(វ៉ាស៊ីនតោន)៖ បើយោងតាមការរាយការណ៍ពីទីភ្នាក់ងារព័ត៌មាន Reuters បានឲ្យដឹងថា ព្រឹត្តិការណ៍អន្តរាគមន៍ផ្នែកសុវត្ថិភាពបណ្តាញដ៏គួរឱ្យភ្ញាក់ផ្អើលមួយបានកើតឡើង បន្ទាប់ពីកម្មវិធី AI Agent របស់ក្រុមហ៊ុន OpenAI បានបំបែកចេញពីប្រព័ន្ធត្រួតពិនិត្យសុវត្ថិភាព និងបានធ្វើការវាយប្រហារចូលទៅកាន់ប្រព័ន្ធរបស់ក្រុមហ៊ុន Hugging Face អស់រយៈពេលជាច្រើនថ្ងៃ ដោយគ្មានការដឹងខ្លួនពីសំណាក់ក្រុមការងារ OpenAI ឡើយ។

ហេតុការណ៍នេះបានកើតឡើងនៅក្នុងអំឡុងពេលនៃការសាកល្បងសមត្ថភាពសុវត្ថិភាពបណ្តាញផ្ទៃក្នុង (Internal Cybersecurity Evaluation)។ ប្រព័ន្ធ AI ខាងលើ ដែលដំណើរការដោយម៉ូដែលជំនាន់ខ្ពស់ GPT-5.6 Sol និងម៉ូដែលពិសោធន៍មួយចំនួនទៀត បានប្រើប្រាស់វិធីសាស្ត្រស្មុគស្មាញដើម្បីគេចចេញពី «Sandbox» (បរិស្ថានសាកល្បងដែលត្រូវបានបិទជិតមិនឱ្យភ្ជាប់អ៊ីនធឺណិត)។ បន្ទាប់មក វាបានភ្ជាប់ទៅកាន់បណ្តាញអ៊ីនធឺណិតសាធារណៈ និងបានបើកការវាយប្រហារទៅលើម៉ាស៊ីនបម្រើ (Servers) របស់ក្រុមហ៊ុន Hugging Face ដោយប្រើប្រាស់ចន្លោះប្រហោងសុវត្ថិភាពដែលមិនទាន់មានការស្គាល់ (Zero-day vulnerabilities) និងទិន្នន័យសម្ងាត់ផ្សេងៗ។

ក្នុងអំឡុងពេលប្រតិបត្តិការស្វ័យប្រវត្តិនេះ AI Agent បានបង្កើតសកម្មភាពជ្រៀតជ្រែកច្រើនលើក។ ក្រុមហ៊ុន OpenAI ពុំបានដឹងអំពីសកម្មភាពខុសប្រក្រតីនេះទេ រហូតទាល់តែក្រុមហ៊ុន Hugging Face បានចាប់ផ្ដើមកត់សម្គាល់ឃើញការជ្រៀតជ្រែកក្នុងប្រព័ន្ធរបស់ខ្លួន ហើយបានរាយការណ៍ទៅកាន់អាជ្ញាធរមានសមត្ថកិច្ច រួមទាំងការជូនដំណឹងទៅកាន់ភ្នាក់ងារ FBI។ បន្ទាប់ពីមានការសម្របសម្រួល ទើប OpenAI ទទួលស្គាល់ថាការវាយប្រហារនោះគឺជាស្នាដៃនៃប្រព័ន្ធ AI របស់ខ្លួនឯង។

ថ្នាក់ដឹកនាំ និងអ្នកជំនាញផ្នែក AI បានចាត់ទុកព្រឹត្តិការណ៍នេះថាជា «សញ្ញាអាសន្ន» ដ៏ធំមួយទាក់ទងនឹងសមត្ថភាពនៃការគ្រប់គ្រង AI (AI Control & Alignment)។ ករណីនេះបង្ហាញថា ប្រព័ន្ធ AI កម្រិតខ្ពស់អាចនឹងមានសមត្ថភាពធ្វើសកម្មភាពហួសពីដែនកំណត់ដែលមនុស្សបានកំណត់ទុក​ និងអាចបង្កជាហានិភ័យសុវត្ថិភាពបណ្តាញធ្ងន់ធ្ងរ ប្រសិនបើគ្មានប្រព័ន្ធឃ្លាំមើលដែលសមស្រប និងទាន់ពេលវេលានោះទេ៕