សាលាញូវហ្គេតវ៉េអន្តរជាតិ ប្រារព្ធពិធីបញ្ចប់ការសិក្សា និងប្រគល់ពានរង្វាន់យ៉ាងអធិកអធម សម្រាប់សិស្សានុសិស្សឆ្នាំ២០២៦ (Video inside)
03-08-2026 15:50
(ភ្នំពេញ)៖ សាលាញូវហ្គេតវ៉េអន្តរជាតិ បានរៀបចំពិធីបញ្ចប់ការសិក្សាដ៏មានអត្ថន័យសម្រាប់សិស្សានុសិស្ស ដែលបានបញ្ចប់ការសិក្សា ឆ្នាំ២០២៦ ដែលព្រឹត្តិការណ៍ដ៏មានតម្លៃនេះ ពោរពេញដោយភាពរីករាយ ក្នុងការអបអរសាទរដល់សិស្សានុសិស្សគ្រប់កម្រិត ចាប់ពីមតេ្តយ្យសិក្សា បឋមសិក្សា អនុវិទ្យាល័យ រហូតដល់កម្រិតវិទ្យាល័យ នៃកម្មវិធីសិក្សាទាំងបី (អង់គ្លេស ចិន និងខ្មែរ) ដែលបានខិតខំប្រឹងប្រែងរហូតទទួលបានជោគជ័យដ៏ត្រចះត្រចង់។
ក្រៅពីពិធីបញ្ចប់ការសិក្សាដ៏មានអត្ថន័យនេះ សាលាថែមទាំងបានប្រគល់ពានរង្វាន់ និងរង្វាន់លើកទឹកចិត្តជូនដល់សិស្សានុសិស្សឆ្នើមចាប់ពីថ្នាក់ទី១ ដល់ទី១២ ដើម្បីជាការកោតសរសើរដល់ស្មារតីតស៊ូ និងសមិទ្ធផលសិក្សាដ៏ល្អប្រសើររបស់ពួកគាត់។
ពិធីបញ្ចប់ការសិក្សាដ៏មានអត្ថន័យ ដែលនាទី១ ខែសីហា ឆ្នាំ២០២៦ អ្នកឧកញ៉ាបណ្ឌិត ប៊ុន ណារី ប្រធានក្រុមប្រឹក្សាភិបាល និងជាអគ្គនាយិកាសាលាញូវហ្គេតវ៉េអន្តរជាតិ បានសម្តែងនូវមោទនភាព ចំពោះសិស្សានុសិស្សថ្នាក់ទី១២ ដែលបានបញ្ចប់ការសិក្សាដោយជោគជ័យ និងត្រៀមខ្លួនបន្តការសិក្សាទៅកាន់កម្រិតឧត្តមសិក្សា។
ជាមួយគ្នានេះ អ្នកកឧកញ៉ាបណ្ឌិត ប៊ុន ណារី បានថ្លែងអំណរគុណចំពោះការគាំទ្ររបស់សំណាក់មាតាបិតា និងអាណាព្យាបាល ដែលបានដំណើរការ អស់រយៈពេល ១៦ឆ្នាំមកហើយ ចាប់តាំងពីឆ្នាំ២០១១មក។ សាលាបានផ្តល់កម្មវិធីសិក្សាបីភាសា រួមមាន ខ្មែរ អង់គ្លេស និងចិន ស្របតាមកម្មវិធីសិក្សាជាតិទូទៅ ដែលធ្វើឱ្យសាលាទទួលបានជោគជ័យយ៉ាងត្រចះត្រចង់ និងមានការទទួលស្គាល់យ៉ាងទូលំទូលាយ។
លោក ជា ជាតិ អនុរដ្ឋលេខាធិការក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងកោតសរសើរចំពោះថ្នាក់ដឹកនាំ គណៈគ្រប់គ្រង លោកគ្រូ អ្នកគ្រូ ជាពិសេសអ្នកឧកញ៉ាបណ្ឌិត ប៊ុន ណារី ក្នុងការបន្តបេសកកម្មជាមួយក្រសួងអប់រំ យុវជន និងកីឡា ដើម្បីកសាងធនធានមនុស្សជូនដល់យុវជន និងប្រជាជនកម្ពុជា។
