតិវិធី ដោយមិនបានប្រើប្រាស់ថវិកាជាតិនោះឡើយ។
ការប្រតិកម្មរបស់លោក គង់ វិសាល ដោយប្រើពាក្យមិនគ្រោធគ្រាត ឬអសីលធម៌នោះទេ ប៉ុន្តែផ្អែមល្ហែមបែបស៊ីជម្រៅនិងទទួលខុសត្រូវតាមផ្លូវច្បាប់ និងអាចជាភ្លើងសញ្ញាមានពណ៌លឿងគួរប្រយ័ត្នក្នុងការប្រើពាក្យរិះគន់៕
