(ភ្នំពេញ)៖ ក្រុមបាល់ទាត់ជម្រើសជាតិកម្ពុជា នឹងត្រូវជួបក្រុមជម្រើសជាតិសិង្ហបុរី នាវេលាម៉ោង ៧យប់ថ្ងៃទី២៤ ខែកក្កដានេះ ក្នុងជំនួបបើកឆាកពូលA នៃពានរង្វាន់បាល់ទាត់អាស៊ីអាគ្នេយ៍ (ASEAN Hyundai Cup) ឆ្នាំ២០២៦ នៅពហុកីឡដ្ឋានជាតិមរតកតេជោ។

សម្រាប់ព្រឹត្តិការណ៍បាល់ទាត់ប្រចាំតំបន់នេះ កម្ពុជា ស្ថិតក្នុងពូល A ជាមួយក្រុមជម្រើសជាតិវៀតណាម ឥណ្ឌូនេស៊ី សិង្ហបុរី និងទីម័រខាងកើត ដែលត្រូវធ្វើការប្រកួតសន្សំពិន្ទុវិលជុំ ដើម្បីស្វែងរកក្រុមលេខ១ និងលេខ២ ឡើងវគ្គបន្ដ ក្នុងនោះកម្ពុជា ទទួលបានសិទ្ធធ្វើម្ចាស់ផ្ទះចំនួន ២ប្រកួត ទល់នឹងក្រុមជម្រើសជាតិសិង្ហបុរី និងទីម័រខាងកើត។

ថ្លែងក្នុងសន្និសីទសារព័ត៌មានមុនការប្រកួត កាលពីល្ងាចថ្ងៃព្រហស្បតិ៍កន្លងទៅ លោក Koji Gyotoku គ្រូបង្វឹកក្រុមជម្រើសជាតិកម្ពុជា បានបង្ហាញការត្រៀមខ្លួនរួចរាល់ សម្រាប់ការប្រកួតនេះ ។ លោកសង្កត់ធ្ងន់ថា ទោះអវត្ដមានកីឡាករមួយចំនួន ក៏មិនមានបញ្ហាសម្រាប់លោកឡើយ តែលោកជឿជាក់លើកូនក្រុម ហើយប្ដេជ្ញានឹងព្យាយាមឲ្យអស់ពីសមត្ថភាពជាមួយធនធានកីឡាករដែលមាន។

ចំណែកលោក Gavin Lee គ្រូបង្វឹកក្រុមភ្ញៀវសិង្ហបុរីថា ក្រុមបានត្រៀមរួចរាល់ និងរង់ចាំការអនុវត្តជាក់ស្ដែងលើទីលាន បន្ទាប់ពីពួកគេបានប្រមូលផ្ដុំ ៣សប្ដាហ៍កន្លងមក ដោយមានកិច្ចសហការដ៏ល្អពីបណ្ដាក្លិបក្នុងស្រុក ហើយលោកសង្ឃឹមថា សិង្ហបុរី នឹងបន្ដធ្វើបានល្អ ជាមួយតុល្យភាពនៃការលេង ដើម្បីប្រជែងកៅអីវគ្គបន្ដ។ លោកទទួលស្គាល់ ក្នុងពូលមានឥណ្ឌូនេស៊ី និងវៀតណាម ដែលជាឧបសគ្គ តែលោកថា កម្ពុជាក៏ជាក្រុមមិនគួរមើលរំលងដែរ។

គួរដឹងថា ដោយសាររដូវកាលនេះ គឺជាខួប ៣០ឆ្នាំ នៃការបង្កើតពានរង្វាន់បាល់ទាត់ប្រចាំតំបន់ខាងលើ មុនការប្រកួតរវាងកម្ពុជា និងសិង្ហបុរី ក៏នឹងមានការរៀបចំពិធីបើកការប្រកួតផ្លូវការ ដើម្បីអបអរសាទរព្រឹត្តិការណ៍បាល់ទាត់អាស៊ីអាគ្នេយ៍ រយៈពេល ៣ទសវត្សរ៍កន្លងមក ដោយនឹងមានការយាងចូលរួមសម្ដែង និងបង្ហើរព្រះសំនៀងពីព្រះនាង នរោត្ដម ជេនណា ព្រមទាំងលោក សុខ សម្បត្តិ និងសិល្បៈករ-សិល្បៈការិនីផ្សេងទៀត នៅពហុកីឡដ្ឋានជាតិមរតកតេជោ ផងដែរ។

សម្រាប់កម្មវិធីប្រកួតរបស់ក្រុមជម្រើសជាតិកម្ពុជា ក្រោយបើកទ្វារផ្ទះទទួលសិង្ហបុរី ល្ងាចនេះ កម្ពុជានឹងត្រូវធ្វើដំណើរទៅជួបក្រុមម្ចាស់ផ្ទះឥណ្ឌូនេស៊ី នាថ្ងៃទី២៧ ខែកក្កដា មុនត្រឡប់មកបើកទ្វារពហុកីឡដ្ឋានជាតិ ទទួលក្រុមជម្រើសជាតិទីម័រខាងកើត វិញម្ដង នាថ្ងៃទី៣ ខែសីហា មុនធ្វើដំណើរទៅជួបក្រុមម្ចាស់ផ្ទះវៀតណាម នាថ្ងៃទី៧ ខែសីហា ឆ្នាំ២០២៦ ខាងមុខ៕