លោក បានគូសបញ្ជាក់ថា សាលាញូវហ្គេតវ៉េអន្តរជាតិ បានបង្ហាញនូវសក្ដានុពលដ៏ល្អក្នុងការគ្រប់គ្រង និងបណ្ដុះបណ្ដាលសិស្សានុសិស្សឱ្យមានសមត្ថភាពខ្ពស់ ស្របតាមទិសដៅកំណែទម្រង់របស់ក្រសួងអប់រំ យុវជន និងកីឡា។ លើសពីនេះ សាលាបានឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា នីតិកាលទី៧ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលផ្តល់អទិភាពខ្ពស់ទៅលើកសាងធនធានមនុស្សប្រកបដោយគុណភាព ដើម្បីជួយអភិវឌ្ឍសេដ្ឋកិច្ចគ្រួសារ សង្គម និងប្រទេសជាតិ។
អាណាព្យាបាលជាច្រើន ដែលបានមកអបអរសាទរកូនៗក្នុងថ្ងៃបញ្ចប់ការសិក្សានេះ បានបង្ហាញអារម្មណ៍រំភើប និងមោទនភាពចំពោះកូនៗរបស់ខ្លួន ព្រមទាំងវាយតម្លៃខ្ពស់ចំពោះគុណភាពអប់រំ និងបរិយាកាសសិក្សាដ៏ល្អប្រសើររបស់សាលា ដែលបានជួយឲ្យសិស្សមានភាពក្លាហាន ទំនុកចិត្ត និងរីកចម្រើនគួរឲ្យកត់សម្គាល់។
ទន្ទឹមគ្នានេះដែរ យុវសិស្ស នុត ទីម៉ឹង និងយុវតី អ៊ិន គីមប៊ួយ ជាសិស្សថ្នាក់ទី១២ ក៏បានបង្ហាញអារម្មណ៍សប្បាយរីករាយ និងរំភើបយ៉ាងខ្លាំង ដែលបានបញ្ចប់ការសិក្សា ហើយបានថ្លែងអំណរគុណយ៉ាងជ្រាលជ្រៅចំពោះគណៈគ្រប់គ្រងសាលា និងលោកគ្រូ អ្នកគ្រូ ដែលបានលះបង់ពេលវេលា កម្លាំងកាយ និងកម្លាំងចិត្ត ក្នុងការបណ្តុះបណ្តាលពួកគេ។ ពួកគេបានបញ្ជាក់ថា ការសិក្សានៅសាលា New Gateway មិនត្រឹមតែផ្តល់ចំណេះដឹងប៉ុណ្ណោះទេ ថែមទាំងជាបទពិសោធន៍ជីវិតដ៏មានតម្លៃ ដែលបង្រៀនពីការសហការ ការគោរព និងការក្លាយជាមនុស្សល្អសម្រាប់សង្គម។
បន្ថែមពីនេះ សិស្សានុសិស្សទាំងអស់បានប្តេជ្ញាខិតខំប្រឹងប្រែងសម្រាប់ការប្រឡងបាក់ឌុបនាពេលខាងមុខ ដើម្បីទទួលបានលទ្ធផលល្អ និងបន្តការសិក្សានៅកម្រិតឧត្តមសិក្សា ទាំងក្នុងនិងក្រៅប្រទេស ក្នុងជំនាញដែលខ្លួនស្រឡាញ់ ដើម្បីរួមចំណែកអភិវឌ្ឍប្រទេសជាតិ។ ឆ្នាំសិក្សាថ្មីរបស់សាលាញូវហ្គេតវ៉េអន្តរជាតិ នឹងចាប់ផ្តើមជាផ្លូវការនៅថ្ងៃចន្ទ ទី១៧ ខែសីហា ឆ្នាំ២០២៦ ខាងមុខនេះ។